قازىر قازاقستاندا 4 ميلليوننان استام وقۋشى بار، ياعني، ەلىمىزدىڭ ءاربىر بەسىنشى ازاماتى مەكتەپتە ءبىلىم الىپ جاتىر.
- وسى ماقساتپەن ءبىز بارشاعا بىردەي مۇمكىندىك بەرەتىن، ادىلەتتى، كۇشتى، تازا جانە وزىق قازاقستاندى قۇرۋ ءىسىن قولعا الدىق، اۋقىمدى رەفورمالاردى جۇزەگە اسىردىق. حالقىمىزدىڭ تەمىرقازىعى، ەلىمىزدى تاريحي ورلەۋ داۋىرىنە باستاعان نەگىزگى قۇجات - كونستيتۋتسيانى قابىلدادىق. كونستيتۋتسيادا تۇڭعىش رەت وقۋ-اعارتۋ جۇيەسىن دامىتۋعا ىقپال ەتەتىن ناقتى نورمالار كورىنىس تاپتى. اتاپ ايتقاندا، ادام كاپيتالىن، ءبىلىم-عىلىمدى جانە يننوۆاتسيانى دامىتۋ مەملەكەتتىڭ مىندەتى، ستراتەگيالىق باعىتى رەتىندە بەكىتىلدى. تۇپتەپ كەلگەندە، بۇل - زامان تالابى. سونىمەن قاتار ءبىز بيلىك جۇيەسىن تۇبەگەيلى جاڭعىرتتىق. ەلىمىزدە ءبىر پالاتالى قۇرىلتايدىڭ العاشقى سايلاۋى ءوتتى. ۇكىمەتتىڭ جاڭا قۇرامى جاساقتالدى. ۆيتسە-پرەزيدەنت تاعايىندالدى. جاڭا مەملەكەتتىك ورگان - قاۋىپسىزدىك كەڭەسىنىڭ اپپاراتى قۇرىلدى. جاقىندا قازاقستان حالىق كەڭەسى ءوز جۇمىسىن باستادى. وسىلايشا، ءبىز ءبىر ۇلت بولىپ ەلىمىزدىڭ دامۋ باعدارىن ايقىنداعان ماڭىزدى ءارى ىرگەلى جۇمىستى تابىستى اتقاردىق، - دەدى مەملەكەت باسشىسى.
پرەزيدەنتتىڭ پىكىرىنشە، وركەنيەتتى ءارى وزىق ەلدىڭ قۋاتى ونىڭ تابيعي بايلىعىمەن ەمەس، ەڭ الدىمەن، ادام كاپيتالىنىڭ ساپاسىمەن ولشەنەدى. مەملەكەتتىڭ الەمدەگى ورنى دا، ەكونوميكالىق الەۋەتى دە قوعامداعى ءبىلىم مەن عىلىمنىڭ دەڭگەيىنە تاۋەلدى.
- وزدەرىڭىز بىلەسىزدەر، ءبىز بۇل باعىتتا ناقتى شارالار قابىلداپ، بەلسەندى جۇمىس ىستەپ جاتىرمىز. ماسەلەن، سوڭعى جەتى جىلدا ەلىمىزدە 1 ميلليوننان استام وقۋشىعا ارنالعان 1342 مەكتەپ سالىندى. بيىل تاعى 101 مەكتەپ سالىنىپ جاتىر. «كەلەشەك مەكتەپتەرى» ۇلتتىق جوباسى اياسىندا ءبىلىم بەرۋ مەكەمەلەرىنىڭ جاڭا ستاندارتى قالىپتاستى. سونىڭ ارقاسىندا زاماناۋي ينفراقۇرىلىمى بار، بالالاردىڭ ساپالى ءبىلىم الىپ، دامۋىنا بارلىق جاعداي جاسالعان وقۋ وردالارى بوي كوتەرۋدە. بۇگىندە 460 مىڭ وقۋشىعا ارنالعان وسىنداي 217 مەكتەپ سالىندى. سول مەكتەپتەردىڭ 84 ءى، ياعني 40 پايىزعا جۋىعى اۋىلدىق جەردە ورنالاسقان. مەن ءوز سوزدەرىمدە ءاردايىم ايتىپ ءجۇرمىن: اۋىل مەكتەبى دە، قالا مەكتەبى دە بالالارعا بىردەي ساپالى ءبىلىم بەرەتىن زاماناۋي وقۋ مەكەمەسى بولۋى كەرەك. قازىرگى تاڭدا مەملەكەت جاساندى ينتەللەكت جۇيەسىنە نەگىزدەلگەن ارنايى ساباقتاردى ورتا مەكتەپتەرگە جاپپاي ەنگىزۋ باعدارلاماسىن ىسكە اسىرۋدا. بۇل - وتە ماڭىزدى جۇمىس. ۇكىمەت وسى ماسەلەگە باسا ءمان بەرۋگە ءتيىس. جالپى، ايماقتاردا مەكتەپ تاپشىلىعى ماسەلەسى بولماۋى كەرەك. ويتكەنى تاعى دا قايتالاپ ايتامىن، بۇل - مەملەكەتتىڭ بولاشاعىنا اسەر ەتەتىن وتە ماڭىزدى فاكتور. ۇكىمەت وسى ماسەلەنى دە ءاردايىم نازاردا ۇستاۋى قاجەت، - دەدى مەملەكەت باسشىسى.
ايتا كەتەيىك، پرەزيدەنت ۇستازدىڭ ءار ادامنىڭ ومىرىنەن ەرەكشە ورىن الاتىن تۇلعا ەكەنىن ايتتى.