قىرعىزستان ءوز ونىمدەرىن قازاقستانعا ەكسپورتتاۋعا تىيىم سالىنعانىنا الاڭداۋلى
استانا. KAZINFORM - قىرعىزستاندا ليتسەنزيالانعان ءونىم اينالىمىنا شەكتەۋ ەنگىزۋ جونىندەگى قازاقستان ۇكىمەتى قاۋلىسىنىڭ جوباسىنا قىرعىزستاننىڭ ەكونوميكا جانە كوممەرتسيا مينيسترلىگى جاۋاپ بەردى جانە ونى توسقاۋىل رەتىندە قاراستىرادى.
بۇل تۋرالى قىرعىزستان قىرعىز رەسپۋبليكاسىنىڭ ەكونوميكا جانە كوممەرتسيا مينيسترلىگى حابارلادى.
ۆەدومستۆو 2024-جىلعى 1- شىلدەدەن باستاپ قازاقستاندا قىرعىزستاندا ليتسەنزيالانعان ءونىمدى اينالىمعا شىعارۋعا تىيىم سالۋدى ەنگىزۋگە الاڭداۋشىلىق ءبىلدىردى.
«قازاقستان رەسپۋبليكاسىنىڭ مۇنداي قاۋلى قابىلداۋى - ەۋرازيالىق ەكونوميكالىق وداقتىڭ ىشكى نارىعى جۇمىسىنا كەدەرگى كەلتىرۋى مۇمكىن جانە ە ا ە و- عا مۇشە مەملەكەتتەر كاسىپكەرلەرىنىڭ قازاقستان رەسپۋبليكاسىنىڭ ىشكى نارىعىنا قولجەتىمدىلىگىن شەكتەيتىن كەدەرگى رەتىندە قاراستىرىلادى. ەۋرازيالىق ەكونوميكالىق وداق شەڭبەرىندە سايكەستىكتى راستاۋ جونىندەگى قۇجاتتاردى مويىنداماۋ ءۇشىن پرەتسەدەنت تۋدىرۋى مۇمكىن»، - دەلىنگەن حابارلامادا.
2024-جىلعى 7- ناۋرىزدا قىرعىز رەسپۋبليكاسىنىڭ ەكونوميكا جانە ساۋدا مينيسترلىگى مەن قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگى اراسىندا جوسىقسىز اككرەديتتەۋ سۋبەكتىلەرىمەن كۇرەسۋ بويىنشا بىرلەسكەن شارالار جوسپارى ازىرلەنىپ، وعان قول قويىلدى.
2024-جىلعى 20- ناۋرىزدا كۇشىنە ەنەتىن قىرعىز رەسپۋبليكاسى مينيسترلەر كابينەتىنىڭ 2024-جىلعى 28- اقپاندا ءتيىستى قاۋلىسى قابىلداندى. وعان سايكەس ەكسپورتتىق تاۋارلاردىڭ تەحنيكالىق رەگلامەنتتەر تالاپتارىنا سايكەستىگى تۋرالى دەكلاراتسيالاردى تىركەۋ جونىندەگى ۋاكىلەتتى ورگان - ەۋرازيالىق ەكونوميكالىق وداق «قىرعىزستاندارت» ءبىرىڭعاي سەرتيفيكاتتاۋ ورگانى بولادى.
سەرتيفيكاتتاۋ ورگاندارىنا مەملەكەتتىك قاداعالاۋ جۇرگىزىلىپ، التى ورگانعا 1 ميلليون 560 مىڭ سوم كولەمىندە ايىپپۇل سالىندى. سەگىز ورگاننىڭ اككرەديتتەۋ اتتەستاتتارىنىڭ قولدانىلۋى توقتاتىلدى جانە بۇزۋشىلىقتارمەن بەرىلگەن سايكەستىكتى راستاۋ قۇجاتتارىنىڭ كۇشى جويىلدى.
اككرەديتتەۋ جونىندەگى ۇلتتىق ورگاننىڭ اككرەديتتەلگەن سايكەستىكتى راستاۋ جونىندەگى ورگانداردى ەاەو سايكەستىكتى راستاۋ جونىندەگى ورگانداردىڭ ءبىرىڭعاي ءتىزىلىمىنىڭ ۇلتتىق بولىگىنە ەنگىزۋ/شىعارۋ تۋرالى شەشىمدەر قابىلداۋ ءتارتىبى مەن نەگىزدەرى تۋرالى ەرەجە بەكىتىلدى.
قىرعىز رەسپۋبليكاسىنىڭ زەرتحانالارى شىعارعان سىناق حاتتامالارىنىڭ ءتىزىلىمى قۇرىلدى.
قازاقستان 2024-جىلدىڭ 1- شىلدەسىنەن باستاپ قىرعىزستاندا ليتسەنزياسى بار ونىمدەردى اينالىمعا شىعارۋعا تىيىم سالاتىنى تۋرالى بۇعان دەيىن حابارلانعان بولاتىن.