تەگەران يزرايلمەن قاقتىعىس كەزىندە قازا تاپقاندارمەن قوشتاستى

استانا. KAZINFORM - مىڭداعان يراندىق تەگەران كوشەلەرىنە تاياۋداعى قاقتىعىس كەزىندە قازا تاپقاندارمەن قوشتاسۋعا شىقتى، دەپ حابارلايدى Kazinform ءتىلشىسى.

يران استاناسىندا جوعارى لاۋازىمدى اسكەري شەنەۋنىكتەردى، يادرولىق عالىمداردى جانە بەيبىت تۇرعىنداردى ولتىرگەن يزرايلمەن 12 كۇندىك سوعىستا قازا تاپقانداردى ەسكە الۋعا ارنالعان ونداعان جىلدارداعى ەڭ ءىرى مەملەكەتتىك راسىمدەردىڭ ءبىرى باستالدى.

قوشتاسۋ ءراسىمى قازا تاپقان 60 ادامنىڭ، ونىڭ ىشىندە 16 يادرولىق عالىم مەن 10 جوعارى شەندى قولباسشىنىڭ قۇرمەتىنە ۇيىمداستىرىلدى. ولاردىڭ اراسىندا يران قارۋلى كۇشتەرى باس شتابىنىڭ باسشىسى گەنەرال موحامماد باگەري، يسلام ريەۆوليۋتسياسى ساقشىلار كورپۋسىنىڭ قولباسشىسى گەنەرال حوسەين سالامي جانە سىقك اەروعارىش كۇشتەرىنىڭ باسشىسى گەنەرال امير ءالي حادجيزادە بار. ۇشەۋى دە قاقتىعىستىڭ العاشقى كۇندەرىندە، ياعني 13-ماۋسىمدا يزرايل اۋە كۇشتەرىنىڭ سوققىسىنان قازا تاپتى.

قارا كيىم كيگەن مىڭداعان ادام تەگەراننىڭ ورتالىق كوشەلەرىندە كەزەككە تۇردى. جالاۋلار مەن مارقۇمداردىڭ پورترەتتەرى بار ادامدار باعانالارى ەنگەلاب الاڭىنان ازاديگە دەيىنگى داڭعىلداردى تولتىردى.

جەرلەۋ راسىمىنە يران ساياساتى مەن قورعانىس سالاسىنىڭ ماڭىزدى تۇلعالارى قاتىسۋدا. يسلام رەسپۋبليكاسىنىڭ پرەزيدەنتى ماسۋد پەزەشكياندى كۇزەتشىلەردىڭ سۇيەمەلدەۋىمەن جينالعان جۇرتتىڭ اراسىنان بايقادى. ءىس-شاراعا سونىمەن قاتار ەليتالىق «قۇدس» كۇشتەرىنىڭ قولباسشىسى يسمايل كااني جانە بۇرىن قاتەلەسىپ ءولدى دەپ جاريالانعان جوعارعى كوشباسشى ءالي حامەنەيدىڭ كەڭەسشىسى ءالي شامحاني قاتىسىپ جاتىر.

ءوز كەزەگىندە يران سىرتقى ىستەر ءمينيسترى ابباس اراحچي يراندىقتاردىڭ ەرجۇرەك مىنەزىنە، باتىل ارەكەتتەرىنە ءتانتى بولعانىن جەتكىزدى.

- يراندىقتار قان بەردى، ءبىراق نامىستى ەمەس. ولار وتباسىلارىنان ايىرىلدى، ءبىراق قادىر- قاسيەتىنەن ايىرىلعان جوق. ولار ەشقاشان بەرىلمەدى، - دەدى يران سىرتقى ىستەر ءمينيسترى.

كەيىن ول ءوزىنىڭ Instagram پاراقشاسىندا گەنەرال سالاميدىڭ تابىتىنىڭ قاسىندا تۇرعان سۋرەتىن جاريالادى.

- ۇلتتىق ماقتانىش - ەڭ قىمبات نارسە. بۇگىنگى تاڭدا ەكى يادرولىق دەرجاۆامەن بەتپە-بەت كەلە جاتقان يراندىقتار وزدەرىنىڭ ابىرويىن ساقتاپ قالدى جانە ەندى بولاشاققا اسقان تاباندىلىق پەن ابىرويمەن قارايدى، - دەدى ول.

ەنگەلاب الاڭىنداعى راسىمنەن كەيىن جەرلەۋ شەرۋى قالا ورتالىعىنان شامامەن 11 شاقىرىم جەردە ورنالاسقان ازادي الاڭىنا دەيىن جالعاستى. بۇقارالىق اقپارات قۇرالدارىنىڭ حابارلاۋىنشا، مارقۇمداردىڭ ءبىر بولىگى تەگەراندا جەرلەنسە، قالعاندارى تۋعان پروۆينتسيالارىندا جەرلەنەدى.

مەملەكەتتىك ورگاندار مۇنداي اۋقىمدى ءراسىمدى وتكىزۋدى سىرتقى قاۋىپ-قاتەر جاعدايىندا قوعامنىڭ بىرلىگى مەن بيلىكتىڭ زاڭدىلىعىن راستاۋ سيمۆولى رەتىندە قاراستىرادى.

كەيىنگى ونجىلدىقتاردا يران ولگەندەرمەن مۇنداي جاپپاي قوشتاسۋدى كورمەگەن. باقىلاۋشىلاردىڭ ايتۋىنشا، وسىنداي اۋقىمداعى ازا تۇتۋ شارالارى تەك يران-يراك سوعىسى كەزىندە عانا وتكىزىلگەن.

ەسكە سالساق، بۇعان دەيىن يزرايل يرانعا سوققى بەرىپ، اۋە كەڭىستىگىن جاۋىپ تاستاعان ەدى. ا ق ش مەملەكەتتىك حاتشىسى يزرايلدىڭ يرانعا قارسى جاساعان سوققىلارىن «ءبىرجاقتى ارەكەت» دەپ اتاپ، وعان اق ءۇيدىڭ قاتىسى جوق ەكەنىن مالىمدەدى.

سونداي-اق بۇعان دەيىن ترامپتىڭ يزرايل مەن يراندى ايىپتاعانىن جازعان بولاتىنبىز.