سۋ تاسقىنى: اقتوبەنىڭ نۇرا اۋىلىندا جاڭا ۇيلەردىڭ يەلەرى جەرەبە ارقىلى انىقتالدى
اقتوبە. KAZINFORM - اقتوبە وبلىسى نۇرا اۋىلىندا 63 ءۇي سالىنىپ جاتىر. مۇندا جەرەبە وتكىزىلىپ، جاڭا ۇيلەردىڭ قايسىسى كىمگە تيەسىلى ەكەنى انىقتالدى.
اقتوبە وبلىسى بويىنشا ەكپەتال اۋىلى تۇگەل اۋدان ورتالىعىنا كوشىرىلدى. ءسويتىپ ويىل اۋدانىنداعى ءبىر اۋىل جويىلدى. ال ىرعىز اۋدانىنداعى نۇرا اۋىلى تۇگەل سارىوبا جەرىنە كوشىرىلدى. قازىرگى كەزدە مۇندا 63 ءۇي سالىنىپ جاتىر. اكىمدىك قاي ءۇيدىڭ كيىمگە تيەسىلى ەكەنىن انىقتاۋ ءۇشىن جەرەبە وتكىزدى.
- نۇرا اۋىلىنىڭ تۇرعىندارى الدىن الا جەرەبە ارقىلى كىمگە قاي ءۇي تيەسىلى ەكەنىن انىقتاۋ جونىندە ءوز تاراپتارىنان ۇسىنىس بىلدىرگەن بولاتىن. اۋدانداعى «اراي» مادەنيەت ۇيىندە نۇرا اۋىلىنىڭ تۇرعىندارىن جيناپ، جەرەبە ءراسىمى ءوتتى. ناتيجەسىندە 63 تۇرعىننىڭ ۇيلەرى ناقتىلاندى. ەندى تۇرعىندار سالىنىپ جاتقان ءوز ۇيلەرىنىڭ قوراسىن سالۋعا كىرىسەدى. قازىرگى تاڭدا نۇرا اۋىلىندا 11 مەردىگەر جۇمىس ىستەپ جاتىر. 63 ءۇيدىڭ ىرگەتاسى قۇيىلىپ، قابىرعالارى قالاندى. قازىر توبەسى جابىلىپ جاتىر. جالپى قۇرىلىس جۇمىستارىنا 143 ادام تارتىلعان. سونىمەن بىرگە سىرتقى ەلەكتر جەلىلەرى مەن سۋ جەلىلەرىن جۇرگىزۋشى مەردىگەرلەر دە ءوز باعىتتارى بويىنشا جۇمىستار جۇرگىزۋدە، - دەپ حابارلادى ىرعىز اۋدانىنىڭ اكىمدىگى.
ىرعىز اۋدانىنىڭ اكىمى نۇرلان قىزبەرگەنوۆتىڭ ايتۋىنشا، اۋدان ورتالىعىندا 51، نۇرادا 63، مامىردا 6 ءۇي سالىنىپ جاتىر.
- نۇرا اۋىلىندا 60 ورىندىق مەكتەپ-بالاباقشا، مەديتسينالىق پۋنكت قۇرىلىسى ءجۇرىپ جاتىر. بايلانىس وپەراتورلار دا بار. تۇرعىنداردىڭ قورا سالىپ، قىسقا دايىندالعىسى كەلەتىنىن تۇسىنەمىز. ءبىراق قۇرىلىس ءجۇرىپ جاتقان جەردە اۋىر تەحنيكا كوپ، گاز، سۋ، جارىق تارتىلىپ جاتىر. سوندىقتان قۇرىلىس اياقتالعاننان كەيىن قورا سالۋعا كىرىسسەڭىزدەر دەپ سۇرايمىن،- دەدى ىرعىز اۋدانىنىڭ اكىمى نۇرلان قىزبەرگەنوۆ ءوز ۇندەۋىندە.
ەسكە سالساق، بيىل كوكتەمدە نۇرا اۋىلىن سۋ باستى. ونداعى بارلىق ۇيگە سۋ كىردى. جەرگىلىكتى اتقارۋشى ورگان مەن حالىق بىرىگىپ، اۋىلدى جاڭا جەرگە كوشىرۋگە شەشىم قابىلدادى.