- مەن قازا بولعان ءاربىر اسكەري قىزمەتشىنىڭ اتا-اناسىنا كوڭىل ايتىپ، ارنايى جەدەلحاتىمدى جولدادىم. قايتىس بولعان ازاماتتاردىڭ وتباسىلارىنا بارلىق قاجەتتى كومەك كورسەتىلەدى. ولاردىڭ ەشقايسىسى قولداۋسىز، كومەكسىز قالمايدى، - دەدى قاسىم-جومارت توقايەۆ.
پرەزيدەنتتىڭ ايتۋىنشا، بەيبىت كۇندە ساربازداردىڭ ءومىرىن جالماعان بۇل قايعىلى جاعدايعا ءبىرىنشى كەزەكتە وفيتسەرلەردىڭ، سونىڭ ىشىندە گەنەرالداردىڭ سالعىرتتىعى جانە كاسىبي بىلىكسىزدىگى سەبەپ بولدى. قاسىم-جومارت توقايەۆ قايعىلى وقيعانىڭ ءمان-جايىن عانا ەمەس، مۇنداي وقۋ-جاتتىعۋدى جوسپارلاۋعا نە تۇرتكى بولعانىن جانە قويىلعان مىندەتتىڭ قازىرگى قاۋىپ-قاتەرلەرگە قانشالىقتى ساي كەلەتىنىن انىقتاۋدى تالاپ ەتتى.
- قارۋلى كۇشتەر باسشىلىعى قوردالانعان تۇيتكىلدەردى جىلدار بويى شەشە الماي كەلەدى. بۇل ەلىمىزدىڭ قورعانىس قابىلەتىنە نۇقسان كەلتىرەدى. وتكەن قايعىلى وقيعالاردان ساباق المادىڭىزدار. اتالعان وقۋ-جاتتىعۋ جيىنىنىڭ ءمانى دە، ماقساتى دا تۇسىنىكسىز. ونى كىم ازىرلەپ، بەكىتتى؟ باس شتابتىڭ ءرولى قانداي؟ ۇيلەستىرۋ جۇمىستارىنا نەگە ءمان بەرمەگەن؟ نەلىكتەن وقۋ- اتتىعۋ جيىنىندا اسكەري-تەڭىز كۇشتەرىنىڭ باس قولباسشىسى بولماعان؟ جاۋاپسىزدىق، سالعىرتتىق، كوزبوياۋشىلىق بەلەڭ العان. جۇيەلى جۇمىس جوق. داعدارىس جاعدايىنداعى ءىس-قيمىل جوسپارى سىن كوتەرمەيدى. مۇنىڭ ءبارى - اسكەري ۆەدومستۆو باسشىلىعىنىڭ نەمقۇرايدىلىعىنىڭ سالدارى، - دەدى مەملەكەت باسشىسى.
ەسكە سالايىق، بۇعان دەيىن پرەزيدەنت داۋرەن قوسانوۆتى قورعانىس ءمينيسترى لاۋازىمىنان بوساتقانىن حابارلاعان ەدىك.
ونىڭ ورنىنا ايدوس مىرزاحمەتوۆ قورعانىس ءمينيسترى بولىپ تاعايىندالدى.