تاجىكستاننىڭ جوعارى وقۋ ورىندارى قازاقستاندىقتار ءۇشىن 100 گرانت ءبولدى

استانا. KAZINFORM - بۇل تۋرالى «حالىقارالىق باعدارلامالار ورتالىعى» ا ق باسپا ءسوز قىزمەتى حابارلادى.

ورتالىق تاراتقان مالىمەتتەرگە قاراعاندا، قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى 2000-جىلعى 13-ماۋسىمداعى ءبىلىم بەرۋ سالاسىنداعى ىنىتىماقتاستىق تۋرالى كەلىسىم شەڭبەرىندە تاجىكستان رەسپۋبليكاسىنىڭ جوعارى وقۋ ورىندارىندا وقۋ ءۇشىن 2025-2026 وقۋ جىلىنا مىنا باعدارلامالار بويىنشا گرانت ۇسىنىلدى:

باكالاۆريات - 70 ورىن؛

ماگيستراتۋرا - 20 ورىن؛

ۇزدىكسىز ينتەگراتسيالانعان مەديتسينالىق ءبىلىم بەرۋ باعدارلاماسى - 10 ورىن.

وقۋ ءتىلى - تاجىك/ورىس ءتىلى.

گرانت كەلەسى شىعىنداردى قامتيدى:

تەگىن وقۋ؛

مەملەكەتتىڭ ۇلتتىق زاڭناماسىنا سايكەس اي سايىن ستيپەنديا؛

مەديتسينالىق قىزمەت كورسەتۋ.

- ەسكەرتۋ! قالعان شىعىندى، ونىڭ ىشىندە كولىك جانە تۇرۋ شىعىندارىن گرانت يەگەرى ءوز قاراجاتى ەسەبىنەن تولەيدى.

قۇجاتتىڭ تولىق پاكەتى 2025-جىلعى 10-شىلدەدەن 5-تامىزعا دەيىن قابىلدانادى.

ءبىلىم بەرۋ سالاسىنداعى كەلىسىمدەر شەڭبەرىندە شەتەلدە وقۋعا ۇمىتكەرلەردى ىرىكتەۋ دەربەس اڭگىمەلەسۋ جولىمەن جۇزەگە اسىرىلادى.

حالىقارالىق شارتتار شەڭبەرىندە شەتەلدە وقۋعا ۇمىتكەرلەردى ىرىكتەۋ كەزىندە جەتىم بالالار مەن اتا-اناسىنىڭ قامقورلىعىنسىز قالعان بالالار؛ بالا كەزىنەن مۇگەدەكتەر مەن مۇگەدەك بالالار؛ كوپبالالى وتباسىنان شىققان بالالار؛ اۋىلدىق ەلدى مەكەندەردە سوڭعى 2 (ەكى) جىل تۇراتىن ۇمىتكەرلەر؛ شەتەلدىك جوعارى وقۋ ورىندارىنان شاقىرۋى بار ۇمىتكەرلەر باسىمدىققا يە.

قورىتىندى ىرىكتەۋدى قابىلداۋشى تاراپ وتكىزەدى.

وسىعان دەيىن قازاقستاندا كاسىپتىك ءبىلىم بەرۋ ۇيىمدارىنىڭ اقپاراتتىق كارتاسى جاسالىپ جاتقانى تۋرالى جازدىق.