ءوندىرىس كەشەنى ىسكە قوسىلعاندا جىلىنا 540 مىڭ توننادان استام دايىن ءونىم شىعارادى. جوبانىڭ تەحنولوگيالىق سەرىكتەسى - قىتايلىق CERI ينجينيرينگ كومپانياسى.
مەملەكەت باسشىسىنا باياندالعانداي، جاڭا سەح بەرىكتىگى جوعارى، ا600 جانە ا1000 ساناتتى بولات ارماتۋرا شىعارۋعا، سونداي-اق بۇرىشتار، شۆەللەرلەر جانە باسقا دا سۇرانىسقا يە مەتال ونىمدەرىنىڭ تۇرلەرىن كوبەيتۋگە مۇمكىندىك بەرەدى.
كەشەندە ساعاتىنا 100 تونناعا دەيىن مەتال وتكىزە الاتىن، ونىمدىلىگى جوعارى قىزدىرۋ پەشى بار.
جوبانى جۇزەگە اسىرۋ ناتيجەسىندە Qarmet سۇرىپتى پروكاتتى شىعارۋ كولەمىن ۇلعايتادى. ال بۇل ىشكى نارىقتىڭ يمپورتقا تاۋەلدىلىگىن ازايتىپ، كاسىپورىننىڭ قۇرىلىس سەگمەنتىندەگى، سونىڭ ىشىندە ا ە س قۇرىلىسىنداعى الەۋەتىن كەڭەيتەدى.
قازىرگى ۋاقىتتا نىساندا نەگىزگى تەحنولوگيالىق جابدىقتاردى مونتاجداۋ جانە قاجەتتى ينفراقۇرىلىمدى سالۋ جۇمىستارى جۇرگىزىلۋدە. سۇرىپتى پروكات تسەحىن جىل سوڭىنا دەيىن پايدالانۋعا بەرۋ جوسپارلانىپ وتىر.
Qarmet كومپانياسىنىڭ ينۆەستيتسيالىق باعدارلاماسى 3,5 ميلليارد دوللاردى قۇرايدى. مەتاللۋرگيا كومبيناتىندا 4 جاڭا جوبا، اتاپ ايتقاندا № 8، 9-كوكس باتارەيالارى، سۇرىپتى پروكات كەشەنى، مىرىشتاۋ جانە پوليمەرلى جابىن جەلىسى، قۇيۋ-يلەمدەۋ كەشەنىنىڭ قۇرىلىسى ىسكە اسىرىلىپ جاتىر.
كومپانيانىڭ ستراتەگيالىق ماقساتى - 2028 -جىلعا قاراي جىلىنا 5 ميلليون توننا بولات، 9 ميلليون توننا كومىر جانە 5 ميلليون توننا تەمىر رۋدالى كونسەنترات وندىرەتىن دەڭگەيگە جەتۋ. بۇدان بولەك، ءونىمنىڭ وزىندىك قۇنىن تومەندەتىپ، ەكولوگيالىق كورسەتكىشتەردى ارتتىرۋ جانە وتاندىق مەتال ونىمدەرىنىڭ باسەكەگە قابىلەتتىلىگىن كۇشەيتۋ مىندەتى تۇر.
ايتا كەتەلىك مەملەكەت باسشىسى Qarmet كونۆەرتەر سەحىنىڭ جۇمىسىمەن تانىسقان ەدى.