سيفرلىق تەڭگە جەمقورلىققا قالاي توسقاۋىل بولادى - ۇلتتىق بانك باسشىسى

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ 100 ءىرى جوبانى سيفرلىق تەڭگەمەن قارجىلاندىرۋ سىبايلاس جەمقورلىققا قالاي توسقاۋىل بولا الاتىنىن ءتۇسىندىردى.

- سيفرلىق تەڭگەنى ەنگىزۋدەگى باستى ماقسات تا، ونى قولدانۋعا ەڭ ءتيىمدى ورتا دا مەملەكەتتىك قاراجات. بۇل اقشانى الدىن الا باعدارلامالاپ بارىپ شىعارامىز. ول باعدارلامادا سيفرلىق تەڭگەنى قولما-قول اقشاعا اينالدىرۋدىڭ شارتتارى بەكىتىلەدى. ول شارتتان باسقا ماقساتتارعا بۇل اقشانى قولدانۋ مۇمكىن ەمەس، - دەدى ول.

تيمۋر سۇلەيمەنوۆ قازىردىڭ وزىندە بىرنەشە ءىرى جوبا پيلوتتىق رەجيمدە سيفرلىق تەڭگەمەن قارجىلاندىرىلىپ جاتقانىن ايتتى.

- ول اقشانى نارىققا شىعارا المايسىڭ، وعان ۆاليۋتا ساتىپ الا المايسىڭ، شەتەلگە شىعارا دا المايسىڭ. مىسالى، تەمىر جول سالۋعا پايدالانىپ باستادىق. ول اقشاعا رەلس ساتىپ الۋىما بولادى. ودان باسقا ماقساتقا جۇمساي المايمىن. كەيدە بيۋدجەتتەن بولىنگەن اقشاعا قۇرىلىس ماتەريالىن ساتىپ الۋ كەرەك بولعانىمەن، باسقا ماقساتقا جۇمسالىپ كەتىپ جاتادى عوي. سيفرلىق تەڭگەمەن ونداي ىستەۋ مۇمكىن ەمەس، - دەدى ۇلتتىق بانك باسشىسى.

ەسكە سالساق، ولجاس بەكتەنوۆ 100 ءىرى جوبانى سيفرلىق تەڭگەگە كوشىرۋدى تاپسىردى.