پرەزيدەنتتىڭ ايتۋىنشا، سوڭعى ءۇش جىلدا سىبايلاس جەمقورلىققا قاتىستى مىڭداعان قۇقىق بۇزۋشىلىق انىقتالعان.
- تەك سوڭعى ءۇش جىلدىڭ ىشىندە، ياعني 2023 جانە 2025 -جىلدار ارالىعىندا 3168 سىبايلاس جەمقورلىق بويىنشا قۇقىق بۇزۋشىلىق انىقتالدى، سونىڭ ىشىندە 2165 قۇقىق بۇزۋشىلىقتى مەملەكەتتىك قىزمەتشىلەر جاساعان، ال قالعانىن باسقا دا تۇلعالار، اتاپ ايتقاندا، كۆازيمەملەكەتتىك سەكتور قىزمەتشىلەرى جاساعان. جالپى سوماسى - 248,2 ميلليارد تەڭگەدەن اسادى.
وسى جىلدىڭ ون ايى ىشىندە 751 سىبايلاس جەمقورلىققا قاتىستى قۇقىقبۇزۋشىلىق جاسالعان، سونىڭ 546-سىن - مەملەكەتتىك قىزمەتشىلەر، ال 205- ءىن وزگە دە تۇلعالار جاساعان، سونىڭ ىشىندە كۆازيمەملەكەتتىك سەكتور قىزمەتشىلەرى دە بار.
وسى ستاتيستيكادان كورىپ وتىرعانىمىزداي، ەلىمىزدەگى سىبايلاس جەمقورلىق احۋالى كۇردەلى بولىپ تۇر. ءبىراق ءبىز ەشنارسەنى دە جاسىرمايمىز، باسىن قۇمعا تىققان ستراۋستىڭ كەيپىنە تۇسپەيمىز. ءبىز وسى سالاداعى ماسەلەنىڭ ءبارىن اشىق ايتامىز، جەمقورلىقتى جويۋ ءۇشىن قابىلدانعان جانە قابىلداناتىن شارالار تۋرالى دا ەشنارسەنى جاسىرماي، بارلىعىن حالىققا اشىق كورسەتىپ وتىرامىز، - دەدى قاسىم-جومارت توقايەۆ.
سول سەبەپتى ءتۇرلى دەڭگەيدەگى باسشىلاردىڭ جىمقىرۋعا قاتىستى قۇقىق بۇزۋشىلىقتارىن ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى ءىس-قيمىل جونىندەگى قىزمەتى باس پروكۋراتۋرامەن بىرگە جەدەل جانە ءجىتى تەكسەرەدى.
- «وزىمىزدىكى» جانە «وزىمىزدىكى ەمەس»، ءتىپتى «بوتەن» دەپ بولۋگە مۇلدە جول بەرىلمەيدى. ويتكەنى كونستيتۋتسيادا زاڭ مەن سوت الدىندا ءبارى تەڭ ەكەنى انىق جازىلدى. ءبىز ءبارىمىز دە وسى زاڭعا باعىنۋىمىز كەرەك، - دەدى مەملەكەت باسشىسى.
ايتا كەتەيىك، بۇعان دەيىن 13-قاراشادا مەملەكەت باسشىسى قاسىم-جومارت توقايەۆتىڭ توراعالىعىمەن قاۋىپسىزدىك كەڭەسىنىڭ كولىك- لوگيستيكا سالاسىن دامىتۋ ماسەلەلەرى بويىنشا شۇعىل وتىرىسى وتەتىنى حابارلانعان بولاتىن.