- وسى ايتۋلى كۇندە ءبىز سولتۇستىك قازاقستان وبلىسىنىڭ شال اقىن اۋدانىنان كەلگەن مەحانيزاتور سەرگەي نيكولايەۆيچ پۋستىلنيكوۆكە لايىقتى قۇرمەت كورسەتەمىز. ول وتىز جىلدان بەرى اۋىل شارۋاشىلىعى سالاسىندا جەمىستى جۇمىس ىستەپ، جيعان تاجىريبەسىن جاس بۋىنعا ۇيرەتىپ كەلەدى. ادال ەڭبەگى مەن تولايىم تابىسى ءۇشىن سەرگەي نيكولايەۆيچ پۋستىلنيكوۆ Ⅲ دارەجەلى «ەڭبەك داڭقى» وردەنىمەن ماراپاتتالادى. ءبىز ۇلت ساۋلىعىن نىعايتۋ جانە زياتكەر ۇرپاق تاربيەلەۋ ىسىنە باسا ءمان بەرىپ وتىرمىز. ۇستازدار مەن دارىگەرلەر قاۋىمىنا جان-جاقتى قولداۋ كورسەتۋ جانە ولاردىڭ ەڭبەگىنە زور قۇرمەتپەن قاراۋ - ماڭىزدى مىندەت. بۇگىن اعا مەيىربيكە انار راحمانبەك قىزى ءابدىقۇلوۆاعا جانە ۇلاعاتتى ۇستاز ءساليما يبرايىم قىزى جۇمامۇراتوۆاعا «شاپاعات» مەدالى تابىستالادى. قوعامدىق كەلىسىم - ەگەمەندىگىمىزدىڭ مىزعىماس كەپىلى. بۇگىن ىرىستى ىنتىماعىمىزدى نىعايتۋ جولىندا جەمىستى ەڭبەك ەتىپ جۇرگەن ءبىر توپ ازاماتقا «ەل بىرلىگى» وردەنى تابىستالادى. سونىمەن بىرگە بۇگىن مەملەكەتىمىزدى كوركەيتۋگە بەلسەنە اتسالىسقان، ادال ەڭبەگىمەن كوپكە ۇلگى بولعان 2 مىڭنان استام ازامات ماراپاتتالادى. سونىڭ ىشىندە 270 كە جۋىق ءبىلىم-عىلىم، دەنساۋلىق ساقتاۋ سالاسىنىڭ قىزمەتكەرىنە، 473 جۇمىسشى ماماندىعى وكىلدەرىنە جانە 129 ەڭبەك ارداگەرىنە، سونداي-اق، 200 دەن استام شاعىن جانە ورتا بيزنەس وكىلىنە مەملەكەتتىك ناگرادا تاپسىرىلادى. بارىڭىزگە قۇتتى بولسىن! - دەدى قاسىم-جومارت توقايەۆ.
مەملەكەت باسشىسى اتاپ وتكەندەي، ەلىمىزدىڭ ابىرويىن اسىرىپ جۇرگەن ەڭبەك ادامدارىنا قۇرمەت كورسەتۋ - مەملەكەتتىك ساياساتىمىزدىڭ وزەگى ەكەنىن ايتتى.
- مەن رەسپۋبليكا كۇنى قارساڭىندا سىزدەرگە جانە بارشا وتانداستارىمىزعا شىنايى ريزاشىلىعىمدى بىلدىرەمىن. مەملەكەتتىگىمىزدىڭ مىزعىماس تۇعىرى ماڭگى بولسىن! قاستەرلى وتانىمىز - قازاقستان ءوسىپ-وركەندەي بەرسىن! - دەپ تۇيىندەدى پرەزيدەنت.
بۇعان دەيىن التىنبەك قورازبايەۆقا «وتان» وردەنى، تالعات مۇسابايەۆقا حالىق ءارتىسى اتاعى بەرىلەتىنىن جازدىق.