قىز ۇزاتۋ تويىنداعى جاپپاي ۋلانۋ: پاۆلودار پوليتسياسى قىلمىستىق ءىس قوزعادى
پاۆلودار. KAZINFORM - پاۆلوداردا قىز ۇزاتۋ تويىنداعى تاماقتان جاپپاي ۋلانۋ وقيعاسىنا قاتىستى پوليتسيا قىلمىستىق ءىس قوزعادى. مەيرامحانا سانيتارلىق ەرەجەلەر مەن گيگيەنالىق نورماتيۆتەردى ساقتاماعان دەلىنىپ وتىر.
پاۆلودار قالاسىنىڭ پروكۋراتۋراسى سانيتارلىق دارىگەرلەر مەيرامحاناعا بارىپ، ەپيدەميولوگيالىق تەكسەرۋ جۇرگىزگەندەرىن حابارلادى. كاسىپكەرلىك نىسانىنىڭ يەسىنە كەمشىلىكتەردى جويۋ تۋرالى ۇيعارىم بەرىلگەن. ال تويدا داستارحانعا قويىلعان تاماق ونىمدەرى بويىنشا زەرتحانالىق زەرتتەۋ ناتيجەلەرى قىلمىستىق ءىستى اشۋعا نەگىز بولعان.
- قالالىق پوليتسيا باسقارماسىنىڭ ورتالىق ءبولىمى مەيرامحاناعا قاتىستى قىلمىستىق كودەكستىڭ 304-بابى، 1-بولىگى بويىنشا سوتقا دەيىنگى تەرگەپ-تەكسەرۋدى باستادى. قازىرگى ۋاقىتتا تەرگەۋ ءىس-شارالارى جۇرگىزىلىپ، جابىرلەنۋشىلەردەن جاۋاپ الىنىپ جاتىر. ءتيىستى ساراپتامالار تاعايىنداۋلار تۋرالى ماسەلە شەشىلىپ جاتىر، - دەپ حابارلادى پاۆلودار قالاسىنىڭ پروكۋراتۋراسىنان.
ەسكە سالا كەتەيىك، پاۆلوداردا قىز ۇزاتۋ داستارحانىنان كەيىن 33 ادام ۋلاندى.
كەيىن مەيرامحانا رۇقساتسىز جۇمىس ىستەگەنى انىقتالدى.