پرەزيدەنت: استىق جيناۋ ناۋقانىن ويداعىداي جۇزەگە اسىرساق، ەكسپورتتىق الەۋەتىمىز دە مىقتى بولادى
استانا. KAZINFORM - مەملەكەت باسشىسى اقمولا وبلىسىنىڭ زەرەندى اۋدانىندا ايماق شارۋالارىمەن ەگىن جيناۋ ناۋقانىنا ارنالعان كەڭەس وتكىزدى، دەپ حابارلايدى اقوردانىڭ باسپا ءسوز قىزمەتى.
ءىس-شاراعا قوستاناي، پاۆلودار جانە سولتۇستىك قازاقستان وبلىسىنىڭ ديقاندارى بەينەبايلانىس رەجيمىندە قاتىستى.
پرەزيدەنت اقمولا وبلىسىنا ەگىن جيناۋ ناۋقانىنىڭ بارىسىمەن تانىسۋ ءۇشىن ارنايى كەلگەنىن ايتتى.
- ەگىس القابىنداعى جۇمىستاردى ۋاقتىلى اياقتاپ، استىقتى دەر كەزىندە جيناپ الۋ قاجەت. ەلىمىزدەگى ازىق- تۇلىك قاۋىپسىزدىگى، ىشكى نارىقتىڭ تۇراقتىلىعى وسى جۇمىسقا تىكەلەي بايلانىستى. استىق جيناۋ ناۋقانىن ويداعىداي جۇزەگە اسىرساق، ەكسپورتتىق الەۋەتىمىز دە مىقتى بولماق، ياعني شەتەلگە مول ءونىم شىعارا الامىز. بىلتىر ەلىمىزدە اۋىل شارۋاشىلىعى سالاسى ءۇشىن تابىستى جىل بولدى. شارۋالار تاباندى ەڭبەك ەتىپ، استىق جيناۋدان رەكوردتىق كورسەتكىشكە قول جەتكىزدى. وسىنىڭ ءبارى اگروتەحنولوگيانى دۇرىس قولدانۋدىڭ ناتيجەسى دەۋگە بولادى. سونىڭ ارقاسىندا اۋىل شارۋاشىلىعى بويىنشا ءونىم كولەمىنىڭ ءوسىمى باسقا سالالارعا قاراعاندا اناعۇرلىم ارتىق بولدى. بيىلعى 8 ايدا اتقارىلعان جۇمىستاردىڭ ناتيجەسى جامان ەمەس. ءوندىرىستىڭ تەحنولوگيالىق الەۋەتىن ارتتىرۋ ءۇشىن قولعا الىنعان شارالار تيىمدىلىگىن كورسەتىپ جاتىر، - دەدى قاسىم- جومارت توقايەۆ.
مەملەكەت باسشىسىنىڭ تاپسىرماسىمەن بيىل اۋىل شارۋاشىلىعىنا جەڭىلدەتىلگەن نەسيە بەرۋ ءۇشىن 1 تريلليون تەڭگە ءبولىندى
پرەزيدەنت ەسەلى ەڭبەكتەرى ءۇشىن ەلىمىزدىڭ ديقاندارىنا ريزاشىلىعىن ءبىلدىردى.
- جىل سايىن ەگىن جيناۋ ناۋقانىندا سىزدەردىڭ كاسىبي بىلىكتەرىڭىز، تاباندىلىقتارىڭىز جانە پاتريوتتىق قاسيەتتەرىڭىز سىنالادى. اۋىل شارۋاشىلىعى ەڭبەككەرلەرى بۇل سىننان سۇرىنبەي وتەدى. سىزدەر جاي- كۇي تاڭداماي، تابيعات توسىن مىنەز تانىتسا دا جۇمىس ىستەپ، جوعارى ناتيجەگە قول جەتكىزىپ جۇرسىزدەر. ماڭداي تەرلەرىڭىز ارقىلى ازىق- تۇلىك قاۋىپسىزدىگىن نىعايتۋعا، ەكونوميكانى دامىتۋعا جانە اۋىلداعى تۇرمىستى جاقسارتۋعا وراسان زور ۇلەس قوسىپ كەلەسىزدەر. مەملەكەت ديقانداردى قولداۋ ءۇشىن بۇرىن- سوڭدى بولماعان شارالاردى قولعا الىپ جاتىر. اتاپ ايتقاندا، بيىل مەنىڭ تاپسىرماممەن اۋىل شارۋاشىلىعىنا جەڭىلدەتىلگەن نەسيە بەرۋ ءۇشىن 1 تريلليون تەڭگە ءبولىندى. بۇل - رەكوردتىق كورسەتكىش. قازىردىڭ وزىندە مەملەكەتتىڭ جۇيەلى قولداۋ شارالارى ناتيجە بەرە باستادى. اگروتەحنولوگيانى قولدانۋ جوعارى دەڭگەيگە جەتىپ، ونىمدىلىك ارتتى. بۇعان دەيىن اۋىل شارۋاشىلىعىنىڭ جالپى ءونىم كولەمىن ەكى ەسە ۇلعايتۋدى تاپسىرعان ەدىم. بۇل باعىتتا اۋقىمدى جۇمىس جۇرگىزىلىپ جاتىر. ونىڭ قارقىنىن تومەندەتۋگە بولمايدى، - دەدى پرەزيدەنت.
پرەزيدەنت: «ەگىستىكتى ءارتاراپتاندىرۋدى جالعاستىرۋ كەرەك»
قاسىم-جومارت توقايەۆ مەملەكەتتىڭ قولداۋ تەتىكتەرىن ءتيىمدى پايدالانۋ قاجەت ەكەنىن اتاپ ءوتتى. مەملەكەت باسشىسى كەلەسى جىلعى ەگىس ناۋقانىندا جەڭىلدەتىلگەن قارجىلاندىرۋ باعدارلاماسىن ەرتە باستان قولعا الۋ ماڭىزدى دەپ سانايدى.
- پايداسى كوپ ءارى تيىمدىلىگى جوعارى داقىلداردى وسىرۋگە باسىمدىق بەرە وتىرىپ، ەگىستىكتى ءارتاراپتاندىرۋدى جالعاستىرۋ كەرەك. بۇل ەگىن شارۋاشىلىعىنداعى ءونىم كولەمىن ۇلعايتىپ، مول تابىس تابۋعا مۇمكىندىك بەرەدى. ۇكىمەت پەن اكىمدەر ەگىن جيناۋ كەزىندە شارۋالاردى جانار-جاعارمايمەن ۇزدىكسىز قامتاماسىز ەتىپ، قارجى مەن قاجەتتى تەحنيكانى ۋاقتىلى الۋىنا جاعداي جاساۋى قاجەت. كۇن رايىنا قاراماستان، ەگىندى مۇمكىندىگىنشە شىعىنسىز جيناپ العان ءجون، - دەدى مەملەكەت باسشىسى.
قاسىم-جومارت ەگىن شارۋاشىلىعىن دامىتۋداعى باسىم مىندەتتەردى اتادى.
پرەزيدەنت جينالعان ءونىمدى تيىسىنشە ساقتاۋدى ماڭىزدى مىندەتتىڭ ءبىرى دەپ سانايدى. ءارتۇرلى داقىلداردى ءوسىرۋدىڭ جوسپارداعى كولەمى مەن ءار داقىلعا جەكە قويما قاجەت ەكەنىن ەسكەرسەك، مۇنداي ورىنداردىڭ تاپشىلىعى بايقالادى.
- زاماناۋي ەليەۆاتورلاردى سالۋعا جانە ولاردى ۇستاپ تۇرۋعا قوماقتى ينۆەستيتسيا قاجەت ەكەنى انىق. سوندىقتان ەليەۆاتورلاردى جاڭعىرتۋ ءۇشىن جەڭىلدەتىلگەن قارجىلاندىرۋدىڭ ارنايى باعدارلاماسىن ىسكە قوسۋ كەرەك. ساپالى تۇقىم دايىنداۋعا باسا نازار اۋدارعان ءجون. بۇدان بولەك، وتاندىق نارىقتى وزىمىزدە شىعارىلعان تۇقىممەن قامتاماسىز ەتۋدىڭ ناقتى قادامدارى كەرەك. بىلتىردان باستاپ جەتىلدىرىلگەن مينەرالدى تىڭايتقىشتاردى سۋبسيديالاۋ تەتىگى تيىمدىلىگىن كورسەتتى. اۋىل شارۋاشىلىعى مينيسترلىگىنىڭ الدىندا تۇقىم ءوندىرىسى بويىنشا مەملەكەتتىك قولداۋدىڭ بالامالى شارالارىن ەنگىزۋ مىندەتى تۇر. جالپى، ەگىن شارۋاشىلىعىندا جاقسى ناتيجەگە قول جەتكىزگەنىمىزدى اتاپ وتكەن دۇرىس. بۇل اۋىل شارۋاشىلىعىنىڭ ارالاس سالالارىنا وڭ اسەر ەتىپ وتىر، - دەدى قاسىم-جومارت توقايەۆ.
مەملەكەت باسشىسى اۋىل شارۋاشىلىعىنا سيفرلىق تەحنولوگيانى تەزدەتىپ ەنگىزۋدى تاپسىردى
سونىمەن قاتار پرەزيدەنت مال شارۋاشىلىعىنىڭ الەۋەتىن تولىق تانىتۋعا شاقىردى.
- جىل سوڭىنا دەيىن مال شارۋاشىلىعىن دامىتۋ باعدارلاماسى ازىرلەنەدى. بۇل قۇجات ۇزاق مەرزىمگە جەڭىلدەتىلگەن قاراجات الۋعا مۇمكىندىك بەرەدى. ءبىز تەك جاپپاي سيفرلاندىرۋ ارقىلى ەكونوميكانىڭ بارلىق سالاسىندا اشىقتىق پەن تيىمدىلىكتى قامتاماسىز ەتە الامىز. مەن بۇل ماسەلەگە جولداۋدا جان-جاقتى توقتالدىم. اۋىل شارۋاشىلىعىنا سيفرلىق تەحنولوگيانى تەزدەتىپ ەنگىزۋ كەرەك. ەگىن جانە مال شارۋاشىلىعىنداعى ۇدەرىستەردى تولىق قاداعالاپ وتىرۋ ءۇشىن سيفرلىق تاسىلدەردى قولدانۋ قاجەت. بۇل جۇمىستى ІТ- بيزنەسپەن بىرلەسە وتىرىپ اتقارعان ءجون، - دەدى پرەزيدەنت.
قاسىم-جومارت توقايەۆ اۋىل شارۋاشىلىعىن دامىتۋعا بيۋدجەتتەن قوماقتى قاراجات ءبولىنىپ جاتقانىنا توقتالدى.
- دەمەك ىستەلىپ جاتقان ءاربىر جۇمىستىڭ، ءاربىر شارانىڭ ناقتى ناتيجەسى بولۋعا ءتيىس. ءبىر سوزبەن، اۋىل شارۋاشىلىعىنا وڭ ىقپال ەتۋى كەرەك. مەملەكەت ادال جۇمىس ىستەيتىن ديقاندارعا ءاردايىم قولداۋ كورسەتەدى. اۋىل شارۋاشىلىعىنىڭ جاي-كۇيى مەنىڭ ەرەكشە باقىلاۋىمدا، بۇل سالاعا باسا ءمان بەرەمىن. «جۇمىلا كوتەرگەن جۇك جەڭىل» دەيدى ءبىزدىڭ حالقىمىز. سوندىقتان بىرلەسە وتىرىپ، وسى ماڭىزدى ناۋقاندى ۋاقىتىندا جانە تابىستى اياقتايمىز دەپ سەنەمىن، - دەدى مەملەكەت باسشىسى.
وسىعان دەيىن ەلىمىزدە اۋىل شارۋاشىلىعى ەڭبەككەرلەرىنىڭ ەكىنشى فورۋمى وتەتىنىن حابارلادىق.