قازاقستان رۋحاني ديپلوماتيانى نىعايتۋدىڭ ماڭىزدى ۇلگىسى بولدى - دۇنيەجۇزىلىك يسلام ليگاسى
استانا. KAZINFORM - قازاقستان دىندەر مەن مادەنيەتتەر وكىلدەرى اراسىندا كوپىر ورناتۋدىڭ ماڭىزدى ۇلگىسى بولدى. بۇل تۋرالى ەلورداداعى فورۋمدا دۇنيەجۇزىلىك يسلام ليگاسى باس حاتشىسىنىڭ ورىنباسارى ابدۋلراحمان ءال-زايد ءمالىم ەتتى.
- بۇگىن قازاقستانداعى ماڭىزدى فورۋمدا كەزدەسۋگە كەلدىك. قازاقستان رۋحاني ديپلوماتيانى نىعايتۋدىڭ، ءتۇرلى دىندەر مەن مادەنيەتتەردىڭ وكىلدەرى اراسىندا كوپىر ورناتۋدىڭ ماڭىزدى ۇلگىسى بولدى. بۇل ماڭىزى جوعارى فورۋم بۇگىن سەگىزىنشى رەت ءوتىپ وتىر جانە قازىرگى الەمدەگى نەگىزگى يدەولوگيالىق وقيعالاردىڭ ءبىرى سانالادى. وسى جيىن ءوزىنىڭ ناتيجەسىمەن جانە ماقساتىمەن بۇكىل الەمنىڭ نازارىن اۋدارا باستادى. سونىمەن قاتار، بۇل فورۋم كوشباسشىلاردىڭ قوعامدىق كەلىسىمدى نىعايتۋعا جانە بۇكىل الەمدە بەيبىتشىلىك ورناتۋعا باعىتتالعان وركەنيەتتىك كوزقاراسىن كورسەتەدى، - دەدى ابدۋلراحمان ءال-زايد الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXIII وتىرىسىندا.
وسى ورايدا ول دۇنيەجۇزىلىك يسلام ليگاسى بۇكىل الەمدە بەيبىتشىلىكتى نىعايتۋ، مەملەكەتتەردىڭ قوعامىندا كەلىسىم ورناتۋ ءۇشىن ۇجىمدىق جۇمىستى جالعاستىرۋعا مۇدەللى ەكەنىن اتاپ ءوتتى.
- ءبىز قارۋلى قاقتىعىستارعا سەبەپشى بولعان بارلىق كورىنىستى ايىپتايمىز. بەيبىتشىلىك جولىنداعى ارىپتەستەرىمىزدى، بارلىق ءدىن وكىلدەرىن ىنتاماقتاستىق ورناتۋعا شاقىرامىز، - دەدى.
بۇل تۇرعىدا دۇنيەجۇزىلىك يسلام ليگاسى باس حاتشىسىنىڭ ورىنباسارى ۋكراينا مەن رەسەي اراسىنداعى قاقتىعىستى توقتاتۋعا، گازاداعى ماسەلەنى شەشۋگە بار كۇش-جىگەردى سالۋ كەرەك ەكەنىن ايتتى. وسى ورايدا گازا بويىنشا بارلىق حالىقارالىق مىندەتتەمەلەر ورىندالۋى ءتيىس.
ايتا كەتەيىك، ب ۇ ۇ مالىمەتىنشە، گازادا مەرت بولعان پالەستينالىقتار سانى رەسمي كورسەتكىشتەن 10 ەسە كوپ.