قىتايعا كيىكتى سىيعا تارتۋ - ەكوجۇيەگە، اگرارلىق سەكتورعا اسەر ەتپەيدى - نىسانبايەۆ

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ەلىمىزدىڭ قىتايعا 1500 كيىكتى سىيعا تارتۋىنا قاتىستى ويىن ورتاعا سالدى.

- شىن مانىندە بۇل كيىكتەردىڭ تارالۋ ايماعى. ءبىز بۇگىندە الەمدىك پوپۋلياتسيانىڭ 99 پايىزىن يەلەنىپ وتىرمىز. مەنىڭ ويىمشا، كيىكتەردىڭ پوپۋلياتسيا تۇراقتىلىعىن قامتاماسىز ەتۋ ءۇشىن ولاردى بايىرعى مەكەنىنە قايتارۋ كەرەك. وسىلايشا ءبىز كيىك پوپۋلياتسياسىنىڭ جالپى تۇراقتىلىعىن نىعايتامىز، بۇل وتە ماڭىزدى، - دەدى ەرلان نىسانبايەۆ ءماجىلىس قابىرعاسىندا تىلشىلەردىڭ ساۋالىنا جاۋاپ بەرە تۇرىپ.

ءمينيستردىڭ مالىمدەۋىنشە، قىتايعا 1,5 مىڭ كيىكتى سىيعا تارتۋ، ەكوجۇيەگە جانە اگرارلىق سەكتورعا اسەر ەتپەيدى.

- 1500 كيىك ەشقانداي ءرول اتقارمايدى. ءبىراق، تۇراقتىلىقتى قامتاماسىز ەتۋ جاعىنان كومەكتەسەدى، - دەيدى ول.

سونداي-اق ۆەدومستۆو باسشىسى كيىكتەردى بەرۋ مەرزىمى ازىرگە ناقتى بەلگىسىز ەكەنىن ايتتى.

- جاقىندا ءبىزدىڭ جانە قىتاي عالىمدارىمەن تىكەلەي جۇمىستى باستايمىز. بىرىنشىدەن، قىتاي عالىمدارى كيىك مەكەندەيتىن جەردى ارالاپ، جايىلىم بازاسى تولىق پا، جوق پا سونى تەكسەرۋى قاجەت. سودان كەيىن كوشىرۋ تاسىلدەرى قاراستىرىلادى، قانداي ءتاسىل وڭتايلى، سونى تاڭدايمىز، - دەپ تولىقتىردى ە. نىسانبايەۆ.

كەشە بەلگىلى بولعانداي قازاقستان قىتايعا 1500 كيىك تارتۋ ەتەدى.

وسى ورايدا Kazinform «قىتايدا كيىك بار ما» دەگەن تاقىرىپتا شولۋ جاسادى.

اۆتور

داۋلەت ىزتىلەۋ