رۋبيو: يزرايلدىڭ يرانعا جاساعان سوققىلارىنا ا ق ش-تىڭ ەش قاتىسى جوق

استانا. KAZINFORM - ا ق ش مەملەكەتتىك حاتشىسى يزرايلدىڭ يرانعا قارسى جاساعان سوققىلارىن «ءبىرجاقتى ارەكەت» دەپ اتاپ، وعان اق ءۇيدىڭ قاتىسى جوق ەكەنىن مالىمدەدى. ماركو رۋبيو سونداي-اق يراندى ايماقتاعى امەريكالىق كۇشتەرگە شابۋىل جاساماۋعا شاقىردى، دەپ جازدى DW.

- بۇگىن كەشكە يزرايل يرانعا قارسى ءبىرجاقتى ارەكەت جاسادى. ءبىز بۇل سوققىلارعا قاتىسپايمىز، جانە ءبىزدىڭ باستى باسىمدىعىمىز - ايماقتاعى امەريكالىق اسكەريلەردىڭ قاۋىپسىزدىگىن قامتاماسىز ەتۋ، - دەلىنگەن رۋبيو مالىمدەمەسىندە.
ا ق ش مەملەكەتتىك حاتشىسىنىڭ ايتۋىنشا، يزرايل ۆاشينگتونعا بۇل ارەكەتتەرىن «ءوزىن-ءوزى قورعاۋ ماقساتىندا جاسالعان قاجەتتى شارا» رەتىندە تۇسىندىرگەن.

يزرايل يرانعا قارسى وپەراتسيا جۇرگىزبەك

يزرايلدىڭ اسكەري-اۋە كۇشتەرى 13-ماۋسىمعا قاراعان ءتۇنى يرانعا قارسى اۋقىمدى اسكەري وپەراتسيانى باستاعان. بۇل وپەراتسيا تەگەراننىڭ يادرولىق باعدارلاماسىنا قارسى باعىتتالعان. The Times of Israel باسىلىمىنىڭ مالىمەتىنشە، يزرايل قورعانىس ارمياسى (ساحال) يراننىڭ بىرنەشە كۇن ىشىندە 15 يادرولىق بومبا جاساۋعا جەتەتىن بايىتىلعان ۋرانى بار ەكەنىن جانە بۇل «قاۋىپتىڭ الدىن الۋ ءۇشىن شارا قولدانۋعا ءماجبۇر بولعانىن» مالىمدەدى.

ساحال- دىڭ حابارلاۋىنشا، يرانداعى ونداعان اسكەري جانە يادرولىق نىسانعا سوققى جاسالعان.

يزرايل پرەمەر-ءمينيسترى بينيامين نەتانياحۋ:

- ءبىز يراننىڭ يادرولىق وتىندى بايىتۋ باعدارلاماسىنىڭ وزەگىنە سوققى جاسادىق. سونداي-اق، بالليستيكالىق زىمىران باعدارلاماسىنىڭ باستى ەلەمەنتتەرىنە دە سوققى بەردىك، - دەدى.
سول ۋاقىتتا يزرايلدە توتەنشە جاعداي جاريالاندى. يزرايلدىڭ قورعانىس ءمينيسترى يسراەل كاتس:

- جاقىن ارادا يزرايل مەملەكەتىنە جانە ونىڭ بەيبىت حالقىنا زىمىران جانە درون شابۋىلدارى جاسالۋى مۇمكىن، - دەپ مالىمدەدى.
ەسكە سالا كەتەيىك، يزرايل يرانعا سوققى بەرىپ، اۋە كەڭىستىگىن جاۋىپ تاستاعانىن جازعان ەدىك.

تاياۋ شىعىستاعى جاعدايدىڭ ۇشىعۋىنا بايلانىستى ەلشىلىك يزرايلدەگى قازاقستان ازاماتتارىنا ۇندەۋ جاسادى.