مەملەكەت باسشىسى ءوز سوزىندە وبلىستىڭ قارقىندى دامىپ كەلە جاتقانىن اتاپ ءوتتى.
- كەنشىلەر مەكەنىن ناعىز ەڭبەك ادامدارىنىڭ كيەلى بەسىگى دەسەك، ارتىق بولمايدى. ءقازىر وبلىس ەكونوميكاسى قارقىندى دامىپ كەلە جاتىر. بۇل، ارينە، قۋانىشتى جاعداي. اسىرەسە، ايماقتاعى شيكىزاتتىق ەمەس ءونىم ەكسپورتى ەداۋىر وسكەنىن اتاپ ءوتۋ كەرەك. اۋىر ونەركاسىپ سالاسىندا جالپى قۇنى 4,2 تريلليون تەڭگە بولاتىن ءونىم ءوندىرىلدى. بۇل - شىن مانىندە، زور جەتىستىك. ەلىمىز بويىنشا دا وڭ ءۇردىس جالعاسۋدا. وسى جىلدىڭ سوڭىنا دەيىن قازاقستاننىڭ جالپى ىشكى ءونىمىنىڭ كولەمى 398 ميلليارد دوللارعا جەتىپ قالادى. بۇل - ورتالىق ازياداعى ەڭ جوعارى كورسەتكىش. ال وڭدەۋ ونەركاسىبىنىڭ ەل ەكونوميكاسىنداعى ۇلەسى 14 پايىزدان استى. مۇنىڭ ءبارى قازاقستان حالقىنىڭ تاباندى ەڭبەگىنىڭ، اۋقىمدى جۇمىسىنىڭ جەمىسى ەكەنى ءسوزسىز. وسى ورايدا، اسىرەسە، وبلىستىڭ ءوسىپ-وركەندەۋىنە Qarmet زاۋىتى مول ۇلەس قوسىپ وتىرعانىن اتاپ وتكىم كەلەدى. قاراعاندى مەتاللۋرگيا زاۋىتى وتاندىق مەتاللۋرگيانىڭ قارا شاڭىراعى، تۇتاس ايماقتىڭ ەكونوميكالىق تىرەگى سانالادى. بۇل ءىرى كاسىپورىن ەلىمىزدىڭ يندۋستريالىق الەۋەتىن ارتتىرۋ ىسىندە ەرەكشە ءرول اتقارادى، - دەدى قاسىم-جومارت توقايەۆ.