قىتايدا ميڭ اۋلەتىنە جاتاتىن تاريحي مۇنارانىڭ شاتىرى وپىرىلىپ ءتۇستى

استانا. KAZINFORM - قىتايدىڭ شىعىسىنداعى تاريحي ەسكەرتكىشتەرىمەن تانىمال انحوي پروۆينتسياسى جۋىردا عانا جوندەلگەن فەنيان مۇناراسىنا بايلانىستى وقيعادان كەيىن تاعى دا جۇرت نازارىندا، دەپ حابارلايدى Kazinform ءتىلشىسى.

جەرگىلىكتى ب ا ق مالىمەتىنشە، مۇنارانىڭ شاتىرىنان قىش پليتالار وپىرىلىپ تۇسكەن. بۇل جاعداي جەرگىلىكتى تۇرعىندار مەن مادەني مۇرانى قورعاۋ سالاسىنىڭ ماماندارى اراسىندا الاڭداۋشىلىق تۋدىردى.

فەنيان بارابان مۇناراسى ميڭ اۋلەتى داۋىرىندەگى تاريحي نىساندار كەشەنىنىڭ ءبىر بولىگى سانالادى جانە ءوڭىردىڭ مادەني مۇراسىندا ماڭىزدى رول اتقارادى. جاقىندا مۇنارانىڭ ساۋلەتتىك كەلبەتىن ساقتاۋ ماقساتىندا جۇرگىزىلگەن بىرنەشە ميلليون يۋانعا باعالانعان جوندەۋ جۇمىستارى ەندى وسى وقيعادان كەيىن قايتا تەكسەرىلەدى.

انحوي پروۆينتسياسىنىڭ بيلىگى قازىردىڭ وزىندە شاتىردىڭ قۇلاۋ سەبەپتەرىن انىقتاۋ جانە كەلتىرىلگەن زالالدى باعالاۋ بويىنشا تەرگەۋدى باستادى. الدىن الا مالىمەتتەر بويىنشا، قولدانىلعان قۇرىلىس ماتەريالدارىنىڭ ساپاسىنا نەمەسە جوندەۋ پروتسەسىنىڭ وزىنە قاتىستى اقاۋلار بولۋى مۇمكىن. ابىروي بولعاندا، زارداپ شەككەندەر جوق.

چۋجوۋ قالاسىنىڭ مەملەكەتتىك رەسۋرستار ساۋداسى ورتالىعىنىڭ ۆەب- سايتىنداعى مالىمەتكە سايكەس، جوندەۋ جۇمىستارىنا ارنالعان كەلىسىمشارت شامامەن 3,4 ميلليون يۋانعا (شامامەن 473300 ا ق ش دوللارى) باعالانعان، ال سوڭعى ەسەپ بويىنشا تولەم 2,9 ميلليون يۋان كولەمىندە جۇرگىزىلگەن. جوبانىڭ قاۋىپسىزدىك پەن ساپا تالاپتارىنا سايكەستىگى قاناعاتتانارلىق دەپ باعالانعان.