توعىزقۇمالاق اتاۋى وزگەرە مە -ۆيتسە-پرەمەر دەپۋتات ساۋالىنا جاۋاپ بەردى

استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا ءماجىلىس دەپۋتاتىنىڭ توعىزقۇمالاق زياتكەرلىك وينىنىڭ اتاۋىن وزگەرتۋگە قاتىستى ساۋالىنا جاۋاپ بەردى.

«الەمدىك تاجىريبەدە بىردەي ويىنداردىڭ، زاتتاردىڭ، قۇبىلىستاردىڭ ءار تىلدە ءارتۇرلى اتاۋلارىن كەزدەستىرۋگە بولادى. مىسالى، الەمدە فۋتبولدى اعىلشىندار «فۋتبول»، يتالياندىقتار «كالچو»، امەريكاندىقتار «سوككەر» دەيدى. زياتكەرلىك ويىننىڭ ءبىرى شاحماتتى الساق، ونى ءبىر ەلدەردە «شاتران»، تاعى ءبىر ەلدەردە «چەسس»، باسقالارى «شاحمات» دەيدى. تۇركى حالىقتارىندا دا بىردەي ويىندار ءار ءتۇرلى اتاۋلارمەن اتالادى. مىسالى، قىرعىز حالقى «اسىق اتۋدى» - «وردو»، «كۇرەستى» - «الىش»، «كوكپاردى» - «كوك- ءبورۋ» دەپ اتايدى. سونىمەن قاتار «توعىزقورعوول» اتاۋى قىرعىز حالقىنا، ال «مانگالا» اتى تۇرىك حالقىنا تيەسىلى»، - دەپ اتاپ وتەدى ۆيتسە- پرەمەر.

ۇكىمەت باشىسىنىڭ ورىنباسارى حالىقتىڭ جادىندا، سونداي- اق ا. كراسنوۆ، ن. پانتۋسوۆ، ب. كۋفتين، ر. كارۋتتس، م. بالاقايەۆ، ءا. اقشورايەۆ، س. امانجولوۆ، س. تىلەۋبايەۆ پەن باسقا دا كوپتەگەن عالىمداردىڭ ەڭبەكتەرىندە جانە م. اۋەزوۆتىڭ شىعارمالارىندا ويىن «توعىزقۇمالاق» دەپ اتالعانىن العا تارتادى.

«وعان قوسا، قازاق حالقىنا تيەسىلى مىڭجىلدىق تاريحى بار توعىزقۇمالاق اتاۋىن وزگەرتۋ فەدەراتسيانىڭ دا، باسقا ۇيىمداردىڭ دا قۇزىرەتىنە كىرمەيدى. جوعارىداعىنى ەسكەرە وتىرىپ، ۇلتتىڭ مادەني مۇراسى بولىپ تابىلاتىن مىڭجىلدىق تاريحى بار توعىزقۇمالاق ويىنىنىڭ اتاۋىن ءوز قالپىندا قالدىرعاندى ءجون دەپ سانايمىز»، - دەدى تامارا دۇيسەنوۆا.