قازاقستاندا العاشقى ا ە س سالاتىن حالىقارالىق كونسورتسيۋمنىڭ كوشباسشىسى انىقتالدى
استانا. KAZINFORM — ق ر اتوم ەنەرگياسى جونىندەگى اگەنتتىگى حالىقارالىق ساراپشىلاردىڭ قاتىسۋىمەن ەلىمىزدەگى العاشقى اتوم ەلەكتر ستانتسياسىن (ا ە س) سالۋعا ارنالعان كونسورتسيۋم كوشباسشىسىن ايقىنداۋ جۇمىسىن اياقتادى.
اشىق جانە باسەكەگە قابىلەتتى ديالوگ اياسىندا رەاكتورلىق تەحنولوگيالاردىڭ جەتەكشى الەمدىك وندىرۋشىلەرىمەن كەلىسسوزدەر جۇرگىزىلىپ، ولاردىڭ وندىرىستىك نىساندارىنا ساپارلار ۇيىمداستىرىلدى.
اتقارىلعان جۇمىستاردىڭ ناتيجەسىندە الەۋەتتى جەتكىزۋشىلەردىڭ «قىسقا تىزىمىنە» كەلەسى كومپانيالار ەندى: «روساتوم» (رەسەي)، «China National Nuclear Corporation» (قىتاي)، «Électricité de France» (فرانسيا) جانە «Korea Hydro Nuclear Power» (وڭتۇستىك كورەيا).
تىزىمگە ەنگەن كومپانيالار قازاقستاندا اەس سالۋ بويىنشا تەحنيكالىق جانە كوممەرتسيالىق ۇسىنىستاردان تۇراتىن ماتەريالداردىڭ كەشەندى پاكەتىن ۇسىندى. بۇل ماتەريالداردا كەلەسى مالىمەتتەر قامتىلدى:
قۇرىلىستىڭ بولجامدى قۇنى؛
جوبانى ىسكە اسىرۋ مەرزىمدەرى؛
قارجىلاندىرۋ تارتۋ مودەلدەرى؛
جابدىقتار مەن قۇرىلىس جۇمىستارىن جەرگىلىكتەندىرۋ تاسىلدەرى؛
كادر دايارلاۋ مەن عىلىمي-ءبىلىم بەرۋ الەۋەتىن دامىتۋ بويىنشا ۇسىنىستار؛
يادرولىق وتىن سيكلىندەگى ىقپالداستىق مۇمكىندىكتەرى؛
الەۋمەتتىك مىندەتتەمەلەر ماسەلەلەرى.
ناتيجەسىندە، ق ر اتوم ەنەرگياسى جونىندەگى اگەنتتىگى، «قازاقستاندىق اتوم ەلەكتر ستانتسيالارى» ج ش س جانە فرانتسۋزدىق Assystem ينجەنەرلىك كومپانياسى بىرلەسىپ ازىرلەگەن ادىستەمە نەگىزىندە ۇسىنىلعان رەاكتورلىق تەحنولوگيالار مەن باسقا دا ۇسىنىستارعا كەشەندى باعالاۋ جۇرگىزىلدى.
باعالاۋ ا ە س قاۋىپسىزدىگى، تەحنولوگيالىق جانە قارجىلىق اسپەكتىلەر، حالىقارالىق تاجىريبە، كادرلار دايارلىعى، جەرگىلىكتەندىرۋ دەڭگەيى جانە وزگە دە كورسەتكىشتەر بويىنشا جۇزەگە اسىرىلدى.
- وسى تالداۋدىڭ ناتيجەلەرى اتوم سالاسىن دامىتۋ ماسەلەلەرى جونىندەگى ۆەدومستۆوارالىق كوميسسيانىڭ قاراۋىنا ۇسىنىلدى جانە قازاقستاندا ا ە س سالۋ بويىنشا ەڭ وڭتايلى ءارى ءتيىمدى ۇسىنىستار رەسەيلىك «روساتوم» كومپانياسىنان كەلگەنى انىقتالدى. ەكىنشى ورىنعا قىتايلىق «China National Nuclear Corporation» جايعاسسا، فرانسۋزدىق «Électricité de France» پەن كورەيالىق «Korea Hydro Nuclear Power» ۇسىنىستارى ءۇشىنشى ورىندى يەلەندى، - دەپ جازدى اگەنتتىكتەن.
وسىلايشا، «روساتوم» كومپانياسى قازاقستانداعى العاشقى اتوم ەلەكتر ستانتسياسىن سالۋ جوباسى بويىنشا حالىقارالىق كونسورتسيۋمنىڭ كوشباسشىسى رەتىندە انىقتالدى.
قازىرگى ۋاقىتتا «روساتوم» ۇسىنعان ۇسىنىستار نەگىزىندە رەسەي فەدەراتسياسى تاراپىنان مەملەكەتتىك ەكسپورتتىق قارجىلاندىرۋ تارتۋ ماسەلەسى پىسىقتالۋدا.
قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى ەلىمىزدەگى العاشقى اتوم ەلەكتر ستانتسياسىنىڭ قۇرىلىسىن جۇزەگە اسىراتىن ءتيىمدى حالىقارالىق كونسورتسيۋمدى قالىپتاستىرۋ بويىنشا شەتەلدىك ارىپتەستەرىمەن جۇمىستى جالعاستىرادى.
ايتا كەتەيىك، «روساتوم» وزبەكستانداعى اەس- كە قاجەتتى جابدىقتاردى ازىرلەۋگە كىرىسكەنىن جازعانبىز.