قۇقىق قورعاۋ ورگاندارىندا ءمىنسىز قىزمەت اتقارعاندارعا «قۇرمەتتى قىزمەتكەر» اتاعى بەرىلەدى

استانا. KAZINFORM - مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە قۇقىق قورعاۋ ورگاندارىندا ۇزدىكسىز ءارى ءمىنسىز قىزمەت اتقارعاندارعا «قۇرمەتتى قىزمەتكەر» اتاعى بەرىلەتىنىن ايتتى.

- قۇقىق قورعاۋ ورگاندارىندا ۇزدىكسىز ءارى ءمىنسىز قىزمەت اتقارعاندارعا «قۇرمەتتى قىزمەتكەر» اتاعى بەرىلەدى. الايدا كەيبىر قۇرىلىمداردا بۇل جوعارى اتاق باسشىلارعا عانا بۇيىرادى. قاتارداعى قاراپايىم قىزمەتكەرلەر اراسىندا ۇزاق جىلدار بويى كاسىبي بورىشىن ادال اتقارىپ جۇرگەن لايىقتى كانديداتتار جەتكىلىكتى. قىزمەتكەرلەردىڭ كاسىبي دەڭگەيىن ارتتىرىپ، مورالدىق رۋحىن كۇشەيتۋ ماڭىزدى. بىلتىر پرەزيدەنت اكىمشىلىگىنىڭ باستاماسىمەن قۇقىق قورعاۋ ورگاندارىنىڭ كادرلىق قۇرامىن سيفرلىق باعالاۋ جۇيەسى ەنگىزىلدى. بۇل وبەكتيۆتى دەربەس رەيتينگ قالىپتاستىرۋعا مۇمكىندىك بەردى. قۇقىق قورعاۋ ورگاندارىنىڭ باسشىلارىنا قىزمەتكەردىڭ لاۋازىمىن جوعارىلاتقاندا جانە كوتەرمەلەگەندە نەگىزىنەن سيفرلىق باعالاۋعا سۇيەنۋدى تاپسىرامىن. تاعايىنداۋلار بىرەۋگە بۇيرەگى بۇراتىن سۋبەكتيۆتى شەشىمگە ەمەس، لايىقتى ەڭبەككە، ناقتى كورسەتكىشتەر مەن كاسىبي جەتىستىكتەرگە نەگىزدەلۋگە ءتيىس. ايتسە دە، لي كۋان يۋ ايتقانداي، ىشكى تۇيسىككە دە يەك ارتقان ءجون. ءاربىر وفيتسەر ادال قىزمەتىنىڭ لايىقتى باعالاناتىنىنا سەنىمدى بولۋى كەرەك، - دەدى پرەزيدەنت.

جالپى، بۇگىنگى ايقىندالعان باعىتتار قۇقىقتىق ءتارتىپ پەن زاڭدىلىقتى ساقتاۋدىڭ جاڭا مودەلىن قالىپتاستىرۋدى كوزدەيدى. ينستيتۋتتىق رەفورمالار مەن تەحنولوگيالىق جاڭاشىلدىقتاردى ۇشتاستىرا وتىرىپ، قۇقىق قورعاۋ ورگاندارىن ودان ءارى جاڭعىرتا بەرۋ كەرەك.

- مەن ءبىر اپتا ىشىندە قۇقىق قورعاۋ ورگاندارىنداعى ولقىلىقتاردىڭ بارلىعى كورسەتىلەتىن ماتەريال دايىنداۋ جونىندە تاپسىرما بەردىم. مۇندا قىزمەتكە دە بايلانىستى كەمشىلىكتەر بار. سوندىقتان ءبىز بۇگىن ول تۋرالى ەگجەي-تەگجەيلى ايتپايمىز. دەگەنمەن ماسەلەنىڭ شەت جاعاسى قوزعالدى. ءبىر اپتا ىشىندە قۇجات بارلىق قۇقىق قورعاۋ ورگانىنا جىبەرىلەدى. ودان كەيىن ءبىز جابىق فورماتتا جيىن وتكىزىپ، جۇمىس بارىسىن تالقىلايمىز. سىزدەر قىلمىسقا قارسى كۇرەس پەن قوعامدىق ءتارتىپتى ساقتاۋ ءىسىن ومىرلىك ميسسيا رەتىندە تاڭداپ، ادال قىزمەت ەتىپ كەلەسىزدەر. بۇل - قيىندىعى كوپ بولعانىمەن، ەلگە قاجەتتى ءارى ابىرويلى جۇمىس. وسى كۇردەلى جولدى ناعىز وتانشىل ادامدار تاڭدايدى. سىزدەر ءار ازاماتتىڭ جايلى ءومىر سۇرۋىنە، بيزنەستىڭ تۇراقتى دامۋىنا، بالالاردىڭ باقىتتى ءارى الاڭسىز وسۋىنە وراسان زور ۇلەس قوسىپ جۇرسىزدەر. ەلىمىزدەگى ءىرى قالالارمەن قاتار، شالعاي ەلدى مەكەندەردەگى قوعامدىق قاۋىپسىزدىك - قۇقىق قورعاۋ ورگاندارى قىزمەتكەرلەرىنىڭ تىنىمسىز ەڭبەگىنىڭ ارقاسى. وسىنداي تۇراقتىلىق پەن تىنىشتىقتىڭ ارتىندا زاڭ مەن ءتارتىپ ءۇشىن جاسالعان ەرەن ەرلىك بار. حالقىمىز قۇقىق قورعاۋ ورگاندارى قىزمەتكەرلەرىنىڭ ەرلىگىن باعالايدى، ماقتان تۇتادى، ءارقاشاندا قولدايدى، - دەدى مەملەكەت باسشىسى.

جاقىندا كۇشتىك قۇرىلىمدارىمىز الماتى وبلىسىندا ءىرى ەسىرتكى زەرتحاناسىن جويدى. ماڭعىستاۋ وبلىسىندا ترانسۇلتتىق دەڭگەيدەگى ۇيىمداسقان قىلمىستىق توپ قۇرىقتالدى. سونىڭ ناتيجەسىندە ەسىرتكى بيزنەسىنە مىقتى توسقاۋىل قويىلدى.

- ارنايى وپەراتسيالارعا قاتىسقان ماماندار جوعارى مەملەكەتتىك ناگرادالارمەن ماراپاتتالدى. سىزدەردىڭ كۇندەلىكتى جۇمىستارىڭىز قاۋىپ- قاتەرگە تولى. وكىنىشكە قاراي، تاۋەلسىزدىك جىلدارىندا 842 ازامات قىزمەتتىك مىندەتىن ورىنداۋ كەزىندە قازاعا ۇشىرادى، 4,5 مىڭ ادام جاراقات الدى. بۇگىن ءبىز قازا بولعان ەرلەرىمىزدىڭ جاقىندارىنا ماراپات تاپسىرامىز. ەرجۇرەك ساقشىلاردىڭ ەرلىگى حالىققا جانقيارلىقپەن قىزمەت ەتۋدىڭ ۇلگىسى رەتىندە جۇرتىمىزدىڭ جادىندا ساقتالۋعا ءتيىس، - دەدى پرەزيدەنت.

ايتا كەتەيىك، زاڭ جانە قۇقىق اكادەمياسى تۇلەكتەرىنە بىردەن «اعا لەيتەنانت» شەنى بەرىلۋى مۇمكىن.