— قىمباتتى وتانداستار! بارشاڭىزدى ۇلتتىق مەرەكەمىز — رەسپۋبليكا كۇنىمەن قۇتتىقتايمىن! بۇل — مىڭجىلدىقتاردان تامىر تارتاتىن قازاق مەملەكەتتىلىگىنىڭ قايتا جاڭعىرۋىن ايشىقتايتىن قاستەرلى مەرەكە. ءبىز ەگەمەندىك جىلدارىندا تالاي سىن-قاتەردى ەڭسەرىپ، بيىك بەلەستەردى باعىندىردىق. وسىلايشا، ەلىمىزدىڭ ىرگەسىن بەكەمدەپ، ەلدىگىمىزدىڭ تۇعىرىن نىعايتا تۇستىك. قازاقستان تاۋەلسىزدىكتىڭ 35 جىلدىق مەجەسىنە ەكونوميكاسى قۋاتتى، قوعامى جاسامپاز، كۇللى الەم قاۋىمداستىعى قۇرمەتپەن قارايتىن، بەدەلى زور ءارى ىقپالدى ورتا دەرجاۆا، وركەنيەتتى مەملەكەت رەتىندە جەتىپ وتىر، — دەدى توقايەۆ.
مەملەكەت باسشىسىنىڭ سوزىنشە، بيىل ءبىز ۇلت جىلناماسىنىڭ جاڭا پاراعىن اشىپ، تاريحي ورلەۋ داۋىرىنە بەتبۇرىس جاسادىق.
الدىمىزدا تۇرعان ماقسات — بارشاعا ايقىن. ءبىز مىقتى مەملەكەتتىك ينستيتۋتتارى مەن ساپالى ادام كاپيتالى بار، جاھاندىق باسەكەگە قابىلەتتى، وزىق، دامىعان، جاسامپاز، زايىرلى ەل بولۋىمىز كەرەك. وسى ورايدا، كونستيتۋتسيامىزدىڭ زاڭدى كۇشىنە ەنۋى حالىقارالىق قوعامداستىقتىڭ نازارىن اۋدارعان، تاريحي ءمان-ماعىناسى اسا ەرەكشە وقيعا بولدى. كونستيتۋتسيا مەملەكەتتىك باسقارۋ جۇيەسىنىڭ تولىعىمەن جاڭارۋىنا، ەلىمىزدىڭ ساياسي، ەكونوميكالىق، مادەني جانە الەۋمەتتىك سالالارىندا تۇبەگەيلى وزگەرىستەر جاساۋعا ۇلكەن سەرپىن بەردى. ءبىز كونستيتۋتسيادا ايقىندالعان قۇندىلىقتارعا سۇيەنە وتىرىپ، ستراتەگيالىق باعدارىمىزدان اينىماي، مىندەتتى تۇردە العا قادام باسامىز، الدىمىزعا قويعان بارلىق مىندەتتەردى جۇزەگە اسىرامىز، — دەدى ول.
توقايەۆ قازىر ءبىز وزىق تەحنولوگيالار مەن يننوۆاتسيالاردى جۇيەلى دامىتىپ، جاساندى ينتەللەكتىنىڭ مۇمكىندىكتەرىن ەل يگىلىگىنە جاراتا باستاعانىمىزدى اتاپ ءوتتى.
— زاماناۋي ءوندىرىس ورىندارىن اشىپ، ينفراقۇرىلىمدى جاڭعىرتىپ، مەكتەپتەر، اۋرۋحانالار جانە باسقا دا الەۋمەتتىك نىسانداردى سالىپ جاتىرمىز. حالقىمىزدىڭ يگىلىگى ءۇشىن كوپتەگەن جوبانى ىسكە اسىرۋ جوسپارىمىزدا بار. ەڭ باستىسى، ءبىز الىسقا كوز تىگەتىن ۇلت رەتىندە جاسامپاز ماقساتتار مەن ۇلى مۇراتتار جولىندا ۇيىسىپ، جارقىن بولاشاققا زور سەنىممەن ۇمتىلامىز. بۇگىندە ءبىلىمپازدىق، ادال ەڭبەك، جوعارى جاۋاپكەرشىلىك جانە شىنايى وتانشىلدىق قاسيەتتەرى حالقىمىزدىڭ بولمىسىنا ءسىڭىپ، ومىرلىك داعدىسىنا اينالۋدا. ءبىز زاڭ مەن ءتارتىپ، تازالىق پەن قورشاعان ورتاعا قامقورلىق، بىرلىك پەن كەلىسىم قۇندىلىقتارىن كەڭ اۋقىمدا دارىپتەپ، قوعامدا جاڭا ەتيكا قالىپتاستىرۋ ءىسىن قولعا الدىق. وسىلايشا، ەگەمەندىگىمىزدىڭ تۇعىرىن كۇشەيتىپ، ادىلەتتى، قاۋىپسىز، وزىق ءارى تازا قازاقستاندى قۇرىپ جاتىرمىز. ەلىمىزدىڭ شاڭىراعى بيىك، ۇلتىمىزدىڭ رۋحى اسقاق بولسىن! كوك بايراعىمىز ءاردايىم بيىكتە جەلبىرەسىن!رەسپۋبليكا كۇنى قۇتتى بولسىن! — دەپ قۇتتىقتاۋىن جەتكىزدى پرەزيدەنت.
بۇعان دەيىن رەسپۋبليكا كۇنىنە وراي 129 ەڭبەك ارداگەرىنە مەملەكەتتىك ناگرادا تاپسىرىلاتىنىن جازعانبىز.
سونىمەن قاتار پرەزيدەنت جارلىعىمەن اكە جولىن جالعاعان مەتاللۋرگ «قازاقستاننىڭ ەڭبەك ەرى» اتانعانى بەلگىلى بولدى.