قازاقستاندا كەيبىر ەكونوميكالىق قۇقىق بۇزۋ ارەكەتتەرى قىلمىس ساناتىنان شىعارىلادى

استانا. KAZINFORM - قىلمىستىق كودەكستەن بيزنەس مۇددەسىنە قاتىستى بىرنەشە باپ قىلمىس ساناتىنان شىعارىلماق.

بۇل تۋرالى بۇگىن ماجىلىستە «ەكونوميكالىق قىلمىستاردى قىلمىستىق سيپاتتان ارىلتۋدىڭ وزەكتى ماسەلەلەرى» تاقىرىبىنداعى دوڭگەلەك ۇستەل وتىرىسىندا ق ر قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ ايتتى.

«مەملەكەت باسشىسىنىڭ تاپسىرماسىن ىسكە اسىرۋ ءۇشىن پارلامەنت ءماجىلىسى ءتيىستى زاڭ جوبالارىنا باستاما جاسادى. ءوز كەزەگىندە اگەنتتىك ۇكىمەت قورىتىندىلارىنىڭ جوبالارىن دايارلادى. تۇزەتۋلەردىڭ ماقساتى - قىلمىستىق پروتسەستە ازاماتتار مەن كاسىپكەردىڭ قۇقىعىن قورعاۋ. اگەنتتىك تەرگەيتىن ىستەردىڭ 80 پايىزى قوعامعا قاۋىپتى قىلمىستارعا قاتىستى ەكەنىن ەسكەرگەن ءجون. ولار ءۇشىن جازانى جەڭىلدەتۋ قىلمىس پەن كولەڭكەلى ەكونوميكانىڭ وسۋىنە اكەلۋى مۇمكىن. بۇل تۇرعىدا بارلىق تاۋەكەلدى ەسكەرە وتىرىپ، زاڭ جوبالارىندا قىلمىستىق كودەكستە كاسىپكەرلەر مۇددەلەرىن قوزعايتىن 4 باپ قىلمىس ساناتىنان شىعارۋ قاراستىرىلعان»، - دەدى ج. ەلەمەسوۆ.

ونىڭ ايتۋىنشا، ۇسىنىلىپ وتىرعان وزگەرىستەردى مەملەكەتتىك ورگاندار، «اتامەكەن» ۇ ك پ جانە پرەزيدەنت اكىمشىلىگى كونتسەپتۋالدى تۇردە قولداپ وتىر.

زاڭ جوبالارىندا قىلمىستىق كودەكستەگى ەكى باپتى تولىقتاي قىلمىس دەپ تانىماۋ ەسكەرىلگەن. بىرىنشىدەن، كرەديتتى زاڭسىز الۋ نەمەسە بيۋدجەتتىك كرەديتتى ماقساتسىز پايدالانۋعا قاتىستى 219-باپ قامتىلدى. اتاپ ايتقاندا، سۋبسيديالاردىڭ نەگىزدىلىگى مەن ماقساتىن ۋاكىلەتتى ورگاندار مەن ۇيىمدار تەكسەرەدى. بارلىق داۋلاردى ولار ازاماتتىق سوت ءىسىن جۇرگىزۋ اياسىندا شەشەدى.

ەكىنشىدەن، قازاقستان رەسپۋبليكاسىنىڭ بۋحگالتەرلىك ەسەپ پەن قارجىلىق ەسەپتىلىك تۋرالى زاڭناماسىن بۇزۋ ماسەلەسىن قامتىعان قىلمىستىق كودەكستىڭ 241-بابى اكىمشىلىك قۇقىق بۇزۋشىلىق تۋرالى كودەكسكە اۋىستىرىلماق.

«تاجىريبەگە سۇيەنە وتىرىپ، بۋحگالتەردىڭ شامالى عانا قاتەلىگى ادال كاسىپكەر ءۇشىن ۇزاق جانە اۋىر تەرگەۋگە اينالۋى مۇمكىن. سوندىقتان ونى اكىمشىلىك جاۋاپكەرشىلىك ساناتىنا اۋىستىرۋدى ءجون كورىپ وتىرمىز»، - دەدى جەڭىس ەلەمەسوۆ.

ونىڭ سوزىنە قاراعاندا، ءىشىنارا قىلمىس ساناتىنان شىعارۋ كەدەن سالاسىنداعى قۇقىق بۇزۋ ارەكەتتەرىن دە ەسكەرىپ وتىر. ياعني قىلمىستىق كودەكستىڭ 234-بابى (ەكونوميكالىق كونتراباندا) جانە 236-بابى (كەدەندىك باجداردى، كەدەندىك الىمداردى، سالىقتاردى، ارنايى، دەمپينگكە قارسى، وتەماقى باجدارىن تولەۋدەن جالتارۋ) قاراستىرىلىپ وتىر. بۇل رەتتە، تۇزەتۋلەر اياسىندا ولار ءۇشىن قىلمىستىق جاۋاپكەرشىلىكتىڭ شەكتى دەڭگەيىن كوتەرۋ ۇسىنىلدى.

«بۇل جەردە شاعىن جانە ورتا بيزنەستى قولداۋدى ءجون كوردىك. وزدەرىڭىز بىلەتىندەي، كاسىپكەرلەردىڭ كوپشىلىگى ساۋدا سالاسىمەن اينالىسادى. بۇل باعىتتاعى وزگەرىس بيزنەستىڭ دامۋىنا سەرپىن بەرەدى دەپ سەنەمىز»، - دەدى اگەنتتىك وكىلى.

ءوز كەزەگىندە ءماجىلىس دەپۋتاتى ابزال قۇسپان اتالعان زاڭ جوبالارىنا ەنبەي قالعان تاعى ءبىر باپقا توقتالدى.

«قازىر ماجىلىستە قىلمىستىق-پروتسەستىك كودەكسىن وڭتايلاندىرۋ تۋرالى زاڭ جوباسى قارالىپ جاتىر. وسى قۇجات اياسىندا قىلمىستىق كودەكستىڭ 197-بابىن (مۇنايدىڭ جانە مۇناي ونىمدەرىنىڭ شىعارىلۋ زاڭدىلىعىن راستايتىن قۇجاتتارسىز ولاردى تاسىمالداۋ، يەمدەنۋ، وتكىزۋ، ساقتاۋ، سونداي-اق مۇنايدى قايتا وڭدەۋ) اكىمشىلىك قۇقىق بۇزۋشىلىق تۋرالى كودەكسكە اۋىستىرۋ نەمەسە مۇلدەم الىپ تاستاۋ تۋرالى ماسەلە كوتەرىلدى»، - دەدى ا. قۇسپان.