قىتاي پاراليمپيادا كوميتەتى ءتوراعاسى: قازاقستاندا پاراسپورتتىڭ دامۋىنا بارلىق جاعداي جاسالعان
استانا. KAZINFORM - قىتاي مۇگەدەكتەر فەدەراتسياسى (CDPF) مەن قىتاي پاراليمپيادا كوميتەتى (NPC China) دەلەگاتسياسىنىڭ باسشىسى چەن كاي مىرزا قازاقستانعا رەسمي ساپارمەن كەلدى.
قىتايلىق دەلەگاتسيانى قازاقستان رەسپۋبليكاسى ۇلتتىق پاراليمپيادا كوميتەتىنىڭ پرەزيدەنتى قايرات بورانبايەۆ قارسى الدى.
ساپار اياسىندا، دەلەگاتسيا استاناداعى «تارلان» مۇز ايدىنى جانە پاراليمپيادالىق جاتتىعۋ ورتالىعى سىندى ءبىرقاتار ماڭىزدى سپورتتىق جانە وڭالتۋ نىساندارىنا باردى.
ەكى ەل پاراليمپيادا كوميتەتى ءتوراعاسى سپورتشىلارمەن سويلەسىپ، ولاردىڭ الداعى باسەكەلەردە جاقسى ناتيجەلەر كورسەتۋىنە تىلەكتەستىك ءبىلدىردى.
تاراپتار پارا سپورت، ينكليۋزيۆتى ءبىلىم بەرۋ، جۇمىسپەن قامتۋ جانە مەديتسينالىق وڭالتۋ سالالارىنداعى ىنتىماقتاستىق پەرسپەكتيۆالارىن تالقىلاپ، حالىقارالىق باستامالار مەن سپورتتىق باعدارلامالار اياسىندا سەرىكتەستىكتى جالعاستىرۋ نيەتىن ءبىلدىردى.
- قىتاي مۇگەدەكتەر فەدەراتسياسى مەن قىتاي پاراليمپيادا كوميتەتى دەلەگاتسياسىنىڭ باسشىسى چەن كاي مىرزانى قابىلداۋ - ءبىز ءۇشىن ۇلكەن مارتەبە. قىتاي تاراپىنىڭ اشىق ديالوگ پەن پاراليمپيادالىق قوزعالىستى بىرلەسىپ دامىتۋعا ۇمتىلىسىن جوعارى باعالايمىز. بۇل ساپار ەكىجاقتى ىنتىماقتاستىقتى نىعايتۋعا، وزىق تاجىريبە الماسۋعا جانە ءبىزدىڭ ەلدەرىمىزدەگى مۇگەدەكتىگى بار سپورتشىلار ءۇشىن جاڭا مۇمكىندىكتەر جاساۋعا ماڭىزدى قادام بولادى دەپ سەنەمىن، - دەدى ق ر ۇلتتىق پاراليمپيادا كوميتەتىنىڭ پرەزيدەنتى قايرات بورانبايەۆ.
قىتاي پاراليمپيادا كوميتەتى ءتوراعاسى قازاقستانداعى پارا سپورتتىڭ دامۋىن جوعارى باعالاپ، وسى ساپاردان وتە كەرەمەت اسەر العانىن جەتكىزدى.
- بۇل جولعى ساپارىمىزدىڭ باستى ماقساتى ەكى ەل اراسىنداعى ىنتىماقتاستىقتى تەرەڭدەتىپ، تاجىريبەمەن الماسۋ. قازاقستاندا پاراسپورتتىڭ دامۋىنا بارلىق جاعىداي جاسالعان ەكەن. سونىمەن قاتار، سپورتشىلاردىڭ جەڭىسكە دەگەن جىگەرى ماعان تەرەڭ اسەر قالدىردى، - دەدى چەن كاي مىرزا.
ايتا كەتەرلىگى، 2025-جىلدىڭ تامىز ايىندا قازاقستان العاش رەت 45 ەلدىڭ قاتىسۋىمەن ازيا پاراليمپيادالىق كوميتەتىنىڭ باس اسسامبلەياسىن وتكىزەدى. بۇل وقيعا ەلدىڭ پاراليمپيادالىق قوزعالىستاعى حالىقارالىق بەدەلىن ارتتىرۋعا باعىتتالعان ماڭىزدى قادام بولماق.
وسىعان دەيىن حابارلاعانىمىزداي، يتاليانىڭ ۆەنەتسيا قالاسىندا قىسقى وليمپيادا جانە پاراليمپيادا ويىندارى مەدالدارىنىڭ سالتاناتتى تانىستىرىلىمى ءوتتى.