قىتايدىڭ 5 وڭىرىندە سۋ تاسقىنىنا بايلانىستى توتەنشە ارەكەت رەجيمى ەنگىزىلدى
استانا. KAZINFORM - قىتايدىڭ سۋ تاسقىنى مەن قۇرعاقشىلىققا قارسى كۇرەس جونىندەگى مەملەكەتتىك شتابى بەيسەنبى كۇنى ەلدىڭ سولتۇستىگىندەگى بەس وڭىردە سۋ تاسقىنىنا بايلانىستى توتەنشە جاعدايعا ارەكەت ەتۋدىڭ ءتورتىنشى دەڭگەيىن ىسكە قوستى، دەپ جازادى شينحۋا.
بۇل تۋرالى قىتاي حالىق رەسپۋبليكاسىنىڭ توتەنشە جاعدايلاردى باسقارۋ مينيسترلىگى حابارلادى.
مەتەورولوگيا قىزمەتىنىڭ بولجامىنا سايكەس، بەيسەنبىدەن سەنبىگە دەيىن قاتتى جاڭبىر بەيجىڭدە، سونداي-اق حىبي، شانشي، جيلين پروۆينسيالارىندا جانە نيڭشيا-حۋيزۋ اۆتونوميالىق وبلىسىندا جاۋۋى مۇمكىن.
بۇعان دەيىن شتاب كەڭسەسى جيلين پروۆينتسياسىنا تابيعي اپات سالدارىن جويۋعا كومەكتەسۋ ءۇشىن ارنايى جۇمىس توبىن جىبەرگەن.
سونداي-اق بەيسەنبى كۇنى قىتايدىڭ مەملەكەتتىك شتابى وسى جىلى جەتىنشى تايفۋننىڭ جاقىنداۋىنا بايلانىستى جىجياڭ جانە فۋجيان پروۆينتسيالارىندا دا توتەنشە ارەكەت ەتۋدىڭ ءتورتىنشى دەڭگەيىن ەنگىزدى.
ايتا كەتەيىك، قىتايدا توتەنشە جاعدايلارعا ارەكەت ەتۋدىڭ تورت دەڭگەيلى جۇيەسى قولدانىلادى، مۇنداعى ءبىرىنشى دەڭگەي - ەڭ جوعارى قاۋىپتى دەڭگەي بولىپ سانالادى.
بۇدان بۇرىن 20-شىلدەدە «ۆيپا» تايفۋنىنا بايلانىستى قىتايدىڭ وڭتۇستىگىندە جوعارى دايىندىق رەجيمى ەنگىزىلگەن ەدى.