قىتايلىق روبوتتار اۆتوكولىكتى ءبىر مينۋتتا قۇراستىرادى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ستانبۇلعا وتە كوپ تۋريست كەلدى - TRT
تۇركيا ەكونوميكاسى ءوستى. تۇركيا ستاتيستيكا مەكەمەسى بيىلعى جىلدىڭ ءبىرىنشى توقسانىنداعى (قاڭتار- ناۋرىز كەزەڭى) ەل ىشىندەگى تازا ۇلتتىق كىرىسى ناتيجەلەرىن جاريالادى. سايكەسىنشە، تازا ۇلتتىق كىرىس 2024 -جىلدىڭ ءبىرىنشى توقسانىندا وتكەن جىلدىڭ سايكەس توقسانىمەن سالىستىرعاندا 5,7 پايىزعا ءوستى، دەپ حابارلايدى تۇركيا راديو تەلەۆيزيا پورتالى.
اتالعان باسىلىمنىڭ كەلتىرگەن مالىمەتىنە سۇيەنسەك، 2024 -جىلدىڭ ءبىرىنشى توقسانىندا وتكەن جىلمەن سالىستىرعاندا قۇرىلىس 11,1 پايىزعا، اقپارات جانە بايلانىس قىزمەتى 5,5 پايىزعا، ونەركاسىپ 4,9 پايىزعا، اۋىل شارۋاشىلىعى 4,6 پايىزعا، جىلجىمايتىن مۇلىكپەن اينالىسۋ 2,5 پايىزعا، قارجى ساقتاندىرۋ قىزمەتى 2 پايىزعا ءوستى.
سونداي-اق وسى اپتادا «TRT» باسىلىمىندا «ستانبۇلعا وتە كوپ تۋريست كەلدى» دەگەن تاقىرىپتاعى اقپارات جارىق كوردى.
تۇركيالىق ب ا ق-تىڭ دەرەگىنشە، الەمدەگى ەڭ كوپ تۋريست كەلەتىن قالالاردىڭ ءبىرى ستانبۇل 2024 -جىلدىڭ العاشقى 4 ايىندا كەلۋشىلەر رەكوردىن جاڭارتتى.
مادەنيەت جانە تۋريزم مينيسترلىگىنەن جاسالعان مالىمدەمەگە قاراعاندا ستانبۇل قاڭتار، اقپان، ناۋرىز جانە ءساۋىر ايلارىندا 5 ميلليون 244 مىڭ 936 شەتەلدىك قوناقتى قابىلداعان.
ستانبۇلعا كەلگەن شەتەلدىكتەردىڭ سانى وتكەن جىلدىڭ سايكەس كەزەڭىمەن سالىستىرعاندا 9,94 پايىز ارتتى.
ءساۋىر ايىندا وتكەن جىلدىڭ سايكەس ايىمەن سالىستىرعاندا 14,60 پايىز ارتىپ 1 ميلليون 478 مىڭ 218 شەتەلدىك قوناقتى قابىلداعان ستاگبۇل تۇركيا تۋريزمىنىڭ لوكوموتيۆى بولدى.
اتاپ ايتقاندا، ءساۋىر ايىندا ستانبۇلعا ەڭ كوپ تۋريست رەسەي، گەرمانيا، يران، ا ق ش قاتارلى ەلدەردەن كەلگەن.
قىتايلىق روبوتتار ءبىر كولىكتى شامامەن ءبىر مينۋتتا قۇراستىرادى - «حالىق گازەتى»
Chongqing Changan Automobile كومپانياسى ليانجيان زاۋىتىنىڭ يكەمدى وندىرىستىك جەلىسىندە روبوتتار ءوز مىندەتتەرىن ىجداعاتپەن ورىنداپ جاتىر. دانەكەرلەۋ ءوندىرىسىنىڭ جەلىسى ءبىر ۋاقىتتا ءتورت ءتۇرلى ۇلگىدەگى كولىكتى شىعارا الادى، دەپ حابارلايدى قىتايدىڭ «حالىق گازەتى».
قىتايلىق باسىلىمنىڭ كەلتىرگەن دەرەكتەرىنە سۇيەنسەك، بۇل «سيفرلىق ينتەللەكت» زاۋىتى اۆتوماتتاندىرۋدىڭ، سيفرلاندىرۋدىڭ جانە ينتەللەكتۋالدى جۇمىستىڭ جوعارى دەڭگەيىن جۇزەگە اسىرادى. ولار ءبىر اۆتوموبيلدى شامامەن ءبىر مينۋت ىشىندە قۇراستىرادى ەكەن.
سونىمەن قاتار وسى اپتادا «حالىق گازەتى» باسىلىمىندا «1 ادام ءبىر ۋاقىتتا 12 كولىكتى جۇرگىزە الادى دەگەن راس پا؟» دەگەن تاقىرىپتاعى اقپارات جارىق كورگەن بولاتىن.
اتالعان باسىلىمنىڭ دەرەگىنشە، پورت ايماعىندا ورنالاسقان سمارت-كوللەكتسيالىق جۇك كولىكتەرى كابينادا ەشكىم جوق بولسادا ولار ەمىن-ەركىن، رەتپەن قاتىناپ ءجۇر.
«تۋرا ءجۇرىڭىز، بۇرىلىڭىز، توقتاڭىز، جول بەرىڭىز... نينبونىڭ جوۋشان پورتىنىڭ مەيشان پورت اۋماعىندا 62 سمارت-كوللەكتسيالىق جۇك كولىكتەرى پورت ايماعىندا ورنالاسقان، ولار ەمىن-ەركىن، رەتپەن قاتىناپ ءجۇر، ال كابينادا ەشكىم جوق. بۇلاردىڭ «جۇرگىزۋشىلەرى» قايدا كەتتى؟ «حالىق گازەتىنىڭ» تىلشىلەرىمەن بىرگە «دامىپ جاتقان قىتاي» جەجيانعا سۇقبات توبىنا ىلەسىپ، سمارت-كوللەكسيالىق جۇك كولىكتەرى قالاي جۇرگىزۋشىسىز ءجۇرىپ جاتقانىن كورىڭىزدەر!»، - دەپ جازادى قىتايلىق باسىلىم.
يران پرەزيدەنتتىك سايلاۋىنا ۇمىتكەرلەردى تىركەۋ جالعاسىپ جاتىر - Parstoday
يرانداعى پرەزيدەنتتىك سايلاۋدىڭ 14-مەرزىمىنە ۇمىتكەرلەردى تىركەۋ وتكەن بەيسەنبى تاڭەرتەڭ ەلدىڭ سايلاۋ شتابىندا باستالدى.
14-پرەزيدەنتتىك مەرزىمىنەن بۇرىن سايلاۋى يران پرەزيدەنتى سەيەد يبراحيم رايسي تىكۇشاق اپاتى سالدارىنان ءشاھيد بولعاننان كەيىن ماۋسىمنىڭ 28 ى جۇما كۇنى وتەدى. ۇمىتكەرلەردىڭ 30-مامىردان باستاپ 5 كۇن بويى تىركەلۋ مۇمكىندىگى بار.
بۇل تۋرالى يراننىڭ «Parstoday» اقپارات اگەنتتىگى دە حابارلادى.
اتالعان باسىلىمنىڭ كەلتىرگەن مالىمەتىنە سۇيەنسەك، يراننىڭ ىشكى ىستەر ءمينيسترى احماد ۆاحيديدىڭ بۇيرىعىمەن پرەزيدەنتتىك ون ءتورتىنشى مەرزىمگە سايلاۋ ناۋقانى باستالعان.
«14-پرەزيدەنتتىك سايلاۋعا تىركەلۋدىڭ ءبىرىنشى كۇنى 5 ادام جانە ەكىنشى كۇنى 4 ادام تىركەلدى. ەكى كۇندە سايلاۋالدى شتابىندا 9 ادام رەسمي تىركەلسە، بۇگىن 3 ادامدى قوسقاندا 12 ادام سايلاۋالدى شتابىندا تىركەلگەنى راستالدى»، - دەپ جازادى يراندىق ب ا ق.
وسى اپتادا «Parstoday» - دە «كيپاريس كولەڭكەسىندە» يراندىق انيماتسيا يسپاندىق ماراپاتتاردى جەڭىپ العاننان كەيىن ەندى وسكارعا ۇمىتكەرلەر تىزىمىندە» دەگەن اقپارات جاريالاندى.
ايتا كەتەيىك، ىشكى جانە حالىقارالىق فەستيۆالدەردەن ونداعان حالىقارالىق ماراپاتتارعا يە بولعان بۇل يراندىق انيماتسيا جاراقاتتان كەيىنگى كۇيزەلىستەن زارداپ شەگەتىن كاپيتان تۋرالى.
«Parstoday»-دىڭ مالىمەتىنشە، «كيپاريس كولەڭكەسىندە» يراندىق انيماتسيا 19-يسپاندىق «انيمايو» انيماتسيالىق فەستيۆالىنىڭ باس جۇلدەسى مەن ۇزدىك 2D انيماتسيا جۇلدەسىن الىپ، 2025 -جىلعى وسكار بايقاۋىنا ۇمىتكەرلەر تىزىمىنە تىكەلەي ەنگەن.
يراندىق بالالاردىڭ زياتكەرلىك دامۋى ورتالىعىنىڭ قوعاممەن بايلانىس جانە حالىقارالىق ىستەر جونىندەگى باس ءبولىمىنىڭ مالىمەتىنشە، بۇل ۇلكەن جەتىستىك تۋرالى حاباردى الەم كينوسىنىڭ ەڭ سەنىمدى جاڭالىقتارىن تاراتاتىن Variety Cinema Jahan جۋرنالى بەرگەن.
وزبەكستاننان 2 مىڭ جىلدىق تاريحى بار قالا قالدىقتارى تابىلدى - «ءوز ا»
وزبەكستان- قىتاي بىرلەسكەن ارحەولوگيالىق ەكسپەديتسياسى جۇرگىزگەن زەرتتەۋ بارىسىندا سۇرحانداريا وبلىسىنىڭ «ۋزۋن» اۋدانىندا 4 مىڭ جىلدىق تاريحى بار بەيىتتەر مەن 2 مىڭ جىلدىق قالا قالدىقتارى تابىلدى، دەپ حابارلايدى وزبەكستاندىق «ءوز ا» اقپاراتتىق اگەنتتىگى.
وزبەكستاندىق ب ا ق-تىڭ حابارلاۋىنشا، زەرتتەۋ بارىسىندا ءارتۇرلى قىش ىدىستار، قارۋ-جاراق، زەرگەرلىك بۇيىمدار، ءمۇسىن، قالا مۇنارالارىنىڭ قالدىقتارى جانە ءارتۇرلى كونە بەيىتتەر تابىلعان.
سونىمەن قاتار عالىمداردىڭ الدىن الا تۇجىرىمدارى بويىنشا بۇل ارحەولوگيالىق ولجالار ءبىزدىڭ داۋىرىمىزگە دەيىنگى II-III عاسىرلارداعى قاڭلى، كۋشان جانە ماسساگەت داۋىرلەرىنە جاتادى.
قازىرگى تاڭدا اۋداندا وزبەكستان مەن قىتايدىڭ بىرلەسكەن ارحەولوگيالىق ەكسپەديتسياسىنىڭ زەرتتەۋ جۇمىستارى جالعاسۋدا.
سونداي-اق وسى اپتادا «ءوز ا»-دا «وزبەكستانداعى العاشقى بەس جۇلدىزدى قوناق ءۇي ساتىلىمعا شىعارىلدى» دەگەن تاقىرىپتاعى اقپارات جارىق كورگەن بولاتىن.
اتالعان باسىلىمنىڭ مالىمەتىنشە، مەملەكەتتىك اكتيۆتەردى باسقارۋ اگەنتتىگى «International Hotel Tashkent» قوناق ءۇيىنىڭ مەملەكەتكە تيەسىلى 100 پايىزدىق ۇلەسىن ساتۋ پروتسەسى باستالعانىن حابارلاعان.
جەكەشەلەندىرۋ بويىنشا كەڭەسشى رەتىندە Deloitte كومپانياسى اينالىسادى ەكەن.
ايتا كەتەيىك، ساتىلاتىن قوناقۇيدە 232 بولمە، 7 كونفەرەنسيا زالى، 2 مەيرامحانا، بارلار، جازعى تەرراسسا، فيتنەس كلۋب جانە باسسەين بار. جالپى جەر كولەمى 3 گەكتاردى قۇرايتىن 44903 شارشى مەتر اۋماقتا عيمارات جانە نىسان بار.
سونىمەن قاتار «ءوزا» اقپاراتتىق اگەنتتىگىنە «وزبەكستاندا ءبىر جىلدا مۇراجايلارعا 5,7 ميلليون ادام كەلگەن» دەگەن اقپارات جاريالاندى.
باسىلىمنىڭ حابارلاۋىنشا 2023 -جىلى وزبەكستان اۋماعىنداعى مۇراجايلارعا 5,7 ميلليون ادام كەلگەن.
ستاتيستيكا اگەنتتىگىنىڭ مالىمەتىنشە، بۇل كورسەتكىش وتكەن 2022 -جىلمەن سالىستىرعاندا 800 مىڭعا از.
رەسپۋبليكاداعى ادامدار كوپ باراتىن 5 مۇراجايلار - رەگيستان انسامبلى، سامارقاند مەملەكەتتىك مۇراجاي قورىعى، «جەڭىس ساياباعى» مەموريالدىق كەشەنى قۇرامىنداعى مەملەكەتتىك داڭق مۇراجايى قاتارلىلار ەكەن.
اگەنتتىك مالىمەتىنشە، 2024 -جىل 1 قاڭتارىنداعى مالىمەت بويىنشا وزبەكستانداعى مۇراجايلار سانى 140 تى قۇراعان. مۇراجايلارعا 2020 -جىلى 1,5 ميلليون ادام، 2021 -جىلى 5,1 ميلليون ادام، 2022 -جىلى 6,5 ميلليون ادام كەلگەن.
اۆتور
بەيسەن سۇلتان