تۇرىك كومپانياسى قازاقستاندا 5000 توننا كوكونىس ساقتايتىن قويما سالماق
استانا. KAZINFORM - اۋىل شارۋاشىلىعى ءمينيسترى ورىنباسارى ەرمەك كەنجەحان ۇلى «Saraylım Tarım» كومپانياسىنىڭ باسقارما ءتوراعاسى ىلىدجا مۋستافامەن كەزدەستى. كەزدەسۋ بارىسىندا ەكى تاراپ ينۆەستيتسيالىق جوبالاردى ىسكە اسىرۋداعى ىنتىماقتاستىق مۇمكىندىكتەرىن تالقىلادى، دەپ حابارلايدى ۆەدومستۆونىڭ باسپا ءسوز قىزمەتى.
«Saraylım Tarım»- تۇركيا رەسپۋبليكاسىندا جەمىستەر مەن كوكونىستەردى ساقتاۋ سالاسىندا جەتەكشى كومپانيا بولىپ سانالادى. كاسىپورىن قويمالارىنىڭ سىيىمدىلىعى جىلىنا 14 مىڭ توننا جەمىس-جيدەك، ال، وڭدەۋ قۋاتتىلىعى جىلىنا 35 مىڭ توننا. ونىڭ ونىمدەرى الەمنىڭ 18 ەلىنە ەكسپورتتالادى. كومپانيا قۋاتتىلىعى 5 مىڭ توننا كوكونىس قويماسىن سالۋعا مۇددەلى. جوبانىڭ قۇنى شامامەن 15 ميلليون ا ق ش دوللارىن قۇرايدى.
سونداي-اق سىركە سۋى مەن كوكونىس كونسەرۆىلەرىن ءوندىرۋدى جولعا قويۋ نيەتى بار. جوباعا سالىنعان ينۆەستيتسيا سوماسى 15 ميلليون ا ق ش دوللارىن قۇراماق.
ىلىدجا مۋستافا جوبا الماتى وبلىسىندا ىسكە اسىرىلاتىنىن، وعان قازاقستاندىق سەرىكتەس انىقتالعانىن حابارلادى.
ءوز كەزەگىندە ۆيتسە- مينيستر ينۆەستورلارعا كورسەتىلەتىن مەملەكەتتىك قولداۋ، كوزدەلگەن سۋبسيديالار، جەڭىلدىكتەر مەن پرەفەرەنتسيالار تۋرالى ايتىپ بەردى.
«اۋىل شارۋاشىلىعى مينيسترلىگى جوبانى ىسكە اسىرۋعا بارىنشا جاردەم كورسەتۋگە دايىن»، - دەپ اتاپ ءوتتى ەرمەك كەنجەحان ۇلى.