تەمىرجول كۇزەتىنىڭ 160 ميلليون تەڭگەنى جىمقىرعان باسشىلارى 7-8 جىل تۇرمەدە وتىرادى
استانا. KAZINFORM - استانا قالاسىنىڭ قىلمىستىق ىستەر جونىندەگى اۋدانارالىق سوتى «اسكەريلەندىرىلگەن تەمىرجول كۇزەتى» ج ش س باس ديرەكتورى ب. ناحانوۆقا، ونىڭ ورىنباسارى ا. مۇقاتايەۆاعا جانە مەنەدجەر ر. سيديكوۆقا قاتىستى ۇكىم شىعاردى.
ولار بەينەباقىلاۋ جابدىقتارىن ساتىپ الۋعا بولىنگەن 159,4 ميلليون تەڭگە اقشانى جىمقىرعانى ءۇشىن كىنالى دەپ تانىلدى.
سونداي-اق، ناحانوۆ اسكەريلەندىرىلگەن تەمىرجول كۇزەتىنىڭ جۇرگىزۋشىسى رەتىندە ادامدى جۇمىسقا ورنالاستىرۋ ارقىلى لاۋازىمدىق وكىلەتتىگىن اسىرا پايدالانعانى ءۇشىن سوتتالدى.
سوت ۇكىمىمەن ناحانوۆقا 8 جىل باس بوستاندىعىنان ايىرۋ جازاسى تاعايىندالدى.
سول ۇكىممەن مۇقاتايەۆا مەن سيديكوۆ 7 جىلعا باس بوستاندىعىنان ايىرىلدى.
اتالعان ادامدار مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى.
ۇكىم زاڭدى كۇشىنە ەنگەن جوق.
اۆتور
جانات قاپالبايەۆا