پرەزيدەنت كورنەكتى عالىم سەيىت قاسقاباسوۆتىڭ قازاسىنا كوڭىل ايتۋ جەدەلحاتىن جولدادى
17:07, 28 - ءساۋىر 2025
استانا. KAZINFORM - مەملەكەت باسشىسى كورنەكتى عالىم، فيلولوگيا عىلىمدارىنىڭ دوكتورى سەيىت قاسقاباسوۆتىڭ وتباسى مەن تۋعان- تۋىستارىنا كوڭىل ايتۋ جەدەلحاتىن جولدادى. بۇل تۋرالى اقوردا ءمالىم ەتتى.
قاسىم-جومارت توقايەۆ ءتىلتانۋشى جانە ادەبيەتتانۋشى، مەملەكەتتىك سىيلىقتىڭ يەگەرى سەيىت قاسقاباسوۆتىڭ قايتىس بولۋىنا بايلانىستى ونىڭ وتباسى مەن جاقىن-جۋىقتارىنا كوڭىل ايتتى.
- سەيىت اسقار ۇلى ۇلت رۋحانياتىن ۇلىقتاپ، قازاق اۋىز ادەبيەتىن تەرەڭ زەردەلەۋگە بار سانالى عۇمىرىن ارناعان زيالى تۇلعا ەدى. اسىرەسە، وتاندىق فولكلورتانۋعا ولشەۋسىز ۇلەس قوستى. ىرگەلى ەڭبەكتەر جازىپ، ۇلاعاتتى ۇستاز رەتىندە كوپتەگەن شاكىرت تاربيەلەدى. ونەگەلى ءومىر ءسۇرىپ، سوڭىنا رۋحاني مول مۇرا قالدىرعان سەيىت اسقار ۇلىنىڭ جارقىن بەينەسى ۇمىتىلمايدى، - دەپ جازىلعان جەدەلحاتتا.