قىتاي بيزنەسى قازاقستانعا تاعى ميللياردتاعان ينۆەستيتسيا سالۋعا دايىن

كەزدەسۋ اياسىندا ەنەرگەتيكا، سيفرلاندىرۋ جانە قارجى سالالارىنداعى جوبالاردى بىرلەسە جۇزەگە اسىرۋ پەرسپەكتيۆاسى تالقىلاندى.

مەملەكەت باسشىسى ەكى ەلدىڭ جان-جاقتى ستراتەگيالىق سەرىكتەستىگىنىڭ مازمۇنىن تەحنولوگيالىق جانە ونەركاسىپتىك تۇرعىدان بايىتا ءتۇسۋ ماڭىزدى ەكەنىنە نازار اۋداردى. پرەزيدەنتتىڭ ايتۋىنشا، قىتايدىڭ جەتەكشى كومپانيالارىنىڭ ەلىمىزگە كەلۋى قازاقستانعا دەگەن سەنىمنىڭ جوعارى ەكەنىن ايعاقتايدى.

قاسىم-جومارت توقايەۆ ين سايۆان مەن ول باسقارىپ وتىرعان كومپانياعا «قازاقستان-قىتاي» ينۆەستيتسيالىق فورۋمىن ۇيىمداستىرۋعا ۇلەس قوسقانى ءۇشىن ريزاشىلىعىن ءبىلدىردى. سونداي-اق Hong Kong Sino-Science Oil and Gas كومپانياسى قازاقستانعا 3 ميلليارد دوللاردان اسا ينۆەستيتسيا قۇيىپ، مۇناي-گاز سالاسىنداعى نەگىزگى كاسىپورىنداردىڭ بىرىنە اينالعانىن اتاپ ءوتتى.

اڭگىمەلەسۋ بارىسىندا VNET Group ديرەكتورلار كەڭەسىنىڭ اتقارۋشى ءتوراعاسى چەن شەن دەرەكتەردى وڭدەۋ ورتالىقتارى القابىن جانە جاساندى ينتەللەكت ينفراقۇرىلىمىن جاساقتاۋ ىسىنە قاتىسۋ نيەتىن جەتكىزدى.

پرەزيدەنت قازاقستاننىڭ قىتايلىق كومپانيالارمەن ينۆەستيتسيا تارتۋ، تەحنولوگيالاردى لوكاليزاتسيالاۋ، بىرلەسكەن زەرتتەۋلەر جۇرگىزۋ، تالانتتاردى قولداۋ جانە قۇزىرەتتەر ورتالىعىن قۇرۋ سەكىلدى باستى باعىتتار بويىنشا تىعىز ىقپالداستىق ورناتۋعا ءازىر ەكەنىن راستادى.

Shanghai Junhe Atomic Technology كومپانياسىمەن تەحنولوگيالىق ىنتىماقتاستىق اياسىندا اتوم ەنەرگياسىن بەيبىت ماقساتتا پايدالانۋ پەرسپەكتيۆتى باعىت رەتىندە اتالدى. بۇل رەتتە تابيعي ۋران وڭدەۋ مەن يادرولىق وتىن وندىرۋدەن باستاپ شاعىن مودۋلدى رەاكتورلار ورناتۋعا دەيىنگى تولىق وندىرىستىك تىزبەك قۇرۋ اسا ماڭىزدى.

قىتاي كومپانيالارىنىڭ باسشىلارى قازاقستانداعى ينۆەستيتسيالىق كليماتتى جاقسارتۋ قادامدارىنا، سونداي-اق ەلدە جۇرگىزىلىپ جاتقان ىرگەلى رەفورمالارعا جوعارى باعا بەردى. ولار مەملەكەتتىك ينستيتۋتتاردى جەتىلدىرۋ شارالارىن ەلدەگى ۇزاقمەرزىمدى تۇراقتىلىقتىڭ نىشانى رەتىندە قابىلدايدى.

قىتاي كومپانيالارىنىڭ وكىلدەرى ءداستۇرلى ەنەرگەتيكا سەكتورىمەن قاتار، ەل دامۋىنا باعىتتالعان باسقا دا سالالار مەن جوبالارعا ينۆەستيتسيا كولەمىن ۇلعايتۋعا دايىن ەكەنىن ايتتى.

ەسكە سالايىق، بۇعان دەيىن مەملەكەت باسشىسى Sunwah Group ءتوراعاسى ساي گۋانشەندى قابىلداعانىن جازعانبىز.