قازاقستاندىق اعىلشىن ءتىلى مۇعالىمدەرى ءبىلىمىن لوندوندا شىڭدادى
لوندون. KAZINFORM - جيىرمادان استام اعىلشىن ءتىلىنىڭ مۇعالىمى مەن سالا باسشىلارى بريتانيالىق ارىپتەستەرىمەن كەزدەسىپ، ۇزدىكسىز كاسىبي دامۋ جۇيەسىنىڭ وزىق ۇلگىلەرىمەن تانىستى، دەپ حابارلايدى Kazinform ءتىلشىسى.
قازاقستاندا اعىلشىن ءتىلى ءپانىن ءتيىمدى وقىتۋ ماسەلەلەرى وزەكتى بولىپ تۇر. بۇل تۋرالى 2 جىل بۇرىن قازاق-بريتان ۇكىمەتارالىق كوميسسيا وتىرىسىندا ايتىلدى. ارنايى قۇرىلعان جۇمىس توبى عىلىمي زەرتتەۋلەر جۇرگىزىپ، ۇسىنىستار ءبىلدىردى. سولاردىڭ ءبىرى وتاندىق مۇعالىمدەردىڭ ۇزدىكسىز كاسىبي دامۋى ءۇشىن وزىق بريتانيالىق ادىستەمەمەن تەرەڭىرەك تانىسۋ.
«ارىپتەستەرىمىزدىڭ تاجىريبەلەرى، ارينە، الەمگە تانىلىپ جاتىر. جاڭا اقپاراتتى وسى كىسىلەردەن الىپ، وزىمىزدەگى پروبلەمالاردى شەشۋ جولىن قاراستىرۋ ءۇشىن كەلىپ وتىرمىز»، - دەيدى ق ر وقۋ-اعارتۋ مينيسترلىگى ورتا ءبىلىم كوميتەتىنىڭ باسقارما باسشىسى ءاليا چوكۋشيەۆا.
22 ادامنان تۇراتىن دەلەگاتسيا قۇرامىندا جوعارى وقۋ ورىندارىنىڭ باسشىلارىنان باستاپ، اۋىل مۇعالىمدەرىنە دەيىن بار. شاقىرۋشى تاراپ – ۇلى بريتانيا حالىقارالىق ساۋدا دەپارتامەنتى جانە بريتان كەڭەسى. ولار ۇزدىكسىز كاسىبي دامۋ جۇيەسى بويىنشا پانەلدىك پىكىرتالاستار وتكىزىپ، مەكتەپتەر مەن ۋنيۆەرسيەتتەرگە ساپارلار ۇيىمداستىردى.
«ۇلى بريتانيا مۇعالىمدەر دايىنداۋدا وتە قاتاڭ الەمدىك ستاندارتتاردى ۇستانادى. ءبىز ۇزدىكسىز كاسىبي دامۋ ماسەلەسىنە ەرەكشە ءمان بەرەمىز. وسى بىلىمىمىزبەن قازاقستاندىق ارىپتەستەرىمىزبەن بولىسۋگە دايىنبىز»، - دەدى كينگس كوللەدج لوندون ۋنيۆەرسيتەتى ءبىلىم، كوممۋنيكاتسيا جانە قوعام مەكتەبىنىڭ باسشىسى ليۆيا ماتەي.
ساپار بارىسىندا مۇعالىمدەردى سەرتيفيكاتتاۋ، ولار ءۇشىن بىلىكتىلىكتى ارتتىرۋ كۋرستارىن ۇيىمداستىرۋ جانە مەكتەپ باسشىلارى مەن ادىسكەرلەردى قولداۋ ماسەلەلەرى دە باستى نازاردا بولدى. ۇزدىكسىز كاسىبي دامۋدىڭ پرينتسيپتەرى مەن تاجىريبەلەرىن ۇيرەنۋ ءۇشىن وتاندىق پەداگوگتار بريتانيالىق ارىپتەستەرىمەن تىعىز بايلانىس ورناتتى.