قازاقستاندىق عالىمدار اۋىل شارۋاشىلىعى ونىمدەرىن ۇزاق ساقتايتىن قوندىرعى ويلاپ تاپتى

الماتى. KAZINFORM - ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى فەرمەرلىك ونىمدەردى وڭدەۋگە ارنالعان «Dayar 20» اتتى موبيلدى ليوفيليزاتسيالىق قوندىرعى جاساپ شىعاردى.

بۇل زاماناۋي قۇرىلعى اۋىل شارۋاشىلىعى ونىمدەرىن تابيعي قالپىندا ساقتاپ، ولاردىڭ ساپاسىن جوعالتپاي، ۇزاق ۋاقىت بويى تۇتىنۋعا مۇمكىندىك بەرەدى. قوندىرعىنى تىكەلەي ەگىس القابىندا، باۋ- باقشادا نەمەسە شالعاي فەرمالاردا قولدانۋعا بولادى.

جوبا جەتەكشىسى، حيميا عىلىمدارىنىڭ PhD دوكتورى ەربول يحسانوۆتىڭ ايتۋىنشا، ليوفيليزاتسيا نەمەسە سۋبليماتسيالىق كەپتىرۋ - بۇل مۇزداتىلعان ونىمنەن سۋدى تومەن قىسىمدا بۋلاندىرىپ، ونىڭ تابيعي قۇرىلىمى مەن پايدالى قاسيەتتەرىن ساقتايتىن وزىق تەحنولوگيا.

«Dayar 20» ارقىلى كەپتىرىلگەن ونىمدەر ءدامىن، ءتۇسىن، ءيىسىن، ءپىشىنىن جانە قۇرامىنداعى دارۋمەندەرىن ساقتاي وتىرىپ، ۇزاق ۋاقىتقا جارامدى بولىپ قالا بەرەدى. قوندىرعى جەمىس-جيدەك، كوكونىس، ەت، ءسۇت ونىمدەرى، دايىن تاعامدار مەن بالىقتى جوعارى ساپادا كەپتىرە الادى.

يحسانوۆتىڭ ايتۋىنشا، قۇرعاق ونىمدەردى ارنايى توڭازىتقىشسىز بولمە تەمپەراتۋراسىندا 1 جىلدان 3 جىلعا دەيىن، ال ارنايى قاپتامامەن 10 جىلدان 50 جىلعا دەيىن ساقتاۋعا بولادى.

«Dayar 20» - فەرمەرلەر ءۇشىن سەنىمدى كومەكشى عانا ەمەس، سونىمەن قاتار اگروونەركاسىپتىك كەشەن مەن قايتا وڭدەۋ سالاسىن جاڭعىرتۋعا جول اشاتىن تەحنولوگيالىق سەرپىلىس. بۇل قۇرىلعى، اسىرەسە، تاۋلى جانە شالعاي وڭىرلەردەگى شارۋاشىلىقتار ءۇشىن ءتيىمدى شەشىم بولماق. عالىمدار بۇل يننوۆاتسيا اۋىل شارۋاشىلىعى ونىمدەرىنىڭ ەكسپورتتىق الەۋەتىن ارتتىرىپ، ازىق-تۇلىك قاۋىپسىزدىگىن قامتاماسىز ەتۋگە ناقتى ۇلەس قوسادى دەپ وتىر.