- قازىر قازاقستاندا بىرنەشە اۋەجايدىڭ قۇرىلىسى قاتار جۇرگىزىلىپ جاتىر. مۇنداي نىسانداردى ءبىر مەزەتتە سالۋ تاجىريبەسى ەل تاريحىندا بۇرىن-سوڭدى بولماعان. ارقالىقتاعى اۋەجايدى قالپىنا كەلتىرۋ جۇمىسى اياقتالدى، تاياۋدا زايسان، كاتونقاراعاي، كەندىرلى اۋەجايلارى ىسكە قوسىلادى. كەلەسى جىلى وسى سالاداعى الەمدىك ءىرى كومپانيالاردىڭ ءبىرىن تارتا وتىرىپ، استانادا جاڭا اۋەجايدىڭ قۇرىلىسىن باستايمىز، - دەدى ول.
سونىمەن بىرگە، پرەزيدەنت ەۋرازيانىڭ نەگىزگى كولىك حابى رەتىندەگى ورنىن نىعايتۋ ءۇشىن قازاقستاننىڭ الدىندا ءبىرقاتار ماڭىزدى مىندەت بار ەكەنىن اتاپ ءوتتى.
- ەڭ الدىمەن، حالىقارالىق باعىتتاردى قوسا العاندا، كولىك سالاسىن تولىق سيفرلاندىرۋ قاجەت. جاساندى ينتەللەكت داۋىرىندە جاھاندىق ترانزيت اعىندارىن قاعاز جۇك قۇجاتتارى ارقىلى باسقارۋ - اقىلعا قونىمسىز. بۇل - تىعىرىققا تىرەيتىن جول، - دەدى ول.
قازاقستان ەۋرازيانىڭ جەتەكشى لوگيستيكالىق ورتالىعىنا اينالۋى ءتيىس
- الەمدىك لوگيستيكا اۋقىمدى ترانسفورماتسيا مەن جەدەل دامۋ كەزەڭىنە قادام باستى. تەڭىز جولدارىنىڭ وسال تۇستارى قۇرلىقتاعى كولىك دالىزدەرىنىڭ ستراتەگيالىق ماڭىزىن ارتتىردى. قازاقستان وسى تاريحي مۇمكىندىكتى پايدالانىپ، ەۋرازيانىڭ جەتەكشى لوگيستيكالىق ورتالىعىنا اينالۋى ءتيىس. قازىردىڭ وزىندە قىتايدان ەۋروپا قۇرلىعىنا باعىتتالعان جۇك تاسىمالىنىڭ شامامەن 85 پايىزى ەلىمىزدىڭ اۋماعى ارقىلى وتەدى، - دەدى پرەزيدەنت.
الايدا مەملەكەت باسشىسىنىڭ پايىمىنشا، قازىرگى قولايلى جاعدايعا قاناعاتتانۋ بولاشاقتا باسەكەلەستەردەن كەيىن قالۋعا اكەلۋى مۇمكىن.
- قازىردەن باستاپ حالىقارالىق جۇك اعىندارىن تولىققاندى ۇيىمداستىرۋشى رولىنە كوشۋ قاجەت. وتاندىق لوگيستيكالىق وپەراتورلاردى دامىتۋعا، جۇكتەردى شوعىرلاندىرۋ جانە تاراتۋ ورتالىقتارىن قۇرۋعا ەرەكشە باسىمدىق بەرىلۋگە ءتيىس. سونداي-اق كولىك توراپتارىنىڭ اينالاسىندا جاڭا ءوندىرىس ورىندارى مەن ساۋدا الاڭدارىن قالىپتاستىرۋ ماڭىزدى، - دەدى قاسىم-جومارت توقايەۆ.