ونىڭ سوزىنشە، مەملەكەت ەكونوميكامىزداعى ماڭىزدى تاپسىرىس بەرۋشى بولىپ وتىر.
- سوندىقتان شاعىن جانە ورتا بيزنەستى مەملەكەتتىك ورگاندار مەن كۆازيمەملەكەتتىك كومپانيالاردىڭ ساتىپ الۋلارىنا تارتۋ تاسىلدەرىن جەتىلدىرۋ قاجەت. ساتىپ الىناتىن تاۋارلار مەن قىزمەتتەردىڭ بەلگىلى ءبىر كولەمىن شاعىن جانە ورتا كاسىپورىندارعا رەزەرۆتە قالدىرۋعا بولادى. سونىمەن قاتار جەتكىزۋشىلەرگە قويىلاتىن تالاپتاردى جەڭىلدەتۋ كەرەك. كاسىپكەرلەر ءۇشىن تۇراقتى ءارى بولجامدى «ويىن ەرەجەلەرىن» قامتاماسىز ەتۋ اسا ماڭىزدى. مەملەكەتتىك باقىلاۋ جۇيەسى جەتكىلىكتى دارەجەدە ليبەرالدى بولعانىمەن، ايىپپۇلدار، جوسپاردان تىس تەكسەرۋلەر جانە شوتتاردى بۇعاتتاۋعا اكەپ سوعاتىن كامەرالدىق باقىلاۋ ارقىلى كاسىپورىنداردىڭ جۇمىسىنا ىقپال ەتۋ جالعاسىپ كەلەدى - دەدى پرەزيدەنت.
مەملەكەت باسشىسى مۇنداي ىقپالدى وڭ قۇبىلىس دەپ ايتۋعا بولمايتىنىن جەتكىزدى.
ماسەلەن، بيىلعى ءبىرىنشى جارتىجىلدىقتا جەكە كاسىپكەرلەر تاراپىنان انىقتالعان زاڭبۇزۋشىلىقتار سانى 34 پايىزعا ازايعان.
الايدا ايىپپۇلداردىڭ جالپى سوماسى شامامەن 11 پايىزعا وسكەن، ال جوسپاردان تىس تەكسەرۋلەر سانى ونداعان ەسە ارتقان.
سونىمەن بىرگە ىسكەرلىك بەلسەندىلىكتى تالداۋ بيزنەستىڭ قالىپتى جۇمىس ىستەۋى ءۇشىن وعان كەدەرگى كەلتىرمەۋدىڭ ءوزى جەتكىلىكتى ەكەنىن كورسەتەدى.
- وسى تۇرعىدان العاندا، 2020-2023-جىلدارى ميكرو جانە شاعىن بيزنەستى تەكسەرۋگە ەنگىزىلگەن موراتوريدىڭ تاجىريبەسى پايدالى. ونىڭ تيىمدىلىگى دالەلدەندى. قۇرىلتاي دەپۋتاتتارىنا ۇكىمەتپەن بىرلەسىپ، الدىڭعى ءموراتورييدىڭ بارلىق وڭ جانە تەرىس تۇستارىن ەسكەرە وتىرىپ، 2027-جىلعى 1-قاڭتاردان باستاپ تاعى دا ءۇش جىلدىق موراتوري ەنگىزۋدىڭ ورىندىلىعىن تالقىلاۋدى ۇسىنامىن. بۇل قادامدى باقىلاۋ-قاداعالاۋ جۇيەسىن قايتا جاڭعىرتۋعا جانە رەتتەۋدىڭ سيفرلىق مودەلىنە كوشۋگە مۇمكىندىك بەرەتىن ستراتەگيالىق ءۇزىلىس رەتىندە قاراستىرعان ءجون، - دەدى پرەزيدەنت.
ايتا كەتەيىك، بۇعان دەيىن توقايەۆ بيزنەسكە قولدان زاڭسىز توسقاۋىل جاساۋ - مەملەكەتكە قارسى جاسالعان قىلمىس دەگەن بولاتىن.