پرەزيدەنت: ازەربايجان مەن ارمەنيانىڭ ءبىتىمى شىعىس پەن باتىستى جاقىنداستىرادى

- ونداعان جىلدار بويعى قاقتىعىستاردان كەيىنگى تاراپتاردىڭ ىمىراعا كەلۋى جاڭا پەرسپەكتيۆاعا جول اشىپ، شىعىس پەن باتىس اراسىندا بايلانىس ورناتۋعا مۇمكىندىك بەردى. بەرىك ساياسي ەرىك-جىگەرى مەن زور ەكونوميكالىق الەۋەتى بار اوسشك ءىرى ترانسشەكارالىق جوبالاردى جۇزەگە اسىرۋعا ەلەۋلى ۇلەس قوسا الادى. سوندىقتان ا و س ش ك- ءنىڭ كولىك بايلانىسى ستراتەگياسىن بىرلەسە ازىرلەۋدى ۇسىنامىن. بۇل ستراتەگيا وڭىرىمىزدەگى «ءبىر بەلدەۋ، ءبىر جول»، سولتۇستىك - وڭتۇستىك حالىقارالىق كولىك ءدالىزى، ورتا ءدالىز جانە TRIPP باستاماسىن قوسا العاندا، نەگىزگى حالىقارالىق كولىك باعىتتارىنىڭ الەۋەتىن زەردەلەۋگە مۇمكىندىك بەرەدى، - دەدى پرەزيدەنت.

قاسىم-جومارت توقايەۆ قازىرگى تاڭدا ەنەرگەتيكا قاۋىپسىزدىگىنە قاتەر ءتونىپ تۇرعانىن ايتتى.

- ترانسشەكارالىق ەنەرگەتيكالىق ينفراقۇرىلىم قاقتىعىستاردىڭ زاردابىن جيى تارتىپ وتىر. سونىڭ سالدارىنان الەمدەگى ەنەرگەتيكا نارىعىندا تۇراقسىزدىق بەلەڭ الدى. بۇل بولجاۋسىز كەزەڭ داعدارىس ايماعىنان تىس ەلدەردىڭ دە ەكونوميكالىق ءوسىمىن تەجەۋدە. ءدال وسى سەبەپتى ەلىمىز سەرىكتەستىككە دەن قويىپ وتىر. قازاقستان، ازەربايجان جانە وزبەكستان جاسىل ەنەرگيا جەتكىزۋ جونىندەگى ستراتەگيالىق سەرىكتەستىك تۋرالى كەلىسىمگە قول قويدى. وسىلايشا، كاسپي جاسىل ەنەرگەتيكالىق ءدالىزىنىڭ نەگىزى قالاندى. بۇل ەلدەرىمىزدىڭ ەنەرگەتيكالىق جۇيەلەرىن ءوزارا بايلانىستىرىپ، قارا تەڭىز ارقىلى ەۋروپا نارىقتارىنا شىعۋعا جول اشادى، - دەدى مەملەكەت باسشىسى.