پرەزيدەنت ۇ ق ك- ءنىڭ جاڭا ءتوراعاسىنا ءبىرقاتار تاپسىرما بەردى

استانا. KAZINFORM - مەملەكەت باسشىسى قاسىم-جومارت توقايەۆ ۇلتتىق قاۋىپسىزدىك كوميتەتىنىڭ باسشىلىعىمەن جيىن وتكىزىپ، ۆەدومستۆونىڭ جاڭا ءتوراعاسى مارات يرمەنوۆتى تانىستىردى، دەپ حابارلادى اقوردا.

Фото: КНБ

مەملەكەت باسشىسى قاسىم-جومارت توقايەۆ ۇلتتىق قاۋىپسىزدىك كوميتەتىنىڭ جاڭا ءتوراعاسى مارات يرمەنوۆتى تانىستىرىپ، وعان ءبىرقاتار مىندەت جۇكتەدى.

پرەزيدەنت ۇلتتىق قاۋىپسىزدىك ورگاندارى جۇيەسىن رەفورمالاۋ، ۆەدومستۆو الدىنا قويىلعان ماقساتتارعا جەتۋدىڭ جاڭا تاسىلدەرىن ازىرلەۋ جانە قىزمەت تيىمدىلىگىن ارتتىرۋ قاجەتتىگىنە توقتالدى.

قاسىم-جومارت توقايەۆ «زاڭ مەن ءتارتىپ» قاعيداتىنىڭ ورىندالۋىنا، مەملەكەتتىڭ ەكونوميكا سالاسىنداعى ۇلتتىق مۇددەسىن قامتاماسىز ەتۋگە، سىبايلاس جەمقورلىققا جانە باسقا دا زاڭ بۇزۋشىلىقتارعا قارسى ءىس-قيمىلعا باسا نازار اۋدارۋ كەرەك ەكەنىن اتاپ ءوتتى.

سونىمەن قاتار پرەزيدەنت كادرلاردى ىرىكتەۋ ءتارتىبىن جەتىلدىرۋ، الەۋمەتتىك-ەكونوميكالىق تۇراقتىلىققا تونەتىن قاۋىپتىڭ الدىن الۋ، باسىمدىققا يە مەملەكەتتىك باعدارلامالاردى جۇزەگە اسىرۋ بارىسىندا جەمقورلىق تاۋەكەلدەرىن بولدىرماۋ جونىندەگى پروفيلاكتيكالىق شارالاردى كۇشەيتۋ تۋرالى تاپسىرما بەردى.

ايتا كەتەيىك، بۇعان دەيىن مەملەكەت باسشىسىنىڭ جارلىعىمەن مارات عاتاۇللا ۇلى يرمەنوۆ قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالىپ، بۇرىنعى اتقارعان لاۋازىمىنان بوساتىلعان بولاتىن.