سۋدىڭ «قارا نارىعى»: جامبىلدا تىرشىلىك كوزىن ساۋداعا سالعاندارمەن باس پروكۋراتۋرا اينالىسادى

  استانا. KAZINFORM - سۋ رەسۋرستارى جانە يرريگاتسيا مينيسترلىگى جامبىل وبلىسىنىڭ سۋ شارۋاشىلىعى سالاسىنا جۇرگىزگەن اۋديت ماتەريالدارىن باس پروكۋراتۋراعا جولدادى.

وسىعان دەيىن سۋدىڭ «قارا نارىعىمەن» كۇرەسۋ جانە اشىقتىقتى قامتاماسىز ەتۋ ماقساتىندا مينيسترلىكتىڭ ىشكى اۋديت دەپارتامەنتى جامبىل وبلىسى بويىنشا «قازسۋشار» فيليالىنا تەكسەرىس جۇرگىزگەن بولاتىن.

ناتيجەسىندە فيليال ديرەكتورى مەن شۋ-تالاس باسسەين ينسپەكتسياسىنىڭ باسشىسى تارتىپتىك جاۋاپكەرشىلىككە تارتىلدى.

انىقتالعان زاڭبۇزۋشىلىقتاردى ودان ءارى قاراۋ ءۇشىن اۋديت ماتەريالدارى ق ر باس پروكۋراتۋراسىنا جىبەرىلدى.

ەستەرىڭىزگە سالا كەتەيىك، مينيسترلىك ماماندارى جامبىل وبلىسىندا جۇرگىزگەن اۋديت بارىسىندا سۋ رەسۋرستارىن زاڭسىز پايدالانۋدىڭ 10 عا جۋىق فاكتىسىن، سونداي- اق شارۋالارمەن سۋارمالى سۋ بەرۋ كەلىسىمشارتىن جاساۋ بارىسىندا زاڭبۇزۋشىلىقتارعا جول بەرگەنىن انىقتاعان بولاتىن.

«سۋدىڭ „قارا نارىعىمەن“، ياعني سۋ رەسۋرستارىن زاڭسىز پايدالانۋ فاكتىلەرىمەن كۇرەس جالعاسادى. زاڭدى بۇزعان بارلىق قۇقىق بۇزۋشىلار مەن باسشىلىق لاۋازىمداعى قىزمەتكەرلەر جاۋاپقا تارتىلادى. ءبىز سۋ رەسۋرستارىن پايدالانۋدى باقىلاۋدى كۇشەيتەمىز. ول ءۇشىن قولدانىستاعى زاڭناماعا وزگەرىس ەنگىزۋ ۇسىنىلىپ وتىر»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

وسىعان دەيىن جوعارى اۋديتورلىق پالاتا تەكسەرىسىنىڭ قورىتىندىسى بويىنشا «قازسۋشار» مەكەمەسىنىڭ باسشىلىق لاۋازىمداعى 5 قىزمەتكەرى جاۋاپقا تارتىلعان بولاتىن.