قازاقستاندىق سۋرەتشى حالىقارالىق بايقاۋدا ءبىرىنشى ورىن الدى
اسەمگۇل سۇلەيمەنوۆا بريتاندىق Golden Time Talent حالىقارالىق بايقاۋىنىڭ «كەسكىندەمە» نوميناتسياسى بويىنشا جەڭىمپاز اتاندى، دەپ حابارلايدى قازاقپارات ءتىلشىسى.
«كەسكىندەمە» نوميناتسياسىنا 30-دان استام ەلدەن 190 ادام قاتىستى. بايقاۋدا «انا مەن بالا» تۋىندىسى ۇزدىك تانىلدى.
«جەڭىسكە جەتكەنىم تۋرالى كەشە ءبىلدىم، باسىندا ءتىپتى سەنبەدىم، ءبىراق تۇسىنگەن كەزدە ءبولىسۋدى ءجون كوردىم. مەن بالا كەزىمنەن سۋرەت سالامىن، بالالار كوركەمسۋرەت مەكتەبىن جانە «شابىت» ونەر ۋنيۆەرسيتەتىن ءبىتىردىم»، - دەيدى اسەمگۇل.
سۋرەتشى كوممەرتسيالىق جوبالار ءۇشىن ءارتۇرلى تەحنيكا مەن ستيلدە جۇمىس ىستەيدى. دەگەنمەن جەڭىمپازدىڭ جۇمىسىنان ۇلتتىق ەرەكشەلىك ەلەمەنتتەرىن ءجيى كورۋگە بولادى.
بۇعان دەيىن «انا مەن بالا» كارتيناسى اسەمگۇل كورمەسىنىڭ نەگىزگى بولىگى رەتىندە جاقسى پىكىرگە يە بولعان.
«كەيىنگى كەزدە بايقاۋلارعا قاتىسا بەرمەيمىن. بۇل بايقاۋعا قاتىسۋ تۋرالى شەشىم كەنەتتەن قابىلداندى. جازدا كورمەم وتكەندە، اۆتورلىق كارتينالار سەرياسىن سالدىم. ورتالىق ەكسپونات «انا مەن بالا» كارتيناسى بولدى. مەن ونىڭ ادامدارعا قاتتى ۇناعانىن، جۇرت ودان كوز الماعانىن بايقادىم. مۇنداي بايقاۋدىڭ ءوتىپ جاتقانىن كورىپ، بىردەن قاتىسۋعا ءوتىنىم بەرۋدى شەشتىم»، - دەپ ءبولىستى جەڭىمپاز.
اۆتور
زارينا تۋعانبايەۆا