پرەزيدەنت قازاقستان ۆولونتەرلىك قوزعالىستى دامىتۋعا ەرەكشە دەن قويىپ وتىرعانىن اتاپ ءوتتى. بۇعان ەلىمىزدىڭ 2026-جىلدى ب ۇ ۇ باس اسسامبلەياسى تاراپىنان قولداۋ تاپقان ورنىقتى دامۋ جولىنداعى حالىقارالىق ەرىكتىلەر جىلى دەپ جاريالاۋ جونىندەگى ۇسىنىسى دالەل بولا الادى.
- ءبىز ەرىكتىلىكتى مەملەكەتتىك ساياسات تۇرعىسىنان العاندا، شىنايى پاتريوتيزمنىڭ جانە جاستارعا كورسەتىلەتىن مەملەكەتتىك قولداۋدىڭ كورىنىسى رەتىندە قاراستىرامىز. مەنىڭ باستاماممەن جاڭا كونستيتۋتسياعا ۆولونتەرلىك قاعيدالارى ەنگىزىلدى. وندا ۆولونتەرلىك قىزمەتتى ىنتالاندىرۋ العاش رەت كونستيتۋتسيالىق دەڭگەيدە بەكىتىلدى، - دەدى پرەزيدەنت.
مەملەكەت باسشىسىنىڭ ايتۋىنشا، قازاقستاندا حالىقارالىق ەرىكتىلەر جىلى اياسىندا مىڭنان استام ءىس-شارا وتۋدە، ەلىمىزدە ۆولونتەرلەر سانى 300 مىڭعا جاقىندادى.
ۆولونتەرلىك قوزعالىستىڭ 2030-جىلعا دەيىنگى دامۋ تۇجىرىمداماسى ازىرلەنىپ جاتىر. ۆولونتەردىڭ سيفرلىق پاسپورتى ەنگىزىلىپ، مەملەكەتتىك قولداۋ تەتىكتەرى مەن وڭىرلىك ينفراقۇرىلىم جەتىلدىرىلۋدە.
تويلي كۋربانوۆ ب ۇ ۇ ەرىكتىلەر باعدارلاماسىمەن جوعارى دەڭگەيدە ىنتىماقتاستىق ورناعانىنا، سونداي-اق حالىقارالىق ەرىكتىلەر جىلى اياسىندا بىرلەسكەن جۇمىستاردىڭ جولعا قويىلعانىنا توقتالىپ، ۆولونتەرلىك قوزعالىستى ىلگەرىلەتۋگە نازار اۋدارعانى ءۇشىن قازاقستان پرەزيدەنتىنە العىس ايتتى
- قازاقستان - ۆولونتەرلىك قىزمەت سالاسىندا ۇلكەن بيىكتەردى باعىندىرعان بىرەگەي ەل. قازاقستاننىڭ ەرىكتىلەر جىلىن جاريالاۋ جونىندەگى باستاماسىن 60 تان اسا مەملەكەت قولدادى. سىزدەر جاھاندىق ترەند قالىپتاستىرىپ جاتىرسىزدار. «تازا قازاقستان» سياقتى قوعامدىق اكسيالارىڭىز ءبىرقاتار ەلدە ۇلكەن قىزىعۋشىلىق تۋدىرۋدا، - دەدى ب ۇ ۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى.
قاسىم-جومارت توقايەۆ قازاقستانداعى ۆولونتەرلىكتى دامىتۋعا ەلەۋلى ۇلەس قوسقانى ءۇشىن ب ۇ ۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلي كۋربانوۆتى Ⅱ دارەجەلى «دوستىق» وردەنىمەن ماراپاتتادى.
ايتا كەتەيىك، قاسىم-جومارت توقايەۆ سيرەك مەتالداردى بارلاۋ مەن وڭدەۋدى كۇشەيتۋدى تاپسىردى.