تۇركىستان ءوڭىرىنىڭ تۇلەكتەرى اۋىلدارىنا «رامىزدەر» الاڭىن تارتۋ ەتىپ جاتىر
تۇركىستان. KAZINFORM - ساۋران اۋدانى نۇرتاس اۋىلىندا رامىزدەر اللەياسى اشىلدى. سونداي-اق، اۋىلداعى امانگەلدى اتىنداعى جالپى ورتا مەكتەبىن 20 جىل بۇرىن بىتىرگەن تۇلەكتەر 27 مەتر بيىكتىككە مەملەكەتتىك تۋ ورناتتى.
تۇركىستان وبلىسىندا مەكتەپتى 20-30 جىل بۇرىن بىتىرگەن تۇلەكتەر تۋعان اۋىلدارىنا «رامىزدەر» الاڭى مەن تۋتۇعىر سالىپ بەرۋدە.
وتكەن جىلى سوزاق اۋدانىنداعى تۇلەكتەردىڭ وسىنداي تارتۋى اۋىل تۇرعىندارىن قۋانىشقا بولەگەن بولاتىن. «سوزاق» مەكتەپ گيمنازياسىن 20 جىل بۇرىن بىتىرگەن تۇلەكتەر اۋىلعا كىرە- بەرىستەگى ساياباق الدىنا «رامىزدەر» الاڭىن سالىپ بەردى. 23 مەتر بيىكتىككە مەملەكەتتىك تۋ ورناتىلدى جانە ەلتاڭبا مەن قازاقستان كارتاسى بەينەلەنىپ، ءانۇران مەن اۋىل تاريحى جازىلعان ۇلكەن بەلگى قويىلدى. اللەيا اۋماعى اباتتاندىرىلىپ، شىرشا ەگىلدى.
سونىمەن قاتار، وتىرار اۋدانىنىڭ ەكى بىردەي اۋىلىندا دا يگى باستاما ىسكە استى. اتاپ ايتقاندا، بالتاكول جانە ماياقۇم اۋىلدارىنىڭ مەكتەپتى 20، 30 جىل بۇرىن بىتىرگەن تۇلەكتەرى ءوز قاراجاتىنا «رامىزدەر» الاڭىن سالىپ بەردى. جاقسى ءۇردىس بيىل دا جالعاسىن تاپتى. ساۋران اۋدانىنداعى مەكتەپ تۇلەكتەرى اۋىلدارىنا 2 تۋتۇعىر ورناتتى.
بۇگىندە جالپى وڭىردەگى تۋتۋعىر سانى 26 عا جەتتى. بيىل ماقتاارال اۋدانىندا دەمەۋشىلەردىڭ قولداۋىمەن تاعى دا 1 «رامىزدەر» الاڭى بوي كوتەرەدى دەپ جوسپارلانىپ وتىر.
اۆتور
قايرات زاينيشەۆ