رەسەيلىك «روسسيا» اۋە كومپانياسى جۋرنالىنىڭ بيىلعى مامىر ايىنداعى سانىندا «ۇلى دالانىڭ اسپاني جىلقىسى» («نەبەسنىي كون ۆەليكوي ستەپي») دەگەن ماتەريال جارىق كوردى. ول بۇعان دەيىن قازاقستان پرەزيدەنتىنە سىيلانعان اقىلتەكە تۇقىمدى سايگۇلىككە ارنالعان. شاندوزعا مەملەكەت باسشىسىنىڭ ءوزى اقجان دەپ ات قويعان بولاتىن.
اۋزىمەن قۇس تىستەگەن جۇيرىك تۋرالى وسىنداي ماقالا قىتايدىڭ «Wings of China» بورتتىق جۋرنالىندا دا جاريالاندى.
سوڭعى جىلداردا شەتەلدىك باسىلىمداردىڭ جۋرناليستەرى قازاقستاننىڭ سيمۆولدارى جونىندە ءجيى جازىپ ءجۇر. ونداي ماقالالاردىڭ بورتتىق جۋرنالداردا پايدا بولۋى - قازاقستاننىڭ جەمىستى مادەني ديپلوماتياسىنىڭ كورىنىسى. سەبەبى، اۋە رەيسى كەزىندە كوپتەگەن شەتەلدىك بيزنەسمەن جانە تۋريستەر الگىندەي ب ا ق ارقىلى قازاقستان جونىندە مالىمەت الادى.
شارتاراپقا اتى شىعىپ ۇلگەرگەن سايگۇلىك اقجاننىڭ بەينەسى شەتەلدەردە عانا ەمەس، سونىمەن بىرگە، قازاقستاندى اۋە تاسىمالىنىڭ جاھاندىق نارىعىنا تانىستىراتىن باسىلىمدار ءۇشىن دە سۇرانىسقا يە. ماسەلەن، ول تۋرالى ماقالا Air Astana كومپانياسىنىڭ Tengri جۋرنالىندا دا باسىلدى. ونىڭ تارالىمىنا ءمان بەرسەك، نەگىزگى حالىقارالىق مارشرۋتتاردا ۇشاتىن جولاۋشىلار قازاقستاندىق جۇيرىك جونىندە ماعلۇمات الادى.
وسىنداي جاريالانىمداردىڭ باس كەيىپكەرى اقجان - تازا قاندى اقىلتەكە تۇقىمدى جىلقى. ماقالالاردىڭ اۆتورلارى اقىلدى تۇلپار قازاقستان رەسپۋبليكاسى پرەزيدەنتى قاسىم- جومارت توقايەۆتىڭ سۇيىكتى جانۋارى ەكەنىن جازادى. سونىمەن بىرگە، ونىڭ قاناتلى جانە تابىس دەگەن تازا قاندى اقىلتەكە تۇقىمدى ايعىر مەن بيەدەن تۋعانىن سۇيسىنە سۋرەتتەيدى. ودان بولەك، اتى قازاق تىلىنەن اۋدارعاندا، «جانى تازا» دەگەن ماعىنا بەرەتىنىن جەتكىزەدى.
شەتەلدىك جۋرناليستەر، اسىرەسە، اقجاننىڭ اقسارى رەڭكىنە تامسانادى. الەمدە اقىلتەكە جىلقىلارىنىڭ تەك %3 ى عانا سونداي ءتۇستى بولادى ەكەن.
- ونىڭ تەرىسى ايرىقشا وپتيكالىق قاسيەتكە يە. وتە جىڭىشكە قىلدارى جارىققا شاعىلىسىپ، جىلتىراپ-جارقىراپ، عاجايىپ رەڭگە ەنەدى، - دەلىنگەن جاريالانىمدا.
سونىمەن قاتار، اۆتورلار دالا مادەنيەتىندە اقسارى تۇلپار ءاردايىم جاقسى ىرىم جانە ساتتىلىك پەن وركەندەۋدىڭ سيمۆولى رەتىندە باعالاناتىنىن اتاپ وتكەن.
ايتا كەتەيىك، بۇعان دەيىن پرەزيدەنت سىيعا تارتىلعان تۇلپارلاردى ارنايى بارىپ كورگەنىن جازعانبىز.
اۆتور
الپامىس فايزوللا