گۇلبەرگەندى سەرۋەننەن كەيىن ۇيگە كوتەرۋ اسىرەسە اناسىنا اۋىر تيەتىن. ءبىر جولى قىزىن ەكىنشى قاباتقا الىپ شىققاننان كەيىن ايەلىنىڭ بەلى اۋىرىپ قالعان. سول ساتتە وتباسى بۇل ماسەلەنى باسقاشا شەشۋدىڭ جولىن ىزدەي باستايدى.
ساميگوللا عانيەۆ قازاقستان بويىنشا ارنايى كوتەرگىش جاسايتىن مامانداردى قاراستىرعان. كەيىن رۋدنىي قالاسىنان تاپسىرىسپەن وسىنداي قۇرىلعى دايىندايتىن شەبەرلەر تابىلعان.
كوتەرگىشتى جاساۋ، جەتكىزۋ جانە ورناتۋ جۇمىستارىنا 4 ميلليون تەڭگەدەن استام قاراجات كەتكەن. وعان قوسا گۇلبەرگەننىڭ بولمەسىنەن قۇرىلعىعا تىكەلەي شىعۋ ءۇشىن ارنايى بالكون سالىنعان.
«قىزىمنىڭ قۋانعانىن كورسەم، جۇمسالعان اقشانىڭ ەشقايسىسىنا وكىنبەيمىن. قازىر اربامەن دە، ءجۇرىس قۇرالىمەن دە ءتۇسىپ كوردىك. قىزىم ريزا، اناسى دا قۋانىپ ءجۇر. ونىڭ قۋانىشى - ءبىزدىڭ قۋانىشىمىز»، - دەيدى ساميگوللا عانيەۆ.
ارنايى كوتەرگىش 250 كەلىگە دەيىنگى سالماققا ەسەپتەلگەن. ەكىنشى قابات پەن جەردىڭ اراسى شامامەن 3 مەتر 80 سانتيمەتر. قۇرىلعىدا جارىق، بەينەكامەرا جانە كودپەن اشىلاتىن قۇلىپ بار.
جاڭا قۇرىلعى گۇلبەرگەننىڭ كۇندەلىكتى ومىرىنە دە ۇلكەن وزگەرىس اكەلگەن. بۇرىن ونى تومەن ءتۇسىرۋ جانە قايتا كوتەرۋ قيىن بولعاندىقتان، ول ايىنا نەبارى بىرنەشە رەت قانا دالاعا شىعاتىن. قازىر سەرۋەندەۋ كۇندەلىكتى ادەتكە اينالىپ كەلەدى.
وتباسىنىڭ بۇل شەشىمىنە كورشىلەر دە قارسى بولماعان.
«جاقسى جاساپتى. ءبىز دە قۋانىپ وتىرمىز. اناسىنا قىزىن كوتەرۋ قيىن ەدى، ال اكەسى ۇنەمى ۇيدە بولا بەرمەيدى. ەڭ باستىسى، قىزىنا جەڭىل بولدى»، - دەيدى كورشىسى بيباتشا داعىستانوۆا.
گۇلبەرگەن قولونەرمەن دە اينالىسادى. ول بيسەردەن ءتۇرلى بۇيىمدار توقيدى. ەرەكشەلىگى - بۇيىمداردى اياق ساۋساقتارىنىڭ كومەگىمەن جاسايدى. قازىر ونىڭ ەڭبەگىن باعالاپ، تۇراقتى تاپسىرىس بەرەتىن ادامدار دا بار.
ءبىر قاراعاندا قاراپايىم عانا كوتەرگىش سياقتى كورىنۋى مۇمكىن. ءبىراق عانيەۆتەر وتباسى ءۇشىن بۇل - گۇلبەرگەننىڭ ۇيدەن ەركىن شىعىپ، كۇن سايىن سىرتقى ورتامەن ارالاسۋىنا مۇمكىندىك بەرگەن ماڭىزدى وزگەرىس.