يراندىق ينۆەستور قازاقستاندا ماي زاۋىتى مەن قۇس فابريكاسىن سالادى -Eurasia Today
يراننىڭ Golrang Industrial Group كومپانياسى قازاقستاندا ماي وڭدەۋ زاۋىتى مەن قۇس فابريكاسىن سالۋعا ينۆەستيتسيا قۇيادى. جوبالاردىڭ جالپى قۇنى 120 ميلليون اقش دوللارىن قۇرايدى.
قازاقستاننىڭ اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى مەن كومپانيا باسشىسى فازلي مەھدي موحاممادكاريمنىڭ كەزدەسۋى بارىسىندا ەكى ءىرى جوباعا قاتىستى كەلىسىمگە قول جەتكىزىلدى. ونىڭ ءبىرى - 70 ميلليون دوللارلىق ماي ەكستراكتسيالاۋ زاۋىتى، ەكىنشىسى - 50 ميلليون دوللارلىق زاماناۋي قۇس فابريكاسى.
بۇل تۋرالى وسى اپتادا قىرعىزستاندا شىعاتىن Eurasia Today اقپارات اگەنتتىگى حابارلادى.
اتالعان ب ا ق-تىڭ كەلتىرگەن دەرەكتەرىنە سۇيەنسەك، ماي زاۋىتى تاۋلىگىنە 3 مىڭ تونناعا دەيىن كۇنباعىس وڭدەۋگە مۇمكىندىك بەرىپ، وتاندىق شيكىزاتتى تەرەڭ وڭدەۋدى دامىتۋعا جانە ەكسپورتتىق الەۋەتتى ارتتىرۋعا باعىتتالادى. ال قۇس فابريكاسى جۇمىرتقا ءوندىرىسىن جولعا قويىپ، ىشكى نارىقتى قامتاماسىز ەتۋگە جانە ءونىم ساپاسىن حالىقارالىق ستاندارتتارعا جەتكىزۋگە مۇمكىندىك بەرەدى.
تاراپتار بۇل جوبالار قازاقستاننىڭ اگروونەركاسىپ كەشەنىنە جاڭا تەحنولوگيالار تارتۋعا جانە ينۆەستيتسيالىق ىنتىماقتاستىقتى كۇشەيتۋگە ىقپال ەتەتىنىن اتاپ ءوتتى. سونداي-اق 2025 -جىلى قازاقستان مەن يران اراسىنداعى اوك سالاسىنداعى تاۋار اينالىمى 341 ميلليون دوللارعا جەتىپ، 55,8 پايىزعا ارتقانى حابارلاندى.
قۇربان ايت مەرەكەسىنە وراي 5 كۇندىك دەمالىس جاريالاندى- CNR
شينجاڭ ۇيعىر اۆتونوميالى ولكەلىك حالىق ۇكىمەتى رەسمي تۇردە 2026 -جىلعى مەرەكە جانە دەمالىس كۇندەرىنە قاتىستى ورنالاستىرۋ كەستەسىن جاريالادى.
سوعان سايكەس قۇربان ايت مەرەكەسى مامىردىڭ 27 سىنە بەلگىلەنگەن.
اتالعان قۇجاتقا سايكەس، مامىردىڭ 27 سىنەن 31 ىنە دەيىن جالپى 5 كۇن دەمالىس بەرىلەدى. بۇل ارالىقتا مەملەكەتتىك مەكەمەلەر مەن ءبىرقاتار ۇيىمداردا رەسمي دەمالىس رەجيمى ساقتالادى.
بۇل تۋرالى وسى اپتادا قىتايدىڭ «ورتالىق حالىق راديوسى» حابارلادى.
قىتايلىق ب ا ق-تىڭ دەرەگىنشە، ۇكىمەتتىڭ تۇسىندىرۋىندە بۇل شەشىم ءداستۇرلى ءدىني مەرەكەلەردى قۇرمەتتەۋ جانە تۇرعىنداردىڭ مەرەكەنى وتباسىمەن بىرگە وتكىزۋىنە جاعداي جاساۋ ماقساتىندا قابىلدانعانى اتاپ وتىلگەن.
ايتا كەتەيىك، دەمالىس كۇندەرى وڭىردە قوعامدىق قىزمەتتەردىڭ ۇزدىكسىز جۇمىسىن قامتاماسىز ەتۋ ءۇشىن كەزەكشىلىك ءتارتىبى ەنگىزىلۋى مۇمكىن.
وسىلايشا، قۇربان ايت مەرەكەسىنە بايلانىستى تۇرعىندار قاتارىنان 5 كۇن دەمالىس الىپ، مەرەكەنى كەڭ كولەمدە اتاپ وتۋگە مۇمكىندىك الادى.
تاشكەنتتە تۇركى مەملەكەتتەرىنىڭ سوت-قۇقىقتىق ءبىلىم بەرۋ فورۋمى باستالدى -ءوزا
تاشكەنت قالاسىنداعى «Hilton Tashkent City» قوناق ۇيىندە «تۇركى مەملەكەتتەرىندەگى سوت-قۇقىقتىق ءبىلىم بەرۋ جانە ءادىل سوت تورەلىگى: سيفرلىق ترانسفورماتسيا جانە وزىق تاجىريبەلەرگە ينتەگراتسيا» تاقىرىبىندا حالىقارالىق فورۋم ءوز جۇمىسىن باستادى.
بۇل تۋرالى «ءوزا» اقپارات اگەنتتىگى مالىمدەدى.
حابارلامادا ايتىلعانداي، جيىنعا ازەربايجان، قازاقستان، قىرعىزستان جانە تۇركيانىڭ سوت- قۇقىقتىق ءبىلىم بەرۋ مەكەمەلەرى، باس پروكۋراتۋرا اكادەميالارى، حالىقارالىق ۇيىمدار مەن ساراپشىلار قاتىسىپ جاتىر. فورۋمدا قۇقىقتىق ءبىلىم بەرۋ جۇيەسىن جەتىلدىرۋ، سوت كادرلارىن دايارلاۋ ساپاسىن ارتتىرۋ جانە ءادىل سوت تورەلىگىن دامىتۋ ماسەلەلەرى تالقىلانىپ جاتىر.
سونداي-اق جاساندى ينتەللەكتتى سۋديالاردى دايارلاۋدا قولدانۋ، سيفرلىق تەحنولوگيالاردى سوت- ءبىلىم بەرۋ ۇدەرىسىنە ەنگىزۋ جانە كادر دايارلاۋ جۇيەسىن جاڭعىرتۋ باعىتتارى قاراستىرىلادى. قاتىسۋشىلار ءوزارا تاجىريبە الماسىپ، وزىق تاجىريبەلەردى ورتاعا سالادى.
سونداي-اق وسى اپتادا «ءوزا» - دا «تاشكەنت پەن حيۋا اراسىن جوعارى جىلدامدىقتى پويىز بايلانىستىردى» دەگەن تاقىرىپتاعى اقپارات جاريالاندى.
اتالعان ب ا ق-تىڭ دەرەگىنشە، تاشكەنت پەن حيۋا قالالارى اراسىندا جوعارى جىلدامدىقتى جاڭا جولاۋشىلار پويىزى ىسكە قوسىلدى. العاشقى ساپارىن «جالالاددين ماڭگىبەردى» ەلەكتر پويىزى جاساپ، ەلدەگى كولىك ينفراقۇرىلىمىنىڭ جاڭا كەزەڭىن باستادى.
بۇعان دەيىن 1022 شاقىرىمدىق جولعا كەمىندە 14 ساعات قاجەت بولسا، جاڭا پويىز بۇل قاشىقتىقتى 7,5 ساعاتتا ەڭسەرەدى. ساعاتىنا 250 شاقىرىم جىلدامدىقپەن جۇرەتىن زاماناۋي قۇرام 389 جولاۋشىعا ارنالعان جانە تۋريستىك باعىت رەتىندە دە جوعارى سۇرانىسقا يە.
پويىزدىڭ ىسكە قوسىلۋى ءوڭىرارالىق بايلانىستى كۇشەيتىپ، سامارقاند، بۇحارا جانە ۇرگەنىش سياقتى قالالار ارقىلى جاڭا تۋريستىك اعىم قالىپتاستىرۋعا مۇمكىندىك بەرەدى. 2027 -جىلدان باستاپ بۇل باعىتتى نوكىس قالاسىنا دەيىن ۇزارتۋ جوسپارلانعان.
شينجاڭداعى التاي-قوم تاسجولى جازعى قاتىناس رەجيمىنە كوشتى- حالىق گازەتى
مامىر ايىنا قاراي شينجاڭنىڭ التاي تاۋلارى جاسىل جەلەك جامىلدى. قارلى تاۋ مەن جايقالعان جايلاۋ اياسىنداعى تاڭعاجايىپ تابيعاتى بار قوم- قاناسقا اپاراتىن التاي- قوم تاسجولى جازعى قاتىناس رەجيمىن رەسمي تۇردە باستادى، دەپ حابارلايدى حالىق گازەتى باسىلىمى.
بەلگىلى بولعانداي، جازعى قاتىناس رەجيمىندە كولىك تۇرلەرى مەن ۋاقىت كەزەڭدەرى بويىنشا ناقتى باسقارۋ جۇزەگە اسىرىلادى. جەتى ورىندى جانە ودان كەم جولاۋشىلار كولىكتەرىنە كۇن سايىن تاڭعى 9:30-دان 15:00-گە دەيىن جۇرۋىنە رۇقسات ەتىلەدى.
التاي- قوم تاسجولىنىڭ جالپى ۇزىندىعى 209,45 شاقىرىم. بۇل جول التاي قالاسىنان باستالىپ، قاناس تۋريستىك ايماعىنداعى قوم اۋىلىندا اياقتالادى. شينجاڭنىڭ سولتۇستىگىندەگى «مىڭ شاقىرىمدىق گالەرەيانىڭ» ماڭىزدى بولىگى بولا وتىرىپ، تاس جولى - بويىندا ورمان، شاتقال، جايلاۋ، سازدىق سياقتى ءارتۇرلى تابيعات كورىنىستەرىن ءبىر بويىنا جيعان تانىمال تۋريستىك باعىت.
ايتا كەتەيىك، قاناس تۋريستىك ايماعى قىتايدىڭ شينجاڭ- ۇيعىر اۆتونوميالىق ولكەسىندەگى ەڭ كورىكتى تابيعي مەكەندەردىڭ ءبىرى سانالادى. ول التاي تاۋلارى قويناۋىندا ورنالاسقان.
ايماقتىڭ باستى نىسانى - قاناس كولى. جاسىل- كوگىلدىر ءتۇستى كول قىتايداعى ەڭ تەرەڭ تاۋ كولدەرىنىڭ ءبىرى بولىپ ەسەپتەلەدى جانە تابيعي سۇلۋلىعىمەن تانىمال.
قاناس تۋريستىك ايماعى قىتايدىڭ 5A دارەجەلى تۋريستىك ايماعى مارتەبەسىنە يە. مۇندا جىل سايىن ميلليونداعان تۋريست كەلىپ، ورمان، الپىلىك شالعىندار مەن تاۋ كورىنىستەرىن تاماشالايدى.
سونىمەن قاتار قازاقستانداعى مارقاكول قورىعى مەن قاناس اراسىندا ترانسشەكارالىق تۋريستىك باعىتتاردى دامىتۋ جوسپارلانىپ وتىر.
سونداي-اق وسى اپتادا حالىق گازەتىندە «قاشقاردا قىتاي مەن ورتالىق ازيانىڭ قۇرىلىس ماتەريالدارى سالاسىنداعى ىنتىماقتاستىق كونفەرەنتسياسى ءوتتى» دەگەن تاقىرىپتاعى اقپارات جاريالاندى.
اتالعان ب ا ق-تىڭ دەرەگىنشە، قىتايدىڭ قاشقار قالاسىندا شينجاڭ مەن ورتالىق ازيا ەلدەرىنىڭ ءۇي جيھازدارى جانە قۇرىلىس ماتەريالدارى ونەركاسىبى بويىنشا ىنتىماقتاستىق كونفەرەنتسياسى ءوتتى. ءىس-شاراعا 400 دەن استام قوناق، سونىڭ ىشىندە سالالىق ۇيىمدار، مەملەكەتتىك ورگاندار جانە جەتەكشى كاسىپورىن وكىلدەرى قاتىستى.
كونفەرەنتسيادا قاشقاردىڭ گەوگرافيالىق ارتىقشىلىقتارى مەن ترانزيتتىك الەۋەتى اتاپ ءوتىلدى. ايماق «سەگىز ەلدى بايلانىستىراتىن بەس پورت جانە ەۋروپا مەن ازيانى جالعايتىن باعىت» رەتىندە قىتاي مەن ورتالىق ازيا اراسىنداعى ونەركاسىپتىك بايلانىستاردى دامىتۋدا ماڭىزدى الاڭ ەكەنى ايتىلدى.
جيىندا شەكاراارالىق ىنتىماقتاستىقتى كەڭەيتۋ، قۇرىلىس ماتەريالدارى مەن جيھاز ءوندىرىسى سالاسىنداعى ارىپتەستىكتى كۇشەيتۋ جانە ايماقتىق ونەركاسىپتىك ينتەگراتسيانى ىلگەرىلەتۋ ماسەلەلەرى تالقىلاندى.
زەيىننىڭ شارشاۋى: پسيحولوگيالىق تۇرعىدان قالاي تىنىعۋعا بولادى؟ -TRT
قازىرگى زاماندا كوپ ادام فيزيكالىق تۇرعىدان دەمالىپ جۇرسە دە، ءوزىن پسيحولوگيالىق تۇرعىدان قاجىعانداي سەزىنەدى. ماماندار مۇنى اقپاراتتىڭ شامادان تىس كوپتىگى مەن ۇزدىكسىز شەشىم قابىلداۋدان تۋىندايتىن ينتەللەكتۋالدىق شارشاۋمەن بايلانىستىرادى، دەپ جازادى تۇركيا راديو تەليەۆيزيا پورتالى حابارلادى.
«TRT» - نىڭ دەرەگىنشە، كلينيكالىق پسيحولوگ، جازۋشى رابيا ياۆۋزتىڭ ايتۋىنشا، زەيىننىڭ شارشاۋى - ميدىڭ نازار اۋدارۋ، اقپارات وڭدەۋ جانە شەشىم قابىلداۋ جۇيەلەرىنىڭ شامادان تىس جۇكتەلۋىنەن پايدا بولاتىن ۋاقىتشا كۇي. ونىڭ نەگىزگى بەلگىلەرىنە زەيىننىڭ شاشىراۋى، ۇمىتشاقتىق جانە شەشىم قابىلداۋدىڭ قيىنداۋى جاتادى.
مامان قازىرگى ادامنىڭ كۇندەلىكتى ءومىرى ۇزدىكسىز اقپارات اعىنىمەن تىعىز بايلانىستى ەكەنىن ايتادى. الەۋمەتتىك جەلىلەر، ەلەكتروندى حاتتار مەن تۇراقتى حابارلامالار ميدى ۇنەمى بەلسەندى كۇيدە ۇستاپ، زەيىننىڭ تولىق تىنىعۋىنا مۇمكىندىك بەرمەيدى. سونىڭ سالدارىنان ادام تىنىشتىقتا دا مازاسىزدىق سەزىنۋى مۇمكىن.
رابيا ياۆۋزدىڭ پىكىرىنشە، پسيحولوگيالىق تۇرعىدان تىنىعۋ تەك فيزيكالىق دەمالىسپەن شەكتەلمەيدى. ءول ۇشىن ادام اقپارات اعىنىن ازايتىپ، سيفرلىق قۇرىلعىلاردان ۋاقىتشا الىستاۋى قاجەت. تابيعات اياسىندا سەرۋەندەۋ، تىنىس الۋ جاتتىعۋلارى، جوسپارسىز ۋاقىت وتكىزۋ جانە ءدال قازىرگى ساتكە نازار اۋدارۋ زەيىندى قالپىنا كەلتىرۋگە كومەكتەسەدى.
سونداي-اق مامان تىم جوسپارلانعان دەمالىستىڭ دا زەيىندى شارشاتۋى مۇمكىن ەكەنىن اتاپ ءوتتى. ونىڭ ايتۋىنشا، ينتەللەكتۋالدىق تىنىعۋ شەشىم قابىلداۋ سانىن ازايتىپ، ميدىڭ «بوس كەڭىستىككە» يە بولۋىنا مۇمكىندىك بەرۋ ارقىلى جۇزەگە اسادى.
پسيحولوگ ينتەللەكتۋالدىق دەنساۋلىقتى ۇزاق ۋاقىت ەلەمەۋ كۇيزەلىس سيندرومىنا، جادىنىڭ السىرەۋىنە جانە شەشىم قابىلداۋ قابىلەتىنىڭ تومەندەۋىنە الىپ كەلۋى مۇمكىن ەكەنىن ەسكەرتتى. وسىعان بايلانىستى ول كۇندەلىكتى ومىردە ەكران ۋاقىتىن قىسقارتۋعا، تابيعاتپەن كوبىرەك بايلانىس ورناتۋعا جانە سانالى تۇردە تىنىعۋعا كوڭىل بولۋگە كەڭەس بەرەدى.
سونىمەن قاتار وسى اپتادا TRT باسىلىمىندا «جاتتىعۋ اعزانىڭ بارلىق جۇيەسىنە پايدالى» دەگەن مازمۇنداعى شاعىن ماقالا جارىق كوردى.
عىلىمي زەرتتەۋلەر بۇلشىقەتتەردىڭ تەك قوزعالىسقا جاۋاپ بەرەتىن ءتىن ەمەس، بۇكىل اعزاعا اسەر ەتەتىن ەندوكريندىك ورگان ەكەنىن كورسەتەدى. مامانداردىڭ ايتۋىنشا، جاتتىعۋ كەزىندە بولىنەتىن ميوكيندەر مي، يممۋندىق جۇيە، باۋىر جانە سۇيەكتەرمەن بايلانىس ورناتىپ، اعزانىڭ ىشكى تەپە-تەڭدىگىن ساقتاۋعا كومەكتەسەدى.
زەرتتەۋلەرگە سايكەس، ينتەرلەيكين-6 (IL-6)، يريزين جانە BDNF سەكىلدى مولەكۋلالار قابىنۋدى ازايتىپ، ماي مەن قانت الماسۋىن رەتتەيدى، سونداي-اق ەستە ساقتاۋ قابىلەتى مەن كوگنيتيۆتى فۋنكتسيالاردى جاقسارتادى. سونىمەن بىرگە دەنە بەلسەندىلىگى يممۋندىق جۇيەنى كۇشەيتىپ، 2-ءتيپتى ديابەت پەن جۇرەك-قان تامىرلارى اۋرۋلارىنىڭ الدىن الۋعا ىقپال ەتەدى.
ماماندار تۇراقتى قوزعالىستىڭ سۇيەك تىعىزدىعىن ارتتىرىپ، ەموتسيونالدىق ساۋلىققا وڭ اسەر ەتەتىنىن ايتادى. كەيبىر عىلىمي زەرتتەۋلەر جاتتىعۋ كەزىندە بولىنەتىن ميوكيندەردىڭ قاتەرلى ىسىك جاسۋشالارىنىڭ تارالۋىن تەجەۋگە كومەكتەسۋى مۇمكىن ەكەنىن كورسەتكەن.
اۆتورلار
بەيسەن سۇلتان ۇلى