قىزىلوردادا پوليتسيا قىزمەتكەرىنە دورەكىلىك كورسەتكەن جاسوسپىرىمگە قاتىستى قىلمىستىق ءىس قوزعالدى
قىزىلوردا. KAZINFORM - الەۋمەتتىك جەلىدە جاسوسپىرىمدەردىڭ پوليسيا قىزمەتكەرىنە دورەكىلىك كورسەتكەن ۆيدەوسى تارادى. ۆيدەو Instagram الەۋمەتتىك جەلىسىندەگى Livenews.kz پاراقشاسىندا جاريالاندى. قىزىلوردا وبلىستىق پوليتسياسى بۇل جاعداي وبلىس اۋماعىندا تۇسىرىلگەنىن مالىمدەدى.
- بۇگىن، 10-ماۋسىم كۇنى تاڭعى ساعات 5 جارىم شاماسىندا وبلىس ورتالىعىنداعى اۋدانداردىڭ بىرىندە پوليتسيا قىزمەتكەرلەرى تىنىشتىقتى بۇزۋ تۋرالى حابارلاما بويىنشا بارعان. اتالعان قۇقىقبۇزۋشىلىق بويىنشا جاسوسپىرىمدەر ۇستالىپ، بارلىعى اكىمشىلىك جاۋاپكەرشىلىككە، ونىڭ ىشىندە تۇنگى ۋاقىتتا زاڭدى وكىلىنسىز كوشەدە جۇرگەندەرى ءۇشىن دە جاۋاپكەرشىلىككە تارتىلدى. جاسوسپىرىمدەردىڭ بىرىنە قاتىستى بيلىك وكىلىن قورلاۋ دەرەگى بويىنشا قىلمىستىق ءىس قوزعالدى. سونداي-اق جاسوسپىرىمدەردىڭ اتا- انالارى كامەلەتكە تولماعان بالانى تاربيەلەۋ جونىندەگى مىندەتتەرىن ورىنداماعانى ءۇشىن اكىمشىلىك جاۋاپكەرشىلىككە تارتىلدى. بارلىق دەرەك بويىنشا ءتيىستى شارالار قابىلدانادى، - دەلىنگەن حابارلامادا.
پوليسيا دەپارتامەنتى زاڭ تالاپتارىن ساقتاۋ جاسى مەن مارتەبەسىنە قاراماستان ءاربىر ادامنىڭ مىندەتى ەكەنىن ەسكە سالدى.
- قۇقىقتىق ءتارتىپتى قامتاماسىز ەتەتىن قىزمەتكەرلەرگە قۇرمەت كورسەتپەۋ زاڭدى قۇرمەتتەمەۋمەن بىردەي، - دەپ ەسكەرتتى ۆەدومستۆو.
بۇعان دەيىن ءبىز Instagram الەۋمەتتىك جەلىسىندە قىزىلوردا قالاسىندا ءجۇرىپ كەلە جاتقان كولىكتە ەرسى قىلىق كورسەتىپ ترەند تۇسىرگەن جاستاردىڭ ۆيدەوسى تاراعانىن، وعان دا وبلىستىق پوليتسيا دەپارتامەنتى تۇسىنىكتەمە بەرگەنىن حابارلاعان ەدىك.