كەزدەسۋ بارىسىندا قازاقستاندا تولىق وندىرىستىك سيكل جولعا قويىلعان ماقتا-ماتا كلاستەرىن جۇزەگە اسىرۋ ماسەلەسى تالقىلاندى.
پرەزيدەنتكە جوبانىڭ يمپورتقا تاۋەلدىلىكتى ايتارلىقتاي ازايتىپ، ىشكى نارىقتى باسەكەگە قابىلەتتى وتاندىق ونىمدەرمەن قامتاماسىز ەتۋگە مۇمكىندىك بەرەتىنى جونىندە باياندالدى.
جاڭ شيحايدى قاسىم-جومارت توقايەۆقا بۇگىندە بىرنەشە نىسان، سونىڭ ىشىندە ەكى ماقتا وڭدەۋ زاۋىتى قولدانىسقا بەرىلگەنىن ايتتى.
تاياۋ جىلدارى سينتەتيكالىق ماتا ماتەريالدارىن، توقىما جانە كيىم وندىرەتىن نىسانداردى ىسكە قوسۋ جوسپارلانىپ وتىر.
جوبانى جۇزەگە اسىرۋ ارقىلى ماقتا ەگىستىگىن 52 گەكتارعا دەيىن ۇلعايتۋعا بولادى. ەگىن شارۋاشىلىعىنا سيفرلىق تەحنولوگيالار مەن تامشىلاتىپ سۋارۋ سەكىلدى يننوۆاتسيا پايدالانىلادى.
ماقتا-ماتا كلاستەرىنىڭ العاشقى كەزەڭىندە 360 ميلليون دوللارعا جۋىق تىكەلەي شەتەلدىك ينۆەستيتسيا تارتىلىپ، 4 مىڭنان اسا جۇمىس ورنى اشىلماق.
مەملەكەت باسشىسى كلاستەر ەلىمىزدىڭ وڭتۇستىك وڭىرىندە اگروونەركاسىپ كەشەنىن جانە جەڭىل ونەركاسىپتى دامىتۋ تۇرعىسىنان ماڭىزدى ەكەنىن اتاپ ءوتتى.
پرەزيدەنتتىڭ پىكىرىنشە، جەرگىلىكتى تۇرعىندار اراسىنان بىلىكتى مامان دايارلاۋ ىسىنە ءمان بەرۋ كەرەك.
قاسىم-جومارت توقايەۆ سۋ ۇنەمدەۋ تەحنولوگيالارىن كەڭىنەن پايدالانۋدىڭ وزەكتىلىگىنە نازار اۋداردى، سونداي-اق ماقتا ءوندىرىسىنىڭ شىعىنىن ەسكەرە وتىرىپ، اتالعان سالاعا «اقىلدى» سيفرلىق شەشىمدەر مەن جاساندى ينتەللەكتىنى ەنگىزۋدى قۇپتادى.
ايتا كەتەيىك، مەملەكەت باسشىسى قازاقستاننىڭ اگروونەركاسىپ كەشەنىن دامىتۋعا ايرىقشا ۇلەس قوسقانى ءۇشىن جاڭ شيحايدى II دارەجەلى «دوستىق» وردەنىمەن ماراپاتتادى.