قاسىم-جومارت توقايەۆ جيىنعا قاتىسۋشىلار الدىندا سويلەگەن سوزىندە باۆاريانى تەحنولوگيالىق پروگرەسس پەن ونەركاسىپتىك جەتىستىكتەرى باي مادەني مۇراسىمەن، بەرىك داستۇرلەرىمەن جانە جاڭاشىلدىق رۋحىمەن ۇيلەسىم تاپقان بىرەگەي ءوڭىر دەپ اتادى.
- نەمىس بيزنەسى ەلىمىزدە مىقتى ساپاسىمەن، سەنىمدىلىگىمەن جانە تەحنولوگيالىق ارتىقشىلىعىمەن جوعارى باعالانادى. بۇگىندە ەكونوميكالىق بايلانىستاردى تەرەڭدەتۋگە بارلىق مۇمكىندىك بار. بۇل رەتتە ەۋروپانىڭ جەتەكشى ونەركاسىپتىك ايماقتارىنىڭ ءبىرى، ينجەنەريا مەن جوعارى تەحنولوگيانىڭ ورتالىعى رەتىندە دۇنيە ءجۇزى مويىنداعان باۆاريانىڭ الاتىن ورنى ەرەكشە. ءبىزدىڭ ازاماتتارىمىز ءۇشىن «گەرمانيادا جاسالعان» دەگەن بەلگى ءارقاشان ساپا مەن سەنىمدىلىك ءسينونيمى سانالادى. ءدال وسى سەبەپتى ميۋنحەنگە ارنايى كەلىپ، باۆاريانىڭ ساياسي باسشىلىعىمەن جانە ىسكەرلىك ورتا وكىلدەرىمەن تىكەلەي ديالوگ قۇرعاندى ءجون دەپ ۇيعاردىم، - دەدى پرەزيدەنت.
مەملەكەت باسشىسى باۆاريا گەرمانيانىڭ فەدەرالدىق جەرلەرى اراسىندا قازاقستاننىڭ باستى ساۋدا سەرىكتەستەرىنىڭ ءبىرى ەكەنىن ايتتى.
- قازاقستان بۇل ايماققا، نەگىزىنەن، مۇناي، فەرروقورىتپا، بولات، مىس، اليۋميني، بەيورگانيكالىق حيميالىق زاتتار، مايلى داقىلدار، بيداي جانە باسقا دا تاۋارلار ەكسپورتتايدى، - دەدى قاسىم-جومارت توقايەۆ.
ايتا كەتەيىك، باۆاريا بيزنەسى قازاقستانمەن ءوزارا ءتيىمدى كووپەراتسيانى دامىتۋعا قىزىعۋشىلىق تانىتتى.