سالىپ الۋشى اۆتوسالوننان ساپاسىز كولىك ءۇشىن تولەنگەن 9,6 ميلليون تەڭگەسىن قايتارىپ الدى
ورال. KAZINFORM - باتىس قازاقستان وبلىسىندا ساۋدا قىزمەتىن رەتتەۋ سالاسىندا 144 اكىمشىلىك قۇقىق بۇزۋشىلىق دەرەگى تىركەلدى.
ب ق و بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتىنىڭ باسشىسى ەلميرا قيماتوۆانىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگتە ءمالىم ەتكەنىندەي، ق ر اكىمشىلىك قۇقىق بۇزۋشىلىق تۋرالى كودەكسىنىڭ 204-4-بابى 1 جانە 2-بولىگىنە سايكەس 132 ءىس قوزعالدى.
ەلميرا نۇر قىزىنىڭ سوزىنە قاراعاندا، الەۋمەتتىك ماڭىزى بار ازىق-تۇلىك تاۋارلارىن ساتۋ كەزىندە 15 پايىزدىق ساۋدا ۇستەمەسىن اسىرىپ جىبەرگەن ساتۋشىلارعا 83 ەسكەرتۋ بەرىلىپ، 49 ىنا ايىپپۇل سالىندى.
سونداي-اق باعانىڭ تەڭگەمەن كورسەتىلمەۋى جانە ىشكى نە سىرتقى ۆيترينالارداعى باعادان تاۋار باعاسىنىڭ اسىپ كەتۋىنە بايلانىستى كودەكستىڭ 193-بابى 4 جانە 5-بولىگىنە سايكەس 10 اكىمشىلىك ءىس قوزعالىپ، ايىپپۇلدار سالىندى.
ە. قيماتوۆانىڭ ايتۋىنشا، زاڭناماعا سايكەس دەپارتامەنت تۇتىنۋشىلار قۇقىعىن قورعاۋ بويىنشا ازاماتتىق ىستەرگە ءۇشىنشى تۇلعا رەتىندە قاتىسۋعا، سونداي-اق سوتقا تالاپ ارىز جولداۋعا قۇقىلى.
بيىل 18 تۇتىنۋشى جيھاز دايىنداۋ جانە ورناتۋ قىزمەتىن كورسەتەتىن «مودەرن پليۋس» ج ك-نە قاتىستى دەپارتامەنتكە شاعىم ءتۇسىردى. تۇتىنۋشىلار قاراجات اۋدارعانىمەن، جيھاز بەلگىلەنگەن مەرزىمدە جەتكىزىلمەگەن، اقشا قايتارىلماعان. وسىعان بايلانىستى دەپارتامەنت تۇتىنۋشىلاردىڭ مۇددەسىن قورعاۋ ماقساتىندا باتىس قازاقستان وبلىسىنىڭ مامانداندىرىلعان اۋدانارالىق ەكونوميكالىق سوتىنا تالاپ ارىز جولدادى. تالاپتار - تۇتىنۋشىلارمەن كەلىسىم-شارتتاردى بۇزۋ جانە كورسەتىلمەگەن قىزمەت ءۇشىن تولەنگەن اقشانى قايتارۋ. قازىرگى كەزدە ءىس سوت وندىرىسىندە قارالۋدا.
- دەپارتامەنتكە تاعى ءبىر تۇتىنۋشى جۇگىندى. ول 9 ميلليون 690 مىڭ تەڭگە كولەمىندە بانكتەن نەسيە راسىمدەپ، قالاداعى اۆتوسالونداردىڭ بىرىنەن كولىك العان. الايدا دوسىمەن بىرگە كولىكتى تەكسەرۋ كەزىندە رادياتوردا مايدىڭ اعىپ تۇرعانى، كاپوت بولتتارىنىڭ ۇستىندەگى بوياۋدىڭ كەتۋى سياقتى اقاۋلار انىقتالدى. قالىڭدىقتى ولشەيتىن قۇرىلعىنى قولدانعاندا، كولىكتىڭ وڭ جاقتاعى الدىڭعى ەسىگىنە قايتا بوياۋ جاسالعانى بەلگىلى بولدى. ول كولىكتىڭ بۇرىن جول اپاتىنا تۇسكەن بولۋى مۇمكىن دەپ كۇدىكتەنىپ، تاۋاردى قايتارۋعا شەشىم قابىلدادى. دەپارتامەنت شاعىم دايىنداۋدا كومەك كورسەتتى. تۇتىنۋشى شاعىمدى اۆتوسالونعا اپارىپ بەردى، بانككە دە نەسيە كەلىسىم-شارتىن بۇزۋ تۋرالى ءوتىنىش بەردى. ناتيجەسىندە اۆتوسالونمەن جاسالعان كەلىسىم- شارت بۇزىلىپ، بانك نەسيەسى جويىلدى جانە بارلىق اقشا قايتارىلدى، - دەدى دەپارتامەنت باسشىسى.