تۇركيادا تۋريزم سالاسىنىڭ تابىسى تومەندەدى

تۇركيا ستاتيستيكا ينستيتۋتىنىڭ (TـİK) مالىمەتىنە سايكەس، ەسەپتى كەزەڭدە ەلدىڭ تۋريزمنەن تۇسكەن كىرىسى 15,865 ميلليارد ا ق ش دوللارى بولدى.

تۋريستىك ءتۇسىمنىڭ نەگىزگى بولىگى - 15,656 ميلليارد دوللار - شەتەلدىك تۋريستەر ەسەبىنەن قالىپتاستى. ال ترانزيتتىك جولاۋشىلاردان 209,5 ميلليون دوللار ءتۇستى. تۋريزمنەن تۇسكەن جالپى تابىستىڭ شامامەن %15,6- ىن شەتەلدە تۇراقتى تۇراتىن تۇركيا ازاماتتارى قامتاماسىز ەتتى.

ەكىنشى توقساندا تۇركياعا 15,58 ميلليون ادام كەلدى. بۇل وتكەن جىلدىڭ وسى كەزەڭىمەن سالىستىرعاندا %5,1- عا از. سوعان قاراماستان، ءبىر تۋريستىڭ ءبىر تۇنگە شاققانداعى ورتاشا شىعىنى 113 ا ق ش دوللارىنا دەيىن ءوستى.

ەلگە كەلگەندەردىڭ %71,3- ى دەمالۋ، ويىن-ساۋىق جانە مادەني ءىس-شارالارعا قاتىسۋ ماقساتىندا ساپارلاعان. تاعى %16,6- ى تۋىستارى مەن دوستارىنا قوناققا كەلگەن.

سونىمەن قاتار تۇركيا تۇرعىندارىنىڭ شەتەلگە ساپار شىعىندارى %7,4- عا ءوسىپ، 2,96 ميلليارد ا ق ش دوللارىنا جەتتى. شەتەلگە شىققان ازاماتتار سانى %16,5- عا ارتىپ، 3,43 ميلليون ادام.

تۇركيانىڭ قارجى جانە قازىنا ءمينيسترى مەحمەت شيمشەك گەوساياسي تاۋەكەلدەرگە قاراماستان، ەلدىڭ جىلدىق تۋريستىك تابىسى 65,2 ميلليارد ا ق ش دوللارى دەڭگەيىندە ساقتالىپ وتىرعانىن ايتتى. ونىڭ سوزىنشە، ۇكىمەت سالىقتىق جەڭىلدىكتەر، قارجىلاندىرۋ باعدارلامالارى جانە جىل بويعى تۋريزمدى دامىتۋ شارالارى ارقىلى سالانى قولداۋدى جالعاستىرىپ كەلەدى.

بۇعان دەيىن تۇركى مەملەكەتتەرى ۇيىمى كەڭىستىگىندە ەلدەر اراسىنداعى ساياحاتتى جەڭىلدەتۋگە جانە مادەني ىنتىماقتاستىقتى كۇشەيتۋگە باعىتتالعان جاڭا باستامالار ازىرلەنىپ جاتقانى حابارلانعان بولاتىن.