ەۋروپالىق كوميسسيا ءتورايىمى سۋ تاسقىنىنان زارداپ شەككەن ەلدەرگە 10 ميلليارد ەۋرو بولۋگە ۋادە بەردى
استانا. KAZINFORM - ەۋروپالىق كوميسسيا ءتورايىمى ۋرسۋلا فون دەر ليايەن «بوريس» تسيكلونىنان زارداپ شەككەن مۇشە مەملەكەتتەردى قولداۋ ءۇشىن 10 ميلليارد ەۋرو بولۋگە كەلىستى.
بۇل تۋرالى ول پولشانىڭ ۆروتسلاۆ قالاسىنا ساپارى كەزىندە ايتتى.
ورتالىق جانە شىعىس ەۋروپادا سوڭعى كۇندەرى «بوريس» تسيكلونىنان جاۋعان نوسەر جاڭبىر سۋ تاسقىنىنا اكەلدى. پولشانىڭ ەڭ ءىرى قالالارىنىڭ ءبىرى ۆروتسلاۆ تا تابيعات اپاتىنا تاپ بولدى. پولشا، چەحيا، اۋستريا جانە سلوۆاكيا ۇكىمەتتەرىنىڭ باسشىلارى وسى قالادا ۋ. ليايەنمەن كەزدەسىپ، ەۋروپالىق كوميسسيانىڭ كومەگىن تالقىلادى. كوميسسيا پرەزيدەنتى كەيىن بىرلەسكەن باسپا ءسوز ءماسليحاتىندا ەلدەردىڭ قارجىلىق قولداۋدى تەز الۋى ماڭىزدى ەكەنىن مالىمدەدى.
«سىزگە ماكسيمالدى يكەمدىلىك پەن جىلدامدىق قاجەت. ەرەكشە ۋاقىت ەرەكشە شارالاردى تالاپ ەتەدى»، - دەدى ۋ. ليايەن.
«بوريس» تسيكلونى بارلىعى 24 ادامنىڭ ءومىرىن قيدى: پولشادا 7، رۋمىنيادا 7، اۋستريادا 5 جانە چەحيادا 5 ادام قازا تاپتى. ClimaMeter باستاماسىنىڭ ءبىر بولىگى رەتىندە بىرگە جۇمىس ىستەيتىن زەرتتەۋشىلەر العاشقى تالداۋلارىندا وتكەن عاسىردىڭ ەكىنشى جارتىسىنداعى سالىستىرمالى ەپيزودتارمەن سالىستىرعاندا جاۋىن-شاشىن 20 پايىز كوپ بولعانىن جازدى. كليماتتىڭ انتروپوگەندىك وزگەرۋىنە بايلانىستى مۇنداي توتەنشە جاڭبىر وقيعالارى كۇشەيىپ، جيىلەپ بارادى.
بۇعان كليماتتىڭ وزگەرۋىنىڭ ەكسترەمالدى اۋا رايى وقيعالارىنىڭ قارقىندىلىعى مەن ىقتيمالدىعىنا قالاي اسەر ەتەتىنىن زەرتتەۋ ءۇشىن اۋا رايى باقىلاۋلارى مەن كليمات ۇلگىلەرىن قولداناتىن World Weather Attribution (WWA) عالىمدارىنىڭ زەرتتەۋلەرى دالەل.
بۇعان دەيىن حابارلانعانداي، ورتالىق ەۋروپادا تولاسسىز جاۋعان جاڭبىر سۋ تاسقىنىنا سەبەپ بولدى. تولاسسىز جاۋعان جاڭبىردان پولشانىڭ بىرنەشە مۋنيتسيپاليتەتى سۋ استىندا قالدى. زارداپ شەككەندەر بار، پولشانىڭ وڭتۇستىك- باتىسىنداعى كلودزكو اۋدانىندا 1600 ادام ەۆاكۋاتسيالاندى. بيالا-گلۋحولاسكا وزەنى ارناسىنان اسىپ، گلۋحولازا قالاسىن سۋ باستى. قالا مەرى كومەككە شاقىردى.
پولشا پرەمەر-ءمينيسترى دونالد تۋسك «بوريس» تسيكلونى سالدارىنان بولعان سۋ تاسقىنىنا بايلانىستى تابيعي اپات رەجيمىن ەنگىزۋ تۋرالى ەلدىڭ مينيسترلەر كەڭەسىنىڭ قاۋلىسىن دايىنداۋدى تاپسىردى.
سونداي-اق رۋمىنيا، اۋستريا جانە چەحيادا سۋ تاسقىنىنان زارداپ شەككەندەر تۋرالى اقپارات بار.