قازاقستاندى ايىپتاۋ كەيبىر كۇشتەرگە ءتيىمدى - بەرىك ءۋالي سادىقوۆقا جاسالعان قاستاندىق تۋرالى
استانا. KAZINFORM – ق ر پرەزيدەنتىنىڭ كەڭەسشىسى - باسپا ءسوز حاتشىسى بەرىك ءۋالي كيەۆتە قاستاندىق جاسالعان قازاق جۋرناليسىنە قاتىستى پىكىر ءبىلدىردى. بۇل تۋرالى Tengrinews اگەنتتىگى حابارلايدى.
«قايداعى سۇيەك؟ مەملەكەت باسشىسى بۇل رەسۋرسقا ەشقاشان قىزىعۋشىلىق تانىتىپ، قاراعان ەمەس. قازاقستاندا ءارتۇرلى باعىتتاعى ونداعان، ءتىپتى جۇزدەگەن وسىعان ۇقساس ارنالار مەن سايتتار جۇمىس ىستەيدى. ولار جۇمىسىن جالعاستىرىپ جاتىر. اتالعان رەسۋرسقا كەلەتىن بولساق، ول ەشقاشان ىشكى اقپاراتتىڭ كۇن تارتىبىنە ەرەكشە اسەر ەتكەن ەمەس. ونىڭ ۇستىنە، كوپتەگەن ادام ونىڭ بار ەكەندىگى تۋرالى كيەۆتەگى وقيعادان كەيىن عانا ءبىلدى»، - دەدى بەرىك ءۋالي.
سونداي- اق، پرەزيدەنتتىڭ باسپا ءسوز حاتشىسى «ەل باسشىلىعىنىڭ ستراتەگيالىق باعىتىن، ونىڭ ىشىندە سىرتقى ساياسات سالاسىندا قازاقستاننىڭ اتىنا قىسىم جاساۋعا ءتيىمدى پايدالاناتىن كۇشتەر بار دەپ بولجادى.
بەرىك ءۋاليدىڭ ايتۋىنشا، قىلمىس ۋكراينا اۋماعىندا جاسالعاندىقتان، تەرگەۋدى وسى ەلدىڭ قۇزىرلى ۆەدومستۆولارى جۇرگىزەدى.
«مەملەكەت باسشىسىنىڭ تاپسىرماسى بويىنشا ءبىزدىڭ قۇقىق قورعاۋ ورگاندارى بەلگىلەنگەن راسىمدەرگە سايكەس قوسىمشا اقپارات الۋ ءۇشىن ۋكراينا تاراپىنا جۇگىنەدى جانە قاجەت بولعان جاعدايدا تەرگەۋگە جاردەم كورسەتە الادى. بۇرىن ايدوس سادىقوۆقا تاعىلعان ايىپتارعا قاراماستان، ول اۋەلى قازاقستان ازاماتى ەكەنىن ەسكەرۋىمىز كەرەك. تيىسىنشە، ول ءوزىنىڭ وتباسىمەن بىرگە ءوز قۇقىقتارىن پايدالانادى. كونستيتۋتسياعا سايكەس، شەكارادان تىس جەردە بولسا دا، ولار مەملەكەتتىڭ قولداۋى مەن قورعاۋىنا سەنىم ارتا الادى. سوندىقتان پرەزيدەنت ءتيىستى مەملەكەتتىك جانە ديپلوماتيالىق قىزمەتتەرگە، ەگەر ولاردىڭ كەلىسىمى بولسا، سادىقوۆتار وتباسىنا بارلىق قاجەتتى كومەكتى كورسەتۋدى تاپسىردى»، - دەپ تولىقتىردى باسپا ءسوز حاتشى.
ايتا كەتسەك، بۇعان دەيىن مەملەكەت باسشىسى قاسىم- جومارت توقايەۆ كيەۆتە قاستاندىق جاسالعان قازاق جۋرناليسى جايىندا پىكىر بىلدىرگەن ەدى.