بۇل تۋرالى پرەزيدەنت قاسىم-جومارت توقايەۆ ازيا ويىندارى جانە ازيا پاراويىندارىنىڭ جۇلدەگەرلەرىن ماراپاتتاۋ راسىمىندە ايتتى.
- باعدارلاما اياسىندا جاڭا سپورت نىساندارى مەن ينكليۋزيۆتى ورتالىقتار بوي كوتەرەدى. قازاقستاندا ءاربىر بالانىڭ سپورتپەن اينالىسۋعا مۇمكىندىگى بولۋى كەرەك. بۇل - الەۋمەتتىك ءمانى تەرەڭ مىندەت قانا ەمەس، وسى مىندەتتىڭ ساياسي ماعىناسى الدەقايدا ماڭىزدى. ەلىمىزدىڭ شالعاي اۋىلدارىندا بولاشاق چەمپيوندار، ياعني، جەڭىمپازدار ءوسىپ كەلە جاتىر. ولاردىڭ بارىنە بىردەي جاعداي جاسالۋعا ءتيىس. ادىلەتتى قازاقستان يدەياسىنىڭ تۇپكى ماقساتى دا - وسى،- دەدى مەملەكەت باسشىسى.
پرەزيدەنت سپورت سالاسى ءاردايىم مەملەكەتتىڭ باستى نازارىندا تۇراتىنىن ايتتى.
- بىلتىر «دەنە شىنىقتىرۋ جانە سپورت تۋرالى» زاڭعا ءبىرقاتار ماڭىزدى تۇزەتۋ ەنگىزىلدى. مەملەكەتتىك دەڭگەيدە باسىمدىق بەرىلەتىن سپورت تۇرلەرى ايقىندالدى. سوڭعى بەس جىلدا ەلىمىزدە سپورت سالاسىن دامىتۋعا 616 ميلليارد تەڭگەدەن استام قارجى جۇمسالدى. جالپى، قازىر وسىنداي ناقتى شارالار ءوز ناتيجەسىن بەرىپ جاتىر دەۋگە بولادى،- دەدى قاسىم-جومارت توقايەۆ.
ايتا كەتەيىك، اقوردادا پرەزيدەنت ازيا ويىندارى جانە ازيا پاراويىندارىنىڭ جەڭىمپازدارى مەن جۇلدەگەرلەرىن ماراپاتتادى.
جاپونيادا وتكەن XX جازعى ازيا ويىندارى اياقتالدى. قازاقستان قۇراماسى 84 مەدال (12 التىن، 24 كۇمىس جانە 48 قولا) ولجالاپ، 46 ەلدىڭ ىشىندە جالپى كوماندالىق ەسەپتە 8-ورىنعا تۇراقتادى.
ال ازيا پاراويىندارىندا قازاقستان 50 مەدال جەڭىپ الىپ، ۇزدىك وندىققا ەندى.